Германскиот канцелар, Фридрих Мерц, и неговата нестабилна коалиција со Социјалдемократската партија (СПД/SPD) се наоѓаат на крстопат кој може да резултира со сериозна политичка криза. Само седум месеци по преземањето на функцијата, новата влада веќе се соочува со екстремни предизвици кои можат да доведат до нејзино паѓање. Во 2023 и 2024 година, економијата забележа пад, а оваа година не забележа значителен раст. Владата нема брзи резултати од започнатите иницијативи, и многу индустриски лидери сметаат дека се неопходни структурни реформи за да се врати конкурентноста на Германија.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Политиката и криптовалутите: за танго се потребни двајца
Врската помеѓу политиката и криптовалутите не е повеќе никаква новост. Погледнете само што се случи со криптокомпанијата „Американ биткоин“ (American Bitcoin Corp.), поврзана со семејството на американскиот претседател Доналд Трамп. Една од главните вести на Волстрит на 2 декември беше падот на акциите на оваа фирма за 50 отсто за само половина час, како што извести и „Блумберг“. Бизнисот формиран од страна на синот на претседателот, Ерик Трамп, со намера да „копа“ криптовалути, доживува распродажба на своите акции среде општата паника на криптопазарот, при што биткоинот падна за повеќе од 30 отсто од својот историски максимум достигнат во октомври годинава.
„Американ биткоин“, каде што акционер е уште еден син на претседателот, Доналд Трамп Џуниор, претходно годинава забележа силен раст на акцијата, на крилата на еуфоријата што ја предизвика јасната наклонетост на политиката на претседателот Трамп кон криптопазарот, каде што и самиот тој и членови на неговото семејство влегоа со инвестиции во повеќе криптокомпании. Но, откако го достигна врвот во септември, „Американ биткоин“ почна да паѓа и оттогаш загуби околу 80 отсто од вредноста, а и другите криптобизниси поврзани со семејството не поминуваат подобро.
Што всушност промовираше „Бајненс“ во Македонија?
Тргување со виртуелни средства, симулирање реални пазарни услови вклучувајќи движење на цените во живо и податоци за активни налози за купување и продавање се меѓу можностите кои се нудат на демо трговскиот сервис кој „Бајненс“, најголемата криптоберза во светот по обем на тргување и број на корисници, неодамна го лансираше за корисниците на Балканот, вклучувајќи ја и Македонија.
Откако ја објавија можноста, сакавме да истражиме што всушност значи ова за македонските крипто инвеститори и дали има некои „замки“. Познавачите кои ги консултиравме објаснуваат дека на овој демо сервис корисниците можат да тргуваат на спот пазарите (Spot markets) и фјучерсите (Futures), и тоа преку интерфејс што целосно ја рефлектира Бајненс платформата за реално тргување. Според нив, концептот е сосема во ред и главната цел е да создаде безбедна и неризична средина во која корисниците, без разлика на нивото на искуство, можат да учат, експериментираат и вежбаат.
Акциите растат паралелно со оптимизмот за раст на крајот на годината
Акциите во Европа и во Азија се тие што вчера го поставија темпото на раст, додека американските фјучерси ја задржаа добивката бидејќи трговците се обложуваат дека намалувањето на каматните стапки од страна на американските Федерални резерви (Фед) ќе помогне во поттикнувањето на глобалниот раст до крајот на годината. Европскиот индекс Stoxx 600 порасна бидејќи технолошките и автомобилските акции постигнаа подобри резултати. Азиските акции достигнаа највисоко ниво за повеќе од две недели благодарение на силата на јапонските „тешкаши“ како што е „Софтбанк груп“ (SoftBank Group Corp).
Фјучерсите на индексот S&P 500 беа малку променети откако референтната вредност порасна во седум од последните осум сесии. Глобалните обврзници ослабеа, предводени од зголемувањето на приносите во Јапонија. Расположението се промени по извештајот дека Банката на Јапонија веројатно ќе ги зголеми каматните стапки овој месец, ублажувајќи го претходниот поттик од силната 30-годишна аукција.
Шесте најмагични божиќни саеми во близина
Градовите веќе блескаат во полн празничен сјај. Адвентските саеми, некогаш скромни локални пазарчиња со рачно изработени украси, денес прераснаа во софистицирана мешавина од традиција, современа уметност, гастрономија и зимска градска атмосфера. За само неколку часа возење, ви ги препорачуваме дестинациите што со својата автентичност, внимателно осмислени програми и единствена атмосфера се вбројуваат меѓу најубавите дестинации за декемвриски прошетки.
Декември во Љубљана носи креативни работилници во Волшебната шума, посета од Дедо Мраз, поворката на Свети Никола и низа улични настани – од театарски претстави до настапи на улични артисти и празнични пловидби по Љубљаница. Оваа година градот го осветлува тематската декорација насловена „Во хармонија со пропорцијата“ на авторот Урбан Модиц, која преку симболиката на златниот пресек ја истражува хармонијата на различните облици на заедничкиот живот – од атоми и соѕвездија до меѓучовечки односи. Празничниот концепт ја нагласува идејата дека различноста не го исклучува складот, туку го создава.
Најбрзо и наједноставно до вашите посакувани нешта
Во време кога цениме сигурност, брзина и едноставност, „УНИБанка“ подготви една од најповолните кредитни понуди на пазарот - кредит до 2.000.000 денари со фиксна каматна стапка од само 4,5 отсто, без жиранти и достапен со можност за целосна онлајн апликација. Овој кредит е создаден за сите што сакаат финансиска поддршка при реновирање на домот, купување автомобил, рефинансирање, покривање поголеми трошоци, обезбедување учество за станбен кредит или пак плаќање на данокот при купопродажба.
Вистинско решение за финансиска стабилност, без непредвидливи скокови на каматите и без непотребни административни чекори. Со целосно дигитализираниот процес на аплицирање, ги избегнувате трошоците и чекорите што порано одземаа време. Апликацијата е брза, едноставна и достапна за сите клиенти со редовни примања. Без разлика дали ќе изберете кредит со или без полиса за ризико-осигурување на живот, добивате фиксна каматна стапка за целиот период на отплата - до 95 месеци.
.webp){kind=icon}
