Апликации изработени со вештачка интелигенција ги преплавија агенциите за вработување

Младите банкари што користат вештачка интелигенција за да ги подготват своите резимеа треба да знаат дека се под лупа на агенциите за вработување.

Зборови како „робустен“ и „педантен“ се знаци дека кандидатите за вработување во банкарскиот сектор користеле вештачка интелигенција за да ги подобрат своите резимеа, според фирмите за истражување на Волстрит. Други знаци се прекумерно користени фрази, како „постојано еволуирачки“ или кога кандидатите велат дека одиграле „значајна улога во обликувањето“ на нешто, велат регрутерите.

Како и многу други кандидати за работа, младите банкари сè повеќе користат алатки за вештачка интелигенција како ЧетГПТ (ChatGPT) за да ги подготват своите резимеа. Тоа вклучува тревога кај нивните потенцијални работодавци во инвестиционото банкарство што ценат внимание на детали и точност и бараат кандидати што не забошотуваат.

„Ако една личност не се потрудила да напише резиме, зошто јас би се потрудила да го прегледам и да интервјуирам“, вели Бријан Стерлинг, шефица за вработувања во инвестициско банкарство во СЏ (Selby Jennings). „Многу од она што банкарите го прават на своите почетни работни позиции е составување финансиски модели и презентации за клиенти. Веројатно е веднаш алармантно за работодавците ако видат резиме со грешки или, пак, такво што изгледа генерички“.

Една грешка што ја забележала во резимеата на младите кандидати е кога велат дека имале искуство во „индустриска група“ на банка. Тимот што советува компании во индустрии како производство и транспорт обично се нарекува „индустриски групи“, во множина.

Надворешните агенции за вработување често прават прв круг интервјуа пред да ги изберат своите потенцијални кандидати за банките. Сега поминуваат повеќе време испитувајќи ги кандидатите со поспецифични и технички прашања за да се осигурат дека се толку добри колку што пишува во нивните резимеа.

„Има масовен прилив  - речиси сите користат вештачка интелигенција“, вели Бенет Џордан, управен партнер во ЛП (Litney Partners). 

Различни употреби

Вештачката интелигенција може да им помогне на кандидатите да го забрзаат процесот на пишување резимеа со форматирање и приспособување на информациите што ги вклучуваат. Некои регрутери исто така користат вештачка интелигенција за да помогнат во филтрирањето на кандидатите, но дури и тогаш кандидатите можат да вклучат клучни зборови што ќе осигурат дека нивните апликации ќе бидат забележани.

Некои кандидати исто така аплицираат за истата работа повеќепати со малку поинакви клучни зборови, вели Ришел Кониан, коосновачка на „Кариерс он д мув“ (Careers On The Move), фирма специјализирана за вработување на Волстрит. Некои позиции - на пример во хеџ фонд - можат да привлечат 3.000 кандидати, рече таа.

„Тоа не е начинот што треба да се одбере за добивање позиција“, вели таа. „Ако некој што бара работа мисли дека може да се провлече со користење вештачка интелигенција или украсување на своето резиме, треба навистина да го насочи своето време на развивање на своите вештини“.

Џин Брантовер, шефица на глобалната пракса за финансиски услуги во извршната фирма за пребарување ДХР (DHR Global), посочува дека зачестеното користење вештачка интелигенција може да ги поттикне компаниите да погледнат подлабоко во карактерот на поединецот.

„Кога ќе дојдете до интервју очи в очи, фокусот ќе биде на тоа кој сте како личност наспроти само вашето резиме“, рече таа.

Во моментов нема коментари за веста. Биди прв да коментира...

Остави коментар