Доналд Трамп смета дека Тикток сепак не е толку голема закана за безбедноста на САД и дека електронските производи од Кина можат да бидат многу поопасни. Светскиот економски форум сè уште трае, а денеска на учесниците преку видеоврска ќе им се обрати и американскиот претседател. Во Лос Анџелес повторно избувнаа пожари, а властите наредија итна евакуација.
ПОЛИТИКА
Доналд Трамп се огласи за Тикток
Американскиот претседател Доналд Трамп ја доведе во прашање заканата што наводно ја претставува Тикток (TikTok) за националната безбедност на Америка, само неколку дена откако го одложи спроведувањето на законот што можеше да ја забрани таа социјална мрежа. „Дали на Кина толку ѝ е важно да шпионира млади луѓе, деца и да гледа луди видеа?“, праша Трамп во интервју за „Фокс њуз“. Тој исто така посочи дека сите електронски производи што се произведени во Кина можат да носат ризик од шпионирање и дека Тикток не е најопасен.
Клучен настан во Давос – обраќањето на американскиот претседател
Во Давос продолжува Светскиот економски форум, каде што клучниот настан денеска ќе биде обраќањето на американскиот претседател Доналд Трамп. Тој треба да им се обрати на учесниците преку видеоврска во попладневните часови. Светот внимателно ќе ги следи сите детали од неговиот говор за клучните геополитички и економски прашања – како што се војната во Украина, иднината на израелско-палестинските односи и економското ривалство на Америка со Кина.
СВЕТ
Нов пожар во областa Лос Анџелес
Во северниот дел од Лос Анџелес избувна нов шумски пожар, поради што беше наредена итна евакуација на населението. Пожарот Хјуз избувна во средата наутро во близина на езерото Кастаик и брзо се прошири на повеќе од 9.000 хектари. Во пожарите во Лос Анџелес досега загинаа најмалку 28 лица, а изгореа речиси 15.000 објекти.
БИЗНИС
Маск го критикува проектот „Старгејт“
Само неколку часа откако американскиот претседател Доналд Трамп најави голема инвестиција во развојот на вештачката интелигенција, овој проект се соочи со скептицизам од еден од неговите најблиски сојузници – Илон Маск. „Тие всушност немаат пари“, напиша Маск на својата платформа X. Потсетуваме, три водечки технолошки компании – „Опен еј-ај“ (OpenAI), „Софтбанк“ (SoftBank) и „Оркл“ (Oracle) – објавија дека ќе формираат нова компанија наречена „Старгејт“ (Stargate) за развој на вештачка интелигенција во САД, со инвестиции вредни до 500 милијарди долари.
БЕРЗИ
Европа
Тргувањето со фјучерси на европските акции утрово е мешано, пред објавувањето на податоците за довербата на потрошувачите во еврозоната. Потсетуваме, европските берзи вчерашното тргување го завршија со добивки, при што германскиот индекс DAX достигна нов рекорд.
САД
И фјучерсите на американските индекси варираат меѓу добивки и загуби. Индексот S&P 500 во средата се приближи до рекордни нивоа, по најавата на Трамп за зголемена потрошувачка за вештачка интелигенција.
Азија
Акциите во азиско-пацифичкиот регион претежно се во зелено, откако кинеските власти ги уверија инвеститорите во посветеноста на владата за поддршка на капиталните пазари.
НАФТА
Цената на нафтата падна. Брентот се тргуваше под 79 долари за барел, додека ВТИ (West Texas Intermediate) беше близу 75 долари. Резервите минатата недела се зголемиле за еден милион барели, извести Американскиот институт за нафта.
Резервите на сурова нафта во САД обично се намалуваат кон крајот на календарската година од даночни причини. Бројките на владата треба да бидат објавени во текот на денот.
Bloomberg Mercury
.webp){kind=icon}
