Линкдин, Апворк или Индид - како најбрзо до работа и квалификуван кадар?

Не толку одамна работа се наоѓаше преку огласи за вработување откако ќе пратевте кратка биографија, па дури потоа, ако одговаравте како профил, работодавецот ќе ве повикаше на разговор. Ама дигиталната ера и појавата на социјалните платформи ги одведоа работите во сосема друга насока. Некои компании веќе воопшто не објавуваат огласи за вработување, туку самостојно или користејќи хедхантинг-услуги (англ. headhunting - ловење таленти) ги пребаруваат соодветните профили работници преку специјализирани бизнис-платформи и потоа директно стапуваат во контакт со потенцијалните кандидати. Од друга страна, професионалците, и тие што имаат редовна работа, но и тие што функционираат како фриленсери на пазарот, сѐ почесто имаат креирани профили на бизнис-мрежите, истакнувајќи го своето работно искуство, како и вештините и дипломите што ги стекнале. Па така, пребарувањето конкретен профил на работник претставува многу полесна работа од аспект на тоа што работодавецот заштедува и време и енергија за читање биографии и организирање и спроведување интервјуа со многу кандидати. Исто така и тие што бараат работа се поштедуваат од бескрајно праќање биографии и одење на средби за разговор за работа. Уште еден плус е тоа што ваквиот начин на деловно поврзување ги елиминира сите географски дистанци.

Depositphotos

 

Постојат десетици бизнис-мрежи, па фокусот во овој текст го ставаме на тоа кои се најголеми и најдобри платформи за деловно поврзување и наоѓање работа односно работници. Постојат тесно насочени и специјализирани платформи, во кои гравитираат луѓе само од одредена фела, а постојат и мрежи отворени за сите профили.

Најголема деловна платформа несомнено е Линкдин (LinkedIn), која има огромна професионална мрежа од над 800 милиони члена низ светот. Оваа голема база на корисници ги зголемува шансите за наоѓање квалификувани кандидати за различни улоги низ индустриите.

Следува Индид (Indeed), која исто така има огромна база на податоци од над 150 милиони резимеа и 250 милиони посети месечно, што ја прави една од најголемите платформи за барање работа на глобално ниво. Овој обемен фонд на кандидати ја зголемува веројатноста да се најдат квалификувани кандидати за отворените позиции, како и соодветна работа за тие што бараат. Индид им овозможува на сегашните и поранешните вработени да оставаат критики и оценки за нивните искуства од работењето во компаниите. Оваа транспарентност може да им помогне на компаниите да изградат позитивен бренд на работодавец и да привлечат кандидати што се во корелација со нивните вредности и култура.

Меѓу пионерите се вбројува и Апворк (Upwork), платформата што започна пред повеќе од две децении, помагајќи им на бизнисите да најдат поголема флексибилност и поврзувајќи ги талентите со повеќе можности. Мрежата особено е атрактивна за фриленсерите и има над 18 милиони активни хонорарци од повеќе од 180 земји, како и над пет милиони клиенти (компании и организации), но само 851.000 од нив се активни за решенија за вработување преку Апворк. 

Depositphotos

 

Меѓу тие со голема база на податоци се вбројуваат уште неколку, вклучувајќи ја мрежата Кариер билдер (CareerBuilder), која исто така претставува голем базен на таленти бидејќи има над 125 милиони резимеа на кандидати од целиот свет, со приближно 150 милиони активни профили на кандидати.

Вреди да се спомене е и Гласдор (Glassdoor), деловната мрежа што привлекува над 67 милиони уникатни посетители месечно, обезбедувајќи пристап до огромен број баратели на работа во различни индустрии и улоги. Многу помала, а сепак голема е и Зип рекрутер (ZipRecruiter), со повеќе од 32 милиони активни баратели на работа во различни сектори.

Хендшејк (Handshake) е популарна платформа за барање работа дизајнирана за студенти и неодамна дипломирани студенти. Со над 15 милиони активни корисници, таа обезбедува пристап до огромен фонд на млади таленти што бараат позиции на почетно ниво, практиканти и други можности за кариера. Хендшејк им овозможува на работодавците да креираат детални профили на компанијата, прикажувајќи ги својот бренд, култура и препораки на вработените. Тоа помага да се привлечат кандидати што се усогласуваат со вредностите и визијата на организацијата, поттикнувајќи силен бренд на работодавец меѓу студентската и неодамна дипломираната заедница. Многу гиганти меѓу работодавците, како „Гугл“ (Google), „Амазон“ (Amazon) и „Голдман Сакс“ (Goldman Sachs), ја користат оваа платформа за да се поврзат со најталентираните студенти.

Велфаунд (Wellfound), поранешна Ејнџел лист (AngelList), е исто така популарна интернет-страница за вработување, но е фокусирана на стартап-екосистемот. Таа има база од над 130.000 стартапи, што обезбедува пристап до огромен број можности за работа.

Трендот за вработување и дополнителна работа преку деловните платформи дојде и кај нас

Искуството на познавачите и експертите во областа на човечки ресурси покажува дека Линкдин е меѓу најкористените бизнис-мрежи кај нас, иако особено поновите генерации се присутни на повеќе платформи. Исто така расте и бројот на компании што на овој начин ги наоѓаат потребните кадри. 

„Кога станува збор за платформите, речиси секогаш, би рекол во 99 проценти од случаите за поврзување помеѓу професионалците и работодавците, кај нас се користи Линкдин, додека за фриленсерите што се обидуваат да си најдат ангажман најактуелна е мрежата Апворк“, вели Борис Ефтимовски, коосновач и партнер во „Хедхантинг.мк“ (HeadHunting.mk), потенцирајќи дека платформата Апворк е најинтересна и за ИТ-фелата, иако професионалците од компјутерскиот свет се присутни и на други мрежи специјализирани за нивната дејност.

