text size
Царините на Трамп за увоз на челик и алуминиум стапија во сила, а Европската Унија веднаш реагираше и најави дека ќе воведе контрацарини на американска стока во вредност од 26 милијарди долари. Украина го прифати американскиот предлог за едномесечно примирје во војната со Русија, САД ќе го пренесат предлогот на Русија и ќе бараат нејзино одобрување. Фјучерсите на европските акции утрово се тргуваат мешано.
ЕКОНОМИЈА
Стапија во сила царините на Трамп за челик и за алуминиум
Најновите царини на американскиот претседател Доналд Трамп за увоз на челик и на алуминиум денеска стапија во сила, со што САД ја проширија трговската војна против водечките трговски партнери. Потсетуваме дека Трамп минатиот месец го најави планот за воведување царини од 25 проценти на овие метали и дека не беа одобрени никакви исклучоци. Царините ќе важат за сите земји во светот, како за економските ривали така и за блиските сојузници на САД, како што се Австралија, Европската Унија, Јужна Кореја и Јапонија. Веднаш по воведувањето на царините, цената на алуминиумот на Лондонската берза на метали порасна за 0,3 проценти, додека топловаланиот челичен котур порасна за 0,4 проценти на Шангајската берза.
ЕУ воведува контрацарини
Европската Унија веднаш реагираше по повод царините на Трамп и најави дека ќе воведе контрамерки од следниот месец, и тоа на американска стока во вредност од 26 милијарди евра. Тоа се наведува во соопштението на Европската комисија. Во соопштението се додава и дека ќе се спроведат брзи и пропорционални мерки.
„Европската Унија мора да дејствува за да ги заштити потрошувачите и бизнисот“, наведе претседателката на Европската комисија, Урсула фон дер Лајен, во соопштението. „Противмерките што ги преземаме се силни, но пропорционални“.
ПОЛИТИКА
Украина прифати примирје
Украина го прифати американскиот предлог за едномесечно примирје во војната со Русија, како дел од договорот со администрацијата на Трамп. Од друга страна, САД ќе ја прекинат паузата во обезбедувањето разузнавачка и безбедносна помош на Украина, соопштија официјални лица од двете земји по состанокот во Саудиска Арабија. САД сега ќе ѝ го пренесат тој предлог на Русија, за да побараат нејзино одобрување, рече за новинарите во Џеда американскиот советник за национална безбедност Мајк Волц, по осумчасовните преговори. А еве што изјави американскиот државен секретар Марко Рубио.
По повод договорот се огласи и американскиот претседател Доналд Трамп, кој вели дека се надева дека и рускиот претседател Владимир Путин ќе го прифати предложениот план за примирје.
БЕРЗИ
Европа
Следува преглед на состојбата на глобалните пазари на акции, кои делумно се стабилизираа по распродажбата од почетокот на неделата. Имено, фјучерсите на европските акции утрово се тргуваат мешано. Потсетуваме, европските берзи го завршија тргувањето во вторникот со загуби, поради глобалната неизвесност од американските царини. Така, паневропскиот индекс STOXX 600 ослабе дури за 1,7 проценти.
САД
И фјучерсите на американските индекси утрово се колебаат меѓу добивки и загуби, пред објавувањето на податоците за инфлацијата. Економистите на „Блумберг“ очекуваат дека инфлацијата, на годишно ниво, во февруари забавила на 2,9 проценти во однос на три проценти од јануари. Потсетуваме дека американските берзи го завршија вчерашното тргување со добивки, откако американскиот претседател Доналд Трамп порача дека не очекува рецесија во Америка. Тоа, како што оценува „Блумберг“, го намали стравот што претходно го преплави Волстрит поради трговската војна на Трамп.
Прочитајте повеќе: Изјавите на Трамп ги смируваат инвеститорите и го ублажуваат падот на берзите
Царинската политика на Трамп, геополитичкото престројување во врска со Украина и упорната инфлација негативно влијаеја на пазарите на капитал годинава, поради што американските акции се најдоа на работ на корекција. И индексот на волатилност, познат и како индекс на страв на Волстрит, моментално се наоѓа близу најголемата вредност од август, бидејќи трговците сè уште се нервозни поради економскиот раст на САД.
Азија
Кога станува збор за акциите во азиско-пацифичкиот регион, тие се тргуваат претежно во зелено, додека единствено индексите во Хонгконг бележат пад.
НАФТА
Нафтата ги зголеми добивките бидејќи САД ја намалија прогнозата за глобалната прекумерна понуда, по слични потези на други набљудувачи на пазарот, вклучувајќи ја и Меѓународната агенција за енергија. Брентот се тргуваше на околу 70 долари за барел по скромната добивка во вторникот, додека ВТИ (West Texas Intermediate) се приближи до 67 долари. Управата за информации за енергија ја намали својата прогноза за суфицит за годинава и ги преполови изгледите за заситеност во 2026 година, наведувајќи можност за намалени текови од Иран и од Венецуела.
Bloomberg
.webp){kind=icon}
