ВИ ќе го прави поразбирлив англискиот јазик на индиските телефонски оператори

Компанијата „Телеперформанс“ (Teleperformance SE), најголемиот оператор на повикувачки центри во светот, воведува систем на вештачка интелигенција што во реално време ги омекнува акцентите на индиските работници што зборуваат англиски, со што компанијата тврди дека ќе ги направи поразбирливи.

Технологијата, наречена превод на акцент, заедно со отстранување на заднинскиот шум, се применува во повикувачките центри во Индија, каде што работниците обезбедуваат поддршка за некои од меѓународните клиенти на компанијата. „Телеперформанс“ обезбедува аутсорсинг-поддршка за корисници и модерација на содржини за глобални компании, вклучувајќи ги „Епл“ (Apple Inc.), „Бајтденс“ (ByteDance Ltd.) „Тикток“ (TikTok) и „Самсунг“ (Samsung Electronics Co Ltd).

„Кога имате индиски оператор на линија, понекогаш е тешко да се слушне, да се разбере“, изјави заменик-извршниот директор Томас Макенброк во интервју за „Блумберг“ (Bloomberg). Технологијата може „да го неутрализира акцентот на индискиот говорник без никакво доцнење“, рече тој. Тоа „создава поголема интимност, го зголемува задоволството на клиентите и го намалува просечното време на повиците: тоа е победа за двете страни“.

Компанијата одби да открие кои клиенти ја користат технологијата.

„Телеперформанс“ предвидува раст на приходите од три до пет отсто годинава, се наведува во извештајот за заработка објавен во четвртокот. Сепак, аналитичарите беа разочарани од податокот дека компанијата очекува заработката пред камати, даноци и амортизација да биде рамна или да се зголеми само за 0,1 отсто.