Градскиот превоз тоне: Сė помалку патници во градските автобуси

Сė помалку има патници во градските и приградските автобуси. Податоците од Државниот завод за статистика (ДЗС) покажуваат дека во третото тримесечје годинава градскиот превоз опаднал за 7,4 проценти во однос на истиот период лани, а приградскиот бил намален за 10,4 отсто. Во градот во наведениот период биле превезени 4,7 милиони патници, што е за над 370.000 помалку од истиот период лани. До и од приградските населени места, пак, во третото тримесечје биле превезени 3,7 милиони патници, или за околу 425.000 помалку од пред една година.

 

 

Спротивно на тоа, се зголемува бројот на превезени патници во рамките на меѓуградскиот и меѓународниот превоз. Статистиката покажува дека во периодот јули-септември годинава меѓуградскиот превоз се зголемил за 13,2 отсто, додека меѓународниот за 2,7 проценти. Разликата кај опслужени патници во меѓуградскиот сообраќај е многу позначителна, со тоа што биле превезени 100.000 патници повеќе, додека во рамките на меѓународниот превоз во третото тримесечје годинава биле регистрирани 5.000 патници повеќе од пред една година. 

Скопје е меѓу најзагадените градови во светот, но автомобилите се неизбежни бидејќи автобуси речиси нема

Сигурна сум дека ќе се согласите со тоа дека намалените бројки за градски и приградски превоз се загрижувачки и се поставува прашањето дали луѓето не сакаат да се возат со градските автобуси или јавниот превоз нема капацитет соодветно да ги опслужува граѓаните.

Во услови на енормно загаден воздух, што стана секојдневие, особено за скопјани во последните години, зголемената фреквенција на патници во јавниот превоз наместо во возилата во зимските месеци би требало да претставува барем мало олеснување за амбиенталниот воздух. Но искуството покажува дека дури и да сакаат граѓаните да бидат посовесни и да придонесат за намалување на аерозагадувањето преку намалено користење возила, излегува дека логистички некогаш е екстремно тешко да се спроведе тоа. Ако зборуваме конкретно за главниот град, не само што возниот ред на улиците воопшто не кореспондира со објавите за маршрутите на инфотаблите (кои инаку сė почесто воопшто не работат) туку градските автобуси стануваат сė поголема реткост на скопските улици. Дополнително, освен градските автобуси, не постои друга алтернатива за јавен превоз во главниот град. Оттука, може да се заклучи дека градски автобуси користат само тие што се принудени, бидејќи иако претставува сервис за граѓаните, услугата јавен превоз не е ниту на задоволително ниво, нешто на што граѓаните секојдневно се жалат.

Лошиот јавен превоз дополнително го загадува воздухот

„Блумберг Адрија“ веќе пишуваше за тоа колку е стар возниот парк на Јавното сообраќајно претпријатие (ЈСП) и дека по улиците возат и неколку автобуси-диносауруси. Јавниот превоз во Скопје е најголем загадувач на воздухот во градот, особено во зимските месеци, а главна причина за тоа се староста на автобусите и ниските еколошки стандарди. Имено, просечната старост на автобусите во првата половина од годинава изнесувала 12,55 години, а има и такви што се постари од 30 години. Освен тоа, се намалува и бројот на исправни автобуси што му се на располагање на ЈСП за да ги опслужува скопјани. Сė почесто се случува автобус на ЈСП да остане во неисправна состојба на улиците низ градот, за што постојано известуваат медиумите, а од претпријатието нема конкретна информација дали автобусите редовно се сервисираат.

 

 

Дополнителен проблем деновиве е тоа што јавното претпријатие не располага со доволно нафта за да ја извршува дејноста.

Инаку, Град Скопје во програмата за заштита на животната средина за годинава предложи само една мерка за заштита на воздухот, односно бесплатен јавен превоз во деновите на преголема загаденост и кога се во сила мерките на Владата за заштита на населението.

Прочитајте ја тука нашата анализа за енормното загадување на амбиенталниот воздух.

Учениците и работниците доцнат, а виновници нема

ЈСП е под надлежност на Град Скопје. Но сведоци сме на секојдневно префрлање на вината на релацијата градоначалник-советници во градската куќа, а во поширокиот круг на префрлање вина во игра влегува и раководството на ЈСП, како и најголемите политички партии од власта и опозицијата.

Нефункционалноста на градскиот превоз се удира од грбот на граѓаните. Учениците доцнат на часови, а работниците на своите работни позиции. Револтот стигна дотаму што градоначалникот на општината Шуто Оризари денеска преку соопштение повика на голем сенароден протест пред просториите на Град Скопје, за да се изрази незадоволство од нефункционирањето на јавниот сообраќаен превоз. Протестот е закажан за петок, во 13.30 часот.

Автобусите почнаа да се исклучуваат, Скопје ќе остане само со 25 автобуси

Вработени во ЈСП ги информираат медиумите дека претпријатието останало целосно без нафта и поради тоа автобусите веќе почнале да се исклучуваат од сообраќај. Доставувач на нафта е „Пуцко петрол“ и, како што велат вработените во ЈСП, компанијата престанала да испорачува гориво поради заостанатите долгови. Според тоа, во сообраќај ќе останат само автобусите што користат гас, а такви има 25.

Вработено лице во ЈСП, кое побара од нас да остане анонимно за да зборува, посочи дека станува збор за големи долгови кон „Пуцко петрол“ и дека веќе нема воопшто нафта на располагање. Во меѓувреме е распишан тендер за набавка на гориво, но тоа нема да го реши целиот проблем со јавниот превоз, ниту ќе го реши проблемот со гориво веднаш. Нашиот извор вели дека директорот на ЈСП, кој инаку е привремен вршител на должност, не комуницира со вработените иако тие бараат одговори на многу прашања. Нашиот соговорник напоменува и дека вработените се соочуваат со сериозни притисоци за да не издаваат податоци и информации за состојбата во јавното претпријатие.

Текстот е ажуриран со последните информации за прекин на јавниот превоз поради недостиг од гориво и за состојбата во претпријатието.