Трендови на пазарот на труд: Вложувањето во доедукација е најсигурна инвестиција

Често слушаме дека луѓето на одреден начин се исплашени од динамичната и молскавична промена на пазарот на труд, поточно на бараните професии и потребни вештини согласно дигиталниот напредок и вештачката интелигенција (ВИ) која создава дополнителен притисок. И да, донекаде е застрашувачко темпото на промени, но нивното прифаќање и индивидуалната способност за прилагодување и постојано учење се клучни за работникот да остане во чекор со тие промени.

Но, повеќе не станува збор само за пренасочување кон добро платени работни позиции, туку фокусот се става и на тоа кои професии нудат долгорочна стабилност и раст.

Според повеќе истражувања и анализи за очекувањата и трендовите на пазарот на труд во 2026 година, високо платените работни места повеќе не се ограничени на традиционалните области како медицина или финансии, туку технологијата, вештачката интелигенција и податоците се тие кои доминираат на листите.

Според проекциите за побарувачката и отпорноста на нарушувањата предизвикани од ВИ, меѓу најплатените професии на глобално ниво и натаму остануваат тие од областа на медицината, како анестезиолози, хирурзи, психијатри и други здравствени работници за кои дигитализацијата и ВИ веројатно никогаш нема ни да станат директна закана за нивната работна позиција, туку само помошна алатка за поголема ефикасност. Тоа што ги менува работите на пазарот на труд се професиите кои всушност придонесуваат за брзиот технолошки напредок, па стануваат сė побарани и поплатени. Тука се експертите за податоци, инженерите на ВИ и машинско учење, инженери за големи податоци, експерти во областа на заштита на податоци, сајбер и безбедност на информации, развивачи на софтвер, информатичари со фокус на развој на алгоритми од следната генерација, роботика и системи со ВИ.

Едукативните центри во Македонија држат чекор со светските трендови на пазарот на труд, па во својата понуда имаат обуки за преквалификација токму за дел од најбараните професии.

„Секојдневно сме сведоци на тоа како технологијата ги редефинира работните места и создава нови професионални патеки. Во таа насока, очекувањата за најбараните професии во 2026 година се насочени кон области кои директно се поврзани со дигиталната трансформација“, вели Филип Георгиевски, специјалист за кариера во „Семос едукација“.

Филип Георгиевски, специјалист за кариера во „Семос едукација“. Приватна архива / „Семос едукација“

 

Неговата листа најбарани професии на пазарот на труд неизбежно ги вклучува професионалците за вештачката интелигенција, како и повеќе други кои главно гравитираат околу потребите на дигитализацијата.        

Според експертите од „Семос едукација“, следната година ѕвезди на пазарот на труд ќе бидат професионалците од следните области: Вештачка интелигенција (AI) и нејзина имплементација во различни индустрии, „Data science“ и анализа на податоци, „Full stack“ веб развој, особено со „JavaScript“, Дигитален маркетинг, Графички и внатрешен дизајн, „Game development“, кој бележи растечки интерес, „Cybersecurity“ и „cloud computing“, кои се барани од компании за заштита и оптимизација на инфраструктурата.

Постојаното учење е клуч за успех во новото време

„Во динамичен свет каде знаењето брзо се менува, успехот не се темели само на формално образование, туку на способноста за постојано учење и адаптација“, вели нашиот соговорник Георгиевски, кој во разговор за „Блумберг Адрија“ сподели и неколку совети за успешна кариера:

• континуирано учење – вложувањето во доедукација е најсигурна инвестиција. Технологијата се менува брзо, а вештините мора да се освежуваат;
• флексибилност и адаптивност – успешните професионалци се оние кои умеат да се преквалификуваат и да се прилагодат на нови улоги;
• мрежа и комуникација – вмрежувањето и комуникациските вештини се клучни за напредок;
• практични вештини – работодавачите бараат конкретни, применливи знаења – токму тоа го нудат академиите со практична настава.
   

„Блумберг Адрија“ веќе пишуваше за тоа дека технолошката трансформација, за која денес сведочиме, во следните пет години ќе избрише 92 милиони работни места, а ќе создаде нови 170 милиони на глобално ниво, покажува извештајот на Светскиот економски форум, што ќе се сложите, воопшто не е наивен потрес на пазарот на труд. За турбуленциите да бидат уште поизразени, се предвидува дека до 2030 година дури 80 проценти од денешните професии ќе исчезнат или радикално ќе се променат.

Depositphotos

 

Позитивно во целата приказна е тоа што луѓето веќе станаа свесни за неопходноста за совладување нови вештини и тоа не само заради обезбедување подобро платена работна позиција, туку со крајна цел да се олесни работата користејќи ги придобивките од технологијата, а да се максимизира продуктивноста со паметно, наспроти напорно работење.

„Во последните години, сѐ повеќе луѓе се охрабруваат да направат кариерна промена, особено кога имаат јасна патека и поддршка преку обуки. Во ‘Семос Едукација’ се забележува сѐ поголем број на преквалификации, особено од административни, економски и хуманистички професии кон ИТ, дизајн, и дигитален маркетинг“, вели Георгиевски, напоменувајќи дека луѓето стануваат сė поподготвени за промени со соодветни обуки.

За кои вештини вреди да издвоите пари за да инвестирате во себе?

Освен што нуди курсеви дизајнирани за потребите на корисниците со различно ниво на познавање на компјутерска технологија, праксата на „Семос едукација“ е да ги креира и прилагодува академиите според реалните потреби на пазарот преку соработка со компаниите и институциите, организација на прилагодена обука за истите, обрнување внимание на нивните потреби и нивниот внатрешен развој.

Заклучно со третиот квартал, во овој центар за неформално образование годинава се спроведени над 350 тренинзи со повеќе од 2.700 слушатели. 

Приватна архива / „Семос едукација“

 

Искуството на „Семос едукација“ од анализата на повратните информации од компании со кои соработуваат за тоа какви профили вработуваат и какви вештини се бараат, покажува дека најбарани се креативните професии како дигитален маркетинг, графички дизајн, веб дизајн, како и специјалисти за човечки ресурси, регрутери и инженери за ВИ.          

Според искуството на наставниот кадар од „Семос едукација“, највредни за инвестирање во личен развој се следните вештини:  ВИ и машинско учење – не само за ИТ, туку и за маркетинг, финансии, дизајн; „Data literacy“ (податочна писменост) – способност за анализа и интерпретација на податоци; „Soft skills“ или т.н. меки вештини – комуникација, тимска работа, критичко размислување; Дизајн, „game development“ (развој на игри), „cloud“ (облак) технологии, „cybersecurity“ (сајбер безбедност); Дигитална писменост – основа за секоја професија.

„Работникот на иднината ќе биде тој кој знае како да ги комбинира техничките способности со креативност и адаптивност“, заклучува нашиот соговорник Георгиевски.