Само 19 отсто од вработените добиле покачување на платата годинава

Во услови на несмирувачка инфлација, само 19 проценти од работниците добиле покачување на платата оваа година, покажуваат резултатите од најновото истражување што секоја година го спроведува посредникот за вработување „Вработување.ком“, а чија цел е детална анализа на состојбите на пазарот на трудот во земјава, како и споредба со регионот.

Токму инфлацијата и благото обезвреднување на парите се тоа  што ја врати платата на тронот кога станува збор за критериумите при изборот на работодавец, за што претходно пишувавме подетално.

Платата и меѓучовечките односи се врвни фактори при вработувањето

Како и минатата година, висината на платата е клучна при изборот на работодавец. Ова е првиот приоритет на дури две третини од испитаниците во истражувањето. А следната важна работа се добрите меѓучовечки односи.

Иако испитаниците ги земаат предвид и другите аспекти при изборот на работодавец, тие имаат помало значење, посочуваат од „Вработување.ком“. Трето место зазема работното време, додека можноста за учење и за професионален напредок се наоѓа на четвртото место. Сигурноста на работното место како клучен фактор е важна за секој петти испитаник.

„Во Македонија најважна е висината на платата (71 отсто), зад која следуваат добрите меѓучовечки односи (60 отсто). Интересно е што на третото место е работното време (35 проценти), дури пред можностите за учење и напредување (32 отсто), но и пред флексибилноста на работното време и место (24 проценти)“, посочуваат од „Вработување.ком“.

Иако редоследот на најважните работи на работното место е речиси ист во сите земји, постојат неколку разлики. Така, на пример, за испитаниците од Босна и Херцеговина висината на платата не е на прво место, туку тоа се добрите меѓучовечки односи.

Во Хрватска, пак, платата е нешто поважна отколку за испитаниците од другите земји (74 проценти), додека во Босна и Херцеговина е најмалку важна во споредба со другите (55 проценти). 

Depositphotos

 

Притоа, секој трет испитаник (33 отсто) оценил дека за нормален живот е потребна плата од 730 евра. Повисока плата од тоа (до 1.060 евра) посакуваат 29 проценти, а за плата до 1.330 евра сонуваат 20 отсто од испитаниците. Нешто поамбициозни очекувања, односно плата од над 2.000 евра, имаат само седум проценти од испитаниците.

Во однос на покачувањето на платата, само 19 отсто од испитаниците добиле покачување оваа година, додека 15 проценти добиле корекција на платата поради инфлацијата, што е слично на бројките од минатата година. Речиси половина од испитаниците, или 46 проценти, ниту добиле ниту очекуваат покачување, додека 21 отсто се надеваат дека ќе го добијат до крајот на годината.

Ситуацијата е слична во сите земји во регионот, но со мала разлика во оптимизмот кај Македонците, кои се нешто пооптимистични кога размислуваат за можноста да добијат покачување оваа година.

„Со оглед на покачувањата – или нивното изостанување – не изненадува фактот што повеќе од половина испитаници планираат да ја сменат работата следната година. Најмалку намера за промена имаат испитаниците од Хрватска (51 отсто), што е значително помалку од минатата година, кога тоа го планираа две третини. Најмногу нова работа планираат да бараат испитаниците од Босна и Херцеговина (69 проценти)“, посочуваат од „Вработување.ком“.

Што е клучно за да се „освои“ работодавецот?

Ако погледнеме од другиот аспект, а тоа е како да се воодушеви работодавецот и да се убеди дека токму тој апликант е работникот што го бара, најмногу испитаници од Македонија (32 проценти) сметаат дека тоа се нивната мотивација и желба за вработување. На второто место се знаењата и вештините (25 отсто). Нешто помалку (21 отсто) од испитаниците сметаат дека за добивање работа е важно работното искуство.

Depositphotos

 

Дека среќата е најважен фактор за добивање работа сметаат само пет проценти од испитаниците, а седум отсто од нив ги истакнуваат добрите контакти и познанства. За формалното образование се одлучиле само еден отсто од испитаниците, а три отсто сметаат дека е важна партиската припадност.

На регионално ниво, испитаниците од Македонија го вреднуваат работното искуство повеќе од другите.

Никој веќе не се плаши од отказ, а државната работа е сè помалку атрактивна

Трендот на намалување на стравот од губење работа продолжува и оваа година. Додека во 2020 година дури 36 проценти од вработените Македонци стравувале за своето работно место, денес тој процент е само 18 отсто.
Најголем страв од губење работа имаат испитаниците од Србија, за што се изјасниле дури 30 проценти.

„Како и минатите години, кога би избирале компанијата според сопственоста, испитаниците од Македонија најмногу би избрале приватна компанија во странско сопствеништво (47 отсто), 23 проценти би работеле во домашна приватна компанија, а најмалку испитаници би избрале сопствена компанија (13 отсто). Популарноста на државните компании и јавната управа опаѓа, па, така, само 13 отсто од испитаниците би избрале јавна установа во државна сопственост како свој работодавец“, велат од „Вработување.ком“.

Половина од невработените би прифатиле каква било работа

Точно половина од невработените бараат каква било работа, без разлика дали е во струката или надвор од неа, додека 29 отсто од испитаниците што моментално се без работа бараат вработување исклучиво по струката.

Depositphotos

 

Трендот меѓу младите покажува дека тие се сè пооптимистични во поглед на брзото вработување. Имено, секој четврти млад човек во Македонија што сè уште учи или студира верува дека ќе најде нова работа во рок од еден месец по завршувањето на образованието, додека 42 проценти сметаат дека за тоа ќе им бидат потребни до три месеци, додека осум отсто се изјасниле дека чекаат работа или веќе работат.

Хонорарна работа би прифатил секој трет млад за да стекне некое работно искуство пред вистинското вработување, а дури 58 отсто би посетувале практика. 

„Интересен е фактот што не постојат испитаници што би биле заинтересирани за волонтирање“, велат од „Вработување.ком“. 

Недостига соодветна комуникација

Иако е сè потешко да се најдат квалификувани работници, многу работодавци и понатаму не им даваат повратни информации на кандидатите, посочуваат од „Вработување.ком“. 

Depositphotos

 

Секој трет или поточно 32 отсто од испитаниците се изјасниле дека никогаш не добиваат одговор на своите пријави, додека 38 отсто рекле дека ретко добиваат одговор. Само 11 отсто од испитаниците велат дека добиваат одговор на околу половина од пријавите. 

„Овој недостиг од комуникација значително влијае на перцепцијата на работодавците. Половина од испитаниците (50 проценти) изјавиле дека нема повторно да аплицираат во компанија што не им дала повратна информација. Дополнително, осум отсто ќе дадат негативен коментар за таа компанија пред пријателите и семејството, а седум проценти наведуваат дека ќе избегнуваат да ги користат нејзините производи или услуги. Од друга страна, 42 отсто од испитаниците тврдат дека неодговарањето на работодавците не влијае на нивното мислење“, велат од „Вработување.ком“.

Во истражувањето што го спроведе овој посредник за вработување учествуваа повеќе од 5.000 испитаници, од кои над 900 од Македонија, а самото истражување е направено во соработка со партнерските портали од регионот: „MojPosao.hr“ од Хрватска, „MojPosao.ba“ од БиХ и „PosloviInfostud.com“ од Србија.