Санкциите кон Русија станаа тема за која постојано се зборува, а Европа сега размислува за нов потег во таа насока. Во Јужна Кореја се случи политички преседан, а најбогатиот човек на светот се најде под истрага на регулаторите во САД.
ПОЛИТИКА
Забрана за увоз на руски алуминиум и ЛНГ?
Европската Унија размислува за ограничувања на увозот на руски алуминиум и течен природен гас (ЛНГ), како дел од новиот пакет санкции кон Русија поради војната во Украина. Тоа го тврдат извори запознаени со ситуацијата. Нацртот на најновите мерки, кои се дел од 16-от пакет санкции, предвидува и ограничувања за десетици пловила што се дел од руската „флота на танкери во сенка“, наведува „Блумберг“. Ограничувањата за алуминиум ќе се воведуваат постепено, а временската рамка и нивниот обем допрва треба да се утврдат, наведуваат добро информирани извори.
Уапсен суспендираниот јужнокорејски претседател
Јужнокорејските истражители го уапсија претседателот на земјата Јун Сук Јеол, откако претходно се обидоа да го приведат лидерот поради неговото краткотрајно прогласување вонредна состојба минатиот месец. Претставниците на Канцеларијата за истражување на корупцијата го уапсија Јун откако повеќепати избегнуваше повик да се појави на сослушување. Ова е првпат претседател за време на мандатот да биде уапсен во Јужна Кореја.
БИЗНИС
Маск под истрага на американскиот регулатор
Американската комисија за хартии од вредност (SEC) го тужеше Илон Маск затоа што ненавремено, односно во законски предвидениот рок, открил дека купил значителен удел во Твитер. Тоа, како што се наведува во тужбата, му овозможило на Маск да го купи Твитер за 150 милиони долари помалку отколку што би било вообичаено.
„Мета“ отпушта пет проценти од работната сила
Компанијата „Мета“ (Meta Platforms) ќе отпушти околу пет проценти од своите вработени, во обид брзо да го намали бројот на работници со послаби перформанси. „Мета“ моментално вработува околу 72.000 луѓе низ светот, а најавеното намалување би можело да погоди околу 3.600 работни места. Се очекува дека вработените во Америка ќе бидат известени за отпуштањата на 10 февруари, додека оние со седиште во други земји ќе бидат дополнително известени, се наведува во интерен допис испратен до сите вработени.
БЕРЗИ
Европа
Фјучерсите на европските акции се во зелено, пред објавувањето на податоците за индустриското производство во еврозоната. Потсетуваме, европските пазари вчерашното тргување го завршија со загуби, додека светските инвеститори продолжија да го анализираат ладењето на производствените цени во Америка.
САД
И фјучерсите на американските индекси се во плус, пред објавувањето на најновиот извештај за инфлацијата, кој ќе ја трасира политиката на Федералните резерви (Фед) во однос на олабавувањето на монетарната политика.
Економистите очекуваат дека декемврискиот извештај за потрошувачките цени ќе укаже на петти месец на забрзување на инфлацијата, што ќе ги зголеми шансите за продолжена пауза во намалувањето на каматните стапки. Така се предвидува дека основниот индекс на потрошувачките цени, кој ги исклучува трошоците за храна и енергија, ќе порасне за 0,3 проценти во декември на месечно ниво, додека растот на вкупниот индекс на потрошувачките цени ќе изнесува 0,4 проценти.
Азија
Кога станува збор за акциите во азиско-пацифичкиот регион, со нив се тргува мешано. Индексот MSCI избриша најголем дел од добивките, додека главните индекси во Хонгконг, Јужна Кореја и во Јапонија пораснаа за помалку од 0,5 проценти.
Нафта
Цената на нафтата закрепна по најголемиот пад во повеќе од еден месец, бидејќи влијанието на американските санкции врз руските текови на тој енергент продолжи да одекнува, а извештајот на индустријата укажува на намалување на резервите во САД.
Брентот порасна над 80 долари за барел откако во вторникот загуби 1,4 проценти од вредноста поради очекувањата за прекин на огнот меѓу Израел и Хамас. ВТИ (West Texas Intermediate) беше близу 78 долари.
ICE, US Dept. of Energy
Американскиот институт за нафта соопшти дека резервите на сурова нафта паднале за 2,6 милиони барели минатата недела, според документот во кој „Блумберг“ имал увид. Ова би бил осми последователен пад, доколку тоа го потврдат официјалните податоци.
.webp){kind=icon}