Кинескиот стартап „Дипсик“ (DeepSeek) направи голем метеж на глобалниот пазар за вештачка интелигенција (ВИ) со лансирање ефикасен и многу достапен модел, со што „им се закани“ на американските ривали. Изгледа дека немаше друга опција освен најголемите играчи да реагираат. Иако директорот на „Опен еј-ај“ (OpenAI), Сем Алтман, во вторникот го поздрави „Дипсик“ и најави нови производи, приказната не завршува тука. Американските конкуренти нема да се предадат толку лесно.
ЕКОНОМИЈА
Фед ги задржува каматите?
Ова е денот на одлука за Фед. Се очекува дека официјалните лица, по завршувањето на состанокот в среда, ќе ги задржат стабилни трошоците за задолжување, во светло на здравата побарувачка и упорната инфлација. Тоа значи дека каматите ќе останат во опсегот од 4,25 до 4,50 проценти.
Сепак, трговците со обврзници ги зголемија облозите за мартовско намалување на каматните стапки, а останува отворено и прашањето како новите мерки на американскиот претседател Доналд Трамп ќе влијаат на понатамошниот правец на монетарната политика на Фед.
Аналитичарите на „Блумберг Адрија“ исто така очекуваат дека Фед речиси сигурно ќе паузира, откако минатата година ги намали каматите за 100 базични поени. Сепак, тие велат дека најважното прашање е со кој тон ќе се обратат официјалните лица во контекст на најавите за 2025 година.
КОМПАНИИ
Не престанува да се зборува за кинескиот пробив во областа на вештачката интелигенција - толку многу што компаниите „Мајкрософт“ (Microsoft) и „Опен еј-ај“ започнаа истрага. Тие сакаат да утврдат дали група поврзана со кинескиот стартап „Дипсик“ на неовластен начин набавила податоци што му припаѓаат на „Опен еј-ај“.
Имено, вработените во „Мајкрософт“, задолжени за безбедност, есенва регистрирале поединци за кои веруваат дека би можеле да бидат поврзани со „Дипсик“. Кинеската компанија, наводно, ексфилтрирала големо количество податоци користејќи го интерфејсот на „Опен еј-ај“ за програмирање апликации, тврдат извори запознаени со ситуацијата.
Да потсетиме, „Дипсик“ ја намали дури и пазарната вредност на „Енвидија“ (Nvidia), најдоминантната компанија за производство на чипови во светот. Акциите на „Енвидија“ во понеделникот паднаа за 17 проценти, што беше најголемиот пад на американскиот пазар на акции тој ден.
БЕРЗИ
Европа
Фјучерсите на европските акции се тргуваат мешано, пред одлуката на Европската централна банка (ЕЦБ) за каматните стапки в четврток. Трговците очекуваат дека неделава и во март ќе се случат најмалку уште две последователни намалувања на каматната стапка на депозити, и тоа од сегашното ниво од три проценти.
САД
И фјучерсите на американските акции се тргуваат мешано, пред одлуката на Фед за каматните стапки. Економистите не очекуваат дека на седницата в среда ќе има намалување на каматните стапки, бидејќи американската економија е силна, а инфлацијата сè уште покажува упорност. Аналитичарите на „Блумберг Адрија“ тврдат и дека тежиштето на вниманието ќе биде на наративот на претседателот Џером Пауел, од кого се очекуваат нешто поконкретни најави за тоа дали паузата на Фед ќе биде продолжена.
Азија
Кога станува збор за акциите во азиско-пацифичкиот регион, тие се тргуваат со добивки, по примерот на Волстрит. Индексите во Јапонија, Австралија и во Индија регистрираат раст, додека другите азиски пазари се затворени поради лунарната Нова година, која се одбележува в среда, 29 јануари.
.webp){kind=icon}
