За околу една недела истекува договорот што им овозможува на земјите од Централна Европа да купуваат руски гас преку Украина, што предизвика загриженост на пазарите. Да потсетиме дека Русија испорачува околу 15 проценти од увозните количества на гас во Европа, а иако само една третина од тој гас оди преку Украина, трговците се на штрек. Москва и Киев месецов соопштија дека тековниот договор нема да биде обновен, бидејќи Украина не сака гасот да оди преку нејзините гасоводи. Сепак, потпретседателот на руската влада Александар Новак во средата изјави дека Русија е подготвена да продолжи со испораките на гас во Европа преку неколку рути.
ПОЛИТИКА
Неколку земји во Централна Европа сè уште зависат од рускиот гас
„Русија е подготвена да продолжи со испораките на гас во Европа преку неколку рути, откако на крајот на годината ќе истече договорот за транзит на гас преку Украина“, рече Новак во интервју за државниот ТВ-канал „Русија 24“ и додаде: „На властите во Киев и Европската Унија е да се договорат за иднината на транспортот“.
Половина милион жители на Харков без греење
Да потсетиме и дека Русија во средата изврши голем ракетен напад врз енергетската инфраструктура на Украина, поради што на Божиќ според грегоријанскиот календар дојде до делумни ограничувања во снабдувањето со електрична енергија.
Украинскиот претседател Володимир Зеленски изјави дека руските сили ја нападнале неговата земја со 70 ракети, од кои, како што тврди, некои биле балистички.
Bloomberg
СУРОВИНИ
Цената на нафтата скокна поради падот на резервите
Цените на нафтата пораснаа, бидејќи кинеските мерки за поддршка на економијата би можеле да помогнат во зајакнување на побарувачката за сурова нафта. Истовремено, од Америка пристигна уште еден извештај за намалување на резервите. Така, нафтата брент се искачи на 74 долари за барел, додека ВТИ (West Texas Intermediate) е над 70 долари. Во обид да го поттикне растот, Кина им овозможи на локалните власти поголема слобода во начинот на кој ги инвестираат приходите од државните обврзници, додека властите претходно месецов ветија „умерено лабава“ монетарна политика.
КРИПТО
„Микростратеџи“ сака уште повеќе биткоини
На криптопазарот вредноста на биткоинот порасна откако компанијата „Микростратеџи“ (MicroStrategy) најави план за издавање дополнителни акции. Тоа ќе ѝ овозможи да купи уште повеќе токени. Така, биткоинот порасна за третина процентен поен на 98.747 долари. Другите криптовалути, вклучувајќи ги етер, солана и доџкоин, исто така напредуваа за 0,2 проценти, закрепнувајќи од загубите во средата.
Depositphotos
БЕРЗИ
Повеќето водечки пазари во Европа не работат ниту денеска поради божиќните празници. Од друга страна, тргувањето во САД се одвива вообичаено. Следното затворање на њујоршката берза и Nasdaq ќе биде в среда, 1 јануари, поради прославата на Нова година.
Истовремено, повеќето акции во азиско-пацифичкиот регион се во зелено, по примерот на растот на Волстрит од пред два дена. Индексот MSCI се движи кон четвртиот ден на добивки, што е најдолгата серија од септември.
Јапонските акции особено напредуваа, откако гувернерот на централната банка Казуо Уеда во средата избегна да даде какви било сигнали во врска со потенцијалното зголемување на каматните стапки. Тргувањето во Азија е релативно придушено, додека пазарите во Австралија и во Хонгконг сè уште се затворени поради божиќните празници.
.webp){kind=icon}
Во моментов нема коментари за веста. Биди прв да коментира...