text size
Трамп во средата доцна навечер по европско време потпиша наредба со која се воведуваат царини од 25 проценти на увозот на автомобили, со што американскиот претседател дополнително ги заостри меѓународните трговски односи. Неговата идеја е да „донесе повеќе работни места во САД“, извести „Блумберг“.
ПОЛИТИКА
Удар за веќе ослабениот сектор
Царините од 25 проценти на увозот на автомобили, кои ќе стапат во сила на 3 април и ќе се применуваат на сите автомобили што не се произведуваат во САД, би можеле да донесат 100 милијарди долари нови годишни приходи за буџетот на САД, според процената на Белата куќа. Трамп ги нарече овие мерки „трајни“ и порача дека не е заинтересиран за преговори за исклучоци. Неговите изјави моментално предизвикаа пад на акциите на „Џенерал моторс“ (General Motors), „Форд“ (Ford) и „Стелантис“ (Stellantis).
Трамп исто така навести дека ќе воведе дополнителни царини за Европската Унија и за Канада, доколку заедно, како што вели, работат „на нанесување економска штета“ на САД.
Самит на европските лидери за Украина
Европските лидери се собираат денеска во Париз за да разговараат за нивната улога во преговорите за прекин на огнот во Украина. Досега американскиот претседател ја држеше Европа настрана, во обид да ги забрза преговорите со Украина и со Русија. Истовремено, на Европа постепено ѝ се намалува времето за да ги потврди своите приоритети.
Пред самитот, францускиот претседател Емануел Макрон најави нов пакет воена помош за Киев од две милијарди евра и порача дека лидерите ќе се позанимаваат со тоа како да ја зајакнат украинската војска.
БИЗНИС
„Опен еј-ај“ собира 40 милијарди долари од инвеститори
На корпоративен план, компанијата „Опен еј-ај“ (OpenAI) е блиску до финализирање на рундата финансирање од 40 милијарди долари предводена од „Софтбанк“ (SoftBank Group) со учество на други инвеститори. Со оваа рунда финансирање, вредноста на компанијата би достигнала дури 300 милијарди долари, што е речиси двојно повеќе во однос на претходната процена од 157 милијарди долари.
БЕРЗИ
Европа
Фјучерсите на европските акции утрово се тргуваат претежно со загуби, продолжувајќи го надолниот тренд од претходниот ден. Потсетуваме, паневропскиот индекс Europe Stoxx 600 вчера ослабе за 0,7 проценти. Истовремено, акциите на автомобилските компании паднаа за 2,6 проценти, пред воведувањето на американските царини на увоз на автомобили, во висина од 25 проценти.
САД
Од другата страна на Атлантикот, фјучерсите на американските индекси се тргуваат претежно во зелено, додека доларот ослабе во однос на кошницата на водечките светски валути. Освен што американскиот претседател потпиша наредба за воведување царини на сите автомобили што не се произведени во САД, исто така порача дека ќе размисли за ублажување на царините кон Кина доколку Пекинг ја одобри продажбата на Тикток (TikTok) на некоја американска компанија.
Влијанието на царините го коментираше и претседателот на Фед во Сент Луис, Алберто Мусалем. Тој предупреди дека секундарните ефекти од тарифите би можеле да ги поттикнат официјалните лица да ги задржат каматните стапки на стабилно ниво подолго време.
Азија
Царините на Трамп негативно влијаеја и на капиталните пазари во азиско-пацифичкиот регион. Индексите во Јапонија, Јужна Кореја и во Австралија паднаа, додека само акциите во Хонгконг и во Индија регистрираа раст. Сепак, да потсетиме дека Трамп неодамна се насочи токму кон Индија, кажувајќи дека таа држава нема да ги избегне царините на 2 април.
„Индија е една од земјите со највисоки царини во светот“, рече Трамп во интервју за конзервативниот медиум „Брејтбарт њуз“ (Breitbart News). „Верувам дека веројатно значително ќе ги намали тие царини, но на 2 април ќе им наплатиме исти царини што тие нам ни ги наплаќаат“.
.webp){kind=icon}