Борис Ефтимовски, коосновач и партнер во „Хедхантинг.мк“ Хедхантинг.мк

 

„Јас знам неколку компании, големи работодавци кај нас, што преку Линкдин ги наоѓаат потребните профили и дури се случува воопшто да не објават оглас за вработување, туку само преку платформата да стапат во контакт со потенцијалните работници. Не залудно Линкдин е најголемата мрежа за деловно поврзување во светот. И тука секако ќе ја спомнам алатката Линкдин премиум, која е одлична за таа намена“, вели Ефтимовски.

Трендот на користење на деловните мрежи во насока на пронаоѓање работници, односно работни места, одамна е започнат и кај нас, а фактот што фалат квалификувани работници придонесува голем број професионалци да работат и по две или три работи паралелно, и тоа токму преку можностите што ги нудат платформите, иако во тој дел недостига директна комуникација.

„Реално, големите платформи сѐ уште немаат директна комуникација со луѓето што бараат работа, туку сајтовите што имаат сектори за регрутирање контактираат со кандидатите“, вели Дарко Велков, основач и директор на „Вработување.ком.мк“ (Vrabotuvanje.com.mk), кој повеќе од две децении работи како посредник на пазарот на трудот.

Дарко Велков, основач и директор на „Вработување.ком.мк“ Приватна архива

 

Тој вели дека реалниот недостиг од кадар отвора можност за екстра-заработка на квалификуваните работници што сакаат и сѐ почесто работат дополнителна работа, истовремено подобрувајќи ги своите компетенции.

Тоа што постојат специјализирани деловни платформи за поврзување работници и работодавци за конкретни индустрии или сектори, според нашиот соговорник Велков, е нешто што постои единствено во големите земји, каде што бројот на работници по сектори е доволно голем за да остави простор за развој на такви мрежи.

Покрај деловните мрежи, актуелни се и генераторите на огласи за вработување

Покрај специјализираните деловни мрежи, актуелни се и пребарувачите, односно генераторите на огласи за вработување.

Симпли хајрд (SimplyHired) е еден од попознатите пребарувачи за работа што ги собира огласите за работа од различни извори, вклучувајќи страници за кариера на компании, класични огласи за работа и интернет-страници за пониски работни позиции. Оваа платформа им ги прикажува релевантните работни места на оние што бараат работа на интернет-страницата „Симпли хајрд“, преку нејзината мобилна апликација или големиот број партнерски страници. Со стотици илјади уникатни работодавци што ги објавуваат отворените работни места, „Симпли хајрд“ обезбедува огромен фонд на потенцијални кандидати во различни индустрии.

Индид и Линкдин се лидери

Несомнено е дека Индид и Линкдин се најпопуларните, односно најкористените платформи низ светот за мрежно поврзување меѓу работниците и компаниите.

Иако Индид има поголема корисничка база за активни баратели на работа, Линкдин нуди уникатни можности за вмрежување и брендирање за работодавците да се поврзат и со активни и со пасивни кандидати. Изборот зависи од специфичните цели за вработување и од целната публика.

 

 

Како работат сајтовите за работа?

Веб-страниците за работа се онлајн платформи што ги поврзуваат барателите на работа со работодавците. Работодавците, вклучувајќи ги и регрутерите, можат да објавуваат слободни работни места, а потоа потенцијалните апликанти можат да ги бараат и да аплицираат за тие работни места.

Веб-страниците за работа обично нудат низа функции за да им помогнат на работодавците да привлечат повеќе кандидати, како што се алатки за објавување, бази на податоци за биографија и системи за следење на апликантите.

Зошто регрутерите треба да користат платформи и интернет-страници за работни места?

Регрутерите треба да ги искористат овие можности за да допрат до поширок опсег на апликанти и да го насочат нивниот процес на регрутирање. Овие страници го прават објавувањето работни места за регрутерите брзо и лесно, бидејќи овозможуваат да се постигне поголем број кандидати во споредба со користењето други недигитални или онлајн методи.

Веб-страниците за работа нудат и корисни алатки за да им помогнат на работодавците да управуваат со нивниот процес на регрутирање, од проверка на кандидатите до закажување интервјуа.

Совети за објавување огласи за вработување                      

Работодавците треба да ги имаат на ум следните совети кога објавуваат огласи за работа: • Називите на работните места треба да бидат јасни и конкретно опишани за да се привлечат вистинските кандидати. • Описите на работните места треба да бидат детални, привлечни и точно да ги посочуваат одговорностите и барањата на позицијата. • Огласите за работа може да се зајакнат со релевантни клучни зборови за да им помогне да се рангираат повисоко во резултатите од пребарувањето. • Доколку е применливо, огласите за работа треба да наведат информации за локацијата за да привлечат локални кандидати. • Да се искористат предностите на алатките и функциите што ги нудат сајтовите за барање работа за да се оптимизираат напорите за регрутирање.

Веб-страниците за барање работа се од суштинско значење за работодавците, особено во денешниот пејзаж за вработување. Изборот и користењето на вистинските сајтови за барање работа овозможуваат отворените позиции да се пополнат со најдобрите таленти.

Експертите советуваат кога се објавува на страница за барање работа, да се размисли за користење бесплатни табли за работа за да се допре до поширока публика без трошоци. Пребарувачите за работа како Индид или Гласдор исто така можат да ја подобрат видливоста со привлекување релевантни кандидати.

 

Во моментов нема коментари за веста. Биди прв да коментира...

Остави коментар