.webp){kind=icon}
„Опен еј-ај“ дозволува ограничена група корисници да тестираат нов сет на функции за пребарување што ќе одговараат на прашања со понавремени информации и истакнати врски до изворот на тие информации. Ова го претставува неговиот најдиректен предизвик досега за „Гугл“ на „Алфабет“.
Новата опција, наречена СрчГПТ, ќе биде објавена како прототип достапен на веб-прелистувачот и ќе им овозможи на корисниците ново искуство за пребарување, кое подоцна би можело да биде додадено на неговиот најпознат производ ЧетГПТ. „Опен еј-ај“ наведе дека корисниците ќе видат одговори на своите прашања со придружна заслуга за креаторите и издавачите, вклучувајќи и поголем број медиумски компании што склучија договори за лиценцирање со стартапот во последниве месеци. СрчГПТ исто така ќе им овозможи на корисниците да поставуваат дополнителни прашања без да го изгубат контекстот на оригиналното барање.
„Опен еј-ај“ одби да даде временска рамка за тоа кога СрчГПТ ќе биде воведен, но рече дека првично ќе биде достапен за корисниците што се регистрираат за листа на чекање. „Опен еј-ај“ работи со партнерите и издавачите за да добие повратни информации за новата алатка и планира да ги интегрира најуспешните функции за пребарување во ЧетГПТ. „Блумберг“ претходно објави дека „Опен еј-ај“ подготвува алатка за пребарување.
Со лансирањето на ЧетГПТ кон крајот на 2022 година, „Опен еј-ај“ ја започна трката за воведување генеративна вештачка интелигенција (ВИ) во низа основни интернет-услуги.
„Пребарувањето со децении беше примарен начин за издавачите и креаторите да стигнат до корисниците“, напиша „Опен еј-ај“ во објава на блог во четвртокот. „Сега користиме вештачка интелигенција за да го подобриме ова искуство со истакнување висококвалитетна содржина во разговорен интерфејс со повеќе можности за ангажирање на корисниците“.
Depositphotos
Сепак, клучен предизвик за „Опен еј-ај“ и неговите ривали е обезбедувањето точни информации за корисниците, особено кога тие бараат информации за тековни настани. Четботите често може да халуцинираат или да измислуваат лажни одговори на прашања кога не го знаат одговорот.
„Опен еј-ај“ склучи договори за лиценцирање со издавачи како што се „Њуз“, „Ахсел“ и магазинот „Тајм“ за да ги обучи своите модели со вештачка интелигенција и да интегрира порелевантни и ажурирани информации во своите производи. Како дел од некои од овие договори, „Опен еј-ај“ исто така се согласи да им обезбеди на корисниците резимеа на вести со наведување.
„Вистински талентираниот тим на ’Опен еј-ај’ разбира дека за пребарувањето со вештачка интелигенција да биде ефективно, мора да се заснова на најквалитетни и најсигурни информации добиени од доверливи извори“, рече извршниот директор на „Њуз“, Роберт Томсон.
Додека „Опен еј-ај“ склучува договори со големи издавачи, исто така е погоден од тужби од неколку весници, вклучувајќи го и „Њујорк тајмс“, поради наводна неовластена употреба на написи заштитени со авторски права. Во исто време ривалите на „Опен еј-ај“ се соочија со притисок од нивните производи за пребарување. Издавачите се загрижени дека функциите за пребарување со вештачка интелигенција на Гугл може негативно да влијаат на сообраќајот на нивната веб-страница.
„Опен еј-ај“ наведе дека ќе им даде простор на издавачите да управуваат со тоа како се појавуваат новите функции за пребарување. Стартапот исто така наведе дека веб-локациите можат да изберат да се појавуваат во резултатите од пребарувањето дури и ако се откажат од тоа нивната содржина да се користи за обука на моделите на „Опен еј-ај“.
