Зелена енергија или технологија: Анализираме во што да се вложи

Вештачката интелигенција или зелената транзиција – што носи поголем профит сега, но и во иднина? Прашањето е уште поважно ако се земе предвид дека и во двата случаи главната улога ја имаат полупроводниците.

Ако се игра правилно, годишен приход од околу 60 милијарди долари може да се претвори во бизнис вреден над три трилиони американски долари, но истовремено истиот годишен приход може да се претвори во бизнис вреден 44 милијарди долари.

Се разбира дека во првиот пример се мисли на „Енвидија“ чиј извршен директор, Џенсен Хуанг, во јуни продаде акции вредни речиси 169 милиони долари. Акциите на компанија се на врвот благодарение на ненаситната побарувачка за чипови што се користат за имплементација на вештачка интелигенција.

Вториот пример се однесува на четири кинески компании „Лонги Грин Енерџи Технолоџи“ (Longi Green Energy Technology Co), „Џеј – еј солар технолоџи“ (JA Solar Technology Co.), „Џинко Солар Холдинг“ (JinkoSolar Holding Co.) и „Трина Солар“ (Trina Solar Co.) кои се најголеми производители на соларни панели и кои за две години изгубија околу две третини од нивната заедничка пазарна капитализација која сега изнесува околу 44 милијарди долари.

Bloomberg

Синергија – затоа што дигитализацијата бара многу струја

Ваквите бројки натера дел од експертите на глобално ниво да сметаат дека иднината е во вештачката интелигенција, а обновливите извори на енергија се бизнис кој е осуден на неуспех.

„Блумберг Адрија“ ги праша домашните експерти што мислат на оваа тема. Дали сегашниот раст на „Енвидија“ ќе потрае на долг рок и обратно дали ова затишје кај компаниите кои произведуваат соларни панели значи дека овој сектор веќе го достигнал врвот претходно?

Андријана Поповска, портфолио-менаџерка во „ВВП фонд менаџмент“ не мисли дека вложувањето во компании кои се занимаваат со зелена енергија е осудено на неуспех туку дека синергијата помеѓу овие две области ќе биде клучна за балансирање на технолошкиот развој со еколошките предизвици, овозможувајќи холистички напредок и просперитет. И двете ќе играат клучни улоги, но секоја на свој начин ќе биде од суштинско значење за различни аспекти на идниот напредок.

„Вештачката интелигенција бара сериозни технолошки инфраструктури, што пак придонесува до драстично зголемување на побарувачката на електрична енергија“, вели Поповска.

Андријана Поповска, портфолио-менаџерка во „ВВП фонд менаџмент“/ Приватна архива

Според неа, овие технологии имаат потенцијал да трансформираат многу индустрии, од автоматизација на производството до персонализирани услуги во здравството и финансискиот сектор.

„Очекувањата се дека идниот развој на вештачката интелигенција и нејзината примена во оптимизација на работните процеси, зголемена продуктивност и ефикасност во работата, ќе даде една нова динамика на раст и развој на компаниите и економиите во глобала. Меѓутоа, брзиот развој на ВИ технологијата бара огромни количества на енергија. Процесот на тренирање на големи јазични модели емитира сериозни количества на јаглерод диоксид, што ја потенцира потребата од одржливи и обновливи извори на енергија. Компаниите кои се занимаваат со вештачка интелигенција веќе размислуваат за енергетски решенија како соларна енергија и нуклеарна фузија за да ги задоволат своите потреби“, објаснува Поповска.

Компаниит во развиените земји се под значителен притисок од регулаторите за инвестирање во проекти кои имаат силна компонента на еколошко, социјално и корпоративно управување.

„Иако вештачката интелигенција ќе биде клучен двигател на технолошкиот и економскиот напредок, зелената енергија ќе биде од суштинско значење за обезбедување на одржлива и сигурна иднина“. Вели Поповска.

Диверзификација на инвестициите е клучот за успех

Консултантот за енергетска ефикасност и обновливи извори на енергија Филип Лаовски вели дека се работи за моментален тренд.

„Генерално, на краток рок, за очекување е технолошките компании и нивната вредност да бидат поатрактивни за инвеститорите со оглед на тоа дека побарувачката за ИТ компоненти и во наредниот период драматично ќе расте“, вели тој.

Сепак, според него, ова не значи дека треба да се отпишат компаниите од секторите кои работат на полето на зелената енергија.

 Филип Лаовски, консултант за енергетска ефикасност и обновливи извори на енергија/приватна архива

„Добар пример дека овие компании не може да бидат осудени на неуспех е тоа што многу енергетски нафтени гиганти во светот инвестираат во зелена енергија и во диверзификација на нивните портфолија“, вели Лаовски.

Во полза на зелената транзиција одат и стратегиите за развој на енергетиката во земјите во Европа, амбициозната зелена агенда, проекциите за намалување на стакленичките гасови односно намалување на емисиите на јаглерод диоксид од енергетскиот сектор.

„Компаниите кои се занимаваат со зелена енергија често ги исполнуваат критериумите за ЕСГ (еколошко, социјално и корпоративно управување), што ги прави атрактивни за институционалните инвеститори кои бараат да вложуваат во одржливи проекти и целат кон креирање на портфолија со висока ЕСГ оценка“, вели Поповска.

Од друга страна иако ИТ компаниите се ветувачки и имаат голем потенцијал за раст и во идниот период, основниот принцип на инвестирање е диверзификација на вложувањата.

„Инвеститорите не треба да ги игнорираат и останатите сектори. Диверзификацијата на инвестициите во различни сектори може да обезбеди стабилност и да го намали ризикот на портфолиото, овозможувајќи долгорочен раст, а паралелно обезбедувајќи заштита на инвестираните средства“, вели таа.

Каква е состојбата на двете индустрии во моментов?

Инвестициите во зелена енергија во моментов се на историски високо ниво. Во 2024 година, глобалните инвестиции во зелена енергија се очекува да надминат 2 трилиони долари, што е повеќе од вкупните инвестиции во нафта, гас и јаглен.

Компаниите кои произведуваат компоненти за зелената транзиција нудат долгорочна одржливост и се клучни за постигнување на глобалните климатски цели.

„Верувам дека како што земјите ширум светот се посветуваат на намалување на јаглеродните емисии и се стремат кон постигнување на нулта емисии, побарувачката за зелени технологии ќе продолжи да расте. И покрај иницијално високите трошоци за истражување и развој, овие компании имаат потенцијал за долгорочен раст и развој. Дополнително, многу земји воведуваат политики и субвенции за поттикнување на зелена енергија, што дополнително ги зголемува инвестициите во овој сектор“, објаснува Поповска.

Што се однесува до технолошките компании и тоа дали истите стигнаа до врвот на своите можности, таа смета дека бенефитите од имплементацијата на софистицифани технолошки решенија допрва ќе се почувствува.

„И покрај тоа што голем дел од овие очекувања се веќе вградени во цените на акциите на компаниите, верувам дека очекувањата за намалување на каматните стапки уште повеќе ќе ги мотивираат технолошките компании да ги зголемат инвестициите во нови истражувања, развој и проекти, пред сè поради зголемената исплатливост на истите“, вели таа.

Поповска заклучува дека интеграцијата на технологијата со сите останати сектори ќе биде се повеќе присутна и дека истата ќе биде мотор кој ќе ги движи овие компании да одат напред и да создаваат нови решенија за развој на истите.

Во моментов нема коментари за веста. Биди прв да коментира...

Остави коментар