Борба на моделите: Кој води во светот на вештачката интелигенција?

Толку далечно изгледа крајот на 2022 година кога светот го запозна ЧетГПТ (ChatGPT), алатката за вештачка интелигенција (ВИ) која со неверојатна брзина ја освои технолошката сцена и стана дел од нашето секојдневие. Едноставен за користење, со одговори на сите прашања, понекогаш покреативен од нас самите, ЧетГПТ за многумина стана главен советник, помош, понекогаш и спас од работи кои не сакаме да ги правиме. Но, повеќе од сè, ЧетГПТ стана поттик за развој на индустријата за ВИ и слични модели.

Малку повеќе од две години по дебито на ЧетГПТ, ВИ сцената е значително поразвиена, а алатките базирани на вештачка интелигенција станаа вообичаени. Но, додека е јасно кој беше прв, денес главното прашање е кој е најдобар.

„Опен еј-ај“ (OpenAI), „Гугл“ (Google), а од неодамна и „Дипсик“ (DeepSeek) водат битка за најдобрите модели за ВИ, додека на државно ниво борбата се води помеѓу Кина и САД. И во тоа моментално, според резултатите на „Четбот Арена“ (Chatbot Arena), победува САД. Имено, Четбот Арена“ врз основа на два милиона гласови на корисници ги рангираше најдобрите јазични модели на вештачка интелигенција кои моментално се достапни на пазарот.

Иако разликите се мали, првите две места ги зазедоа модели во сопственост на „Гугл“, потоа модели во сопственост на „Опен еј-ај“, а потоа и на „Дипсик“.

Најдобрите модели за ВИ

„Гугл“ неодамна ја издаде новата верзија на својот модел „џеминај“ (Gemini 2.0 Flash Thinking). Тој моментално важи за најдобар модел, а е дизајниран токму за да може да конкурира на најновите модели на „Опен еј-ај“ и „Дипсик“. Посебно го издвојува тоа што не нуди само одговори, туку се фокусира и на прикажување на својот мисловен процес.

Неговиот претходник, моделот 1206 (Gemini Exp-1206) кој излезе во декември минатата година, важи за втор најдобар модел, а го следи најновиот модел на „Опен еј-ај“, ЧетГПТ 4о (Chatgpt-4o-latest), кој излезе во мај 2024 година.

Меѓу најдобрите се наоѓа и моделот на „Дипсик“, Р1 (R1), кој се појави на пазарот кон крајот на јануари и целосно ја шокираше технолошката индустрија. Кинескиот „Дипсик“ многу брзо стана хит на сцената на модели за ВИ, го потопи американскиот технолошки пазар и стана најмногу преземана апликација во продавниците на „Епл“ (Apple) и „андроид“ (Android). На истиот список, но нешто пониско, се наоѓа неговиот претходник В3 (DeepSeek V3), а нивната главна разлика е брзината со која дава одговори.

На списокот се и модели на кинеските компании „Алибаба“ (Alibaba) и „Жипу“ (Zhipu). Најновата верзија на ВИ моделот на „Алибаба“ беше објавена неколку дена по Дипсик, а станува збор за моделот Квен (Qwen 2.5 Max).

Инаку, како конкурент во браншата се наметна и компанијата „Жипу“ која исто така разви неколку ВИ алатки, вклучувајќи автономен агент кој може да симулира дејства на корисникот на паметен телефон или веб-прелистувач.

ЧетГПТ во секој случај сигурно повеќе не е единствен, а конкуренцијата во сферата на ВИ продолжува активно да се развива. И тоа не е необично со оглед на тоа што пазарот на вештачка интелигенција порасна на повеќе од 184 милијарди долари во 2024 година. Според податоците на „Статиста“ (Statista), се очекува до 2030 година да надмине 826 милијарди долари.

Во моментов нема коментари за веста. Биди прв да коментира...

Остави коментар