text size
Пожарите во Лос Анџелес не се смируваат, нафтата продолжува да поскапува, а инвестициските банки од Волстрит се подготвуваат да исплатат големи бонуси. Еве кои светски вести го одбележаа утрото.
БИЗНИС
ЏП Морган ги зголемува бонусите за 15 проценти
Водечките инвестициски банки од Волстрит планираат да доделат најголеми бонуси на трговците од почетокот на пандемијата, до 10 проценти или повеќе, според добро информирани извори. Зголемувањата доаѓаат по двегодишно намалување на бонусите во целата индустрија, бидејќи инвестициските банки се бореа да го одржат тргувањето и да продолжат со склучување зделки за време на врвот на пандемијата на коронавирус.
СВЕТ
Седум жртви во пожарите во Лос Анџелес
Пожарникарите сè уште се борат со пожарите низ Лос Анџелес. Дополнителни евакуации беа наредени вчера поради уште еден пожар што избувна попладне во населбата Хиден Хилс. Предупредувањето за евакуација, кое беше само за жителите во таа област, по грешка беше испратено на мобилните телефони на 10 милиони луѓе, а потоа брзо повлечено, што ја зголеми конфузијата и тензиите.
Во пожарите низ Лос Анџелес досега загинаа најмалку седум луѓе, околу 180.000 жители се евакуирани, а цели населби се претворени во пепел. Економската штета, според „Аку Ведер“ (AccuWeather Inc.), е проценета на 135 до 150 милијарди долари, што би се вброило меѓу најскапите природни катастрофи во историјата на Америка.
Бајден: Федерална помош за Калифорнија
Американскиот претседател во заминување, Џо Бајден, најави зголемување на федералната помош за Калифорнија за справување со последиците од шумските пожари. Бајден го повика гувернерот на Калифорнија, Гавин Њусом, да не штеди средства во борбата против смртоносната огнена стихија.
БЕРЗИ
Европа
Фјучерсите на европските акции утрово се во зелено. Европските берзи и вчерашното тргување го завршија со добивки, при што растот на акциите на рударскиот сектор го неутрализира падот во малопродажниот сектор.
САД
Истовремено, фјучерсите на американските индекси бележат мешани резултати. Американските берзи вчера беа затворени поради националниот ден на жалост по повод смртта на поранешниот американски претседател Џими Картер.
Depositphotos
Азија
Акциите во азиско-пацифичкиот регион се во црвено, при што референтниот индекс MSCI е во пад трет ден по ред. Истовремено, приносите на кинеските обврзници пораснаа, откако Народната банка на Кина соопшти дека привремено ќе го прекине купувањето на државни обврзници.
Нафта
Нафтата се движи кон третото неделно зголемување, што би било најдобрата победничка серија од јули. На тоа влијае затегнатоста на пазарот, вклучувајќи го и падот на американските резерви, а од друга страна тука е и загриженоста поради слабата побарувачка во најголемиот увозник на нафта - Кина.
ICE, Bloomberg
Брент се искачи над 77 долари за барел и е поскап за околу еден процент оваа недела, додека ВТИ (West Texas Intermediate) беше близу 74 долари. Резервите на сурова нафта во центарот Кушинг, Оклахома, паднаа на најниско ниво од 2014 година. Инфлацијата во Кина се приближи до нула, што го потенцира предизвикот со кој се соочуваат властите во зајакнувањето на тамошната економија.
.webp){kind=icon}
