Американскиот претседател Доналд Трамп ја повика Кина да достави предлог за да започнат преговори за решавање на трговските тензии меѓу двете најголеми светски економии. На корпоративен план, акциите на „Енвидија“ (Nvidia) паднаа за повеќе од шест проценти во електронското тргување.
ПОЛИТИКА
Трамп: Топката е кај Кина
„Топката е во кинескиот двор. Кина мора да склучи договор со нас. Ние не мора да склучиме договор со нив“, се наведува во изјавата на Трамп што ја прочита портпаролката на Белата куќа, Каролин Левит. Таквата изјава доаѓа откако Кина им нареди на своите авиокомпании да го прекинат приемот на нови авиони од „Боинг“ (Boeing), како одговор на одлуката на САД да воведат царини од дури 145 проценти на кинеската стока.
Ограничувања за извоз на чипови од „Енвидија“
На корпоративен план, акциите на „Енвидија“ паднаа за повеќе од шест проценти во електронското тргување, откако беше соопштено дека американската влада ќе почне да бара лиценца за извоз на чиповите Х20 (H20) на „Енвидија“ во Кина. Од компанијата предупредуваат дека трошоците поврзани со овие ограничувања ќе достигнат приближно 5,5 милијарди долари во првиот фискален квартал, кој завршува на 27 април.
ЕКОНОМИЈА
Раст на кинеската економија од 5,4 проценти
Кинеската економија порасна со побрзо темпо од очекуваното во првите три месеци од годинава. Така, бруто-домашниот производ порасна за 5,4 проценти во првиот квартал на годишно ниво, што е подобро во однос на растот од 5,2 проценти, колку што проценуваа економистите анкетирани од „Блумберг“ (Bloomberg).
БЕРЗИ
Европа
Фјучерсите на европските акции утрово се тргуваат во црвено, пред утрешната одлука на Европската централна банка (ЕЦБ) за каматните стапки. Од последната седница на ЕЦБ во март, американскиот претседател Доналд Трамп ја разниша глобалната трговија, предизвикувајќи нестабилност на финансиските пазари. Сепак, официјалните лица на ЕЦБ, како што се очекува, ќе останат на досегашниот курс, поради што утре речиси сигурно ќе ја намалат каматната стапка на депозити за четвртина процентен поен, на 2,25 проценти.
САД
И фјучерсите на американските индекси се тргуваат со загуби, откако Трамп се закани дека ќе воведе царини на увозот на клучни минерали. Истовремено, доларот избриша дел од добивките што ги оствари во текот на вчерашниот ден. А од брокерската куќа ССГМ (State Street Global Markets) порачуваат дека американската економија сепак на крајот ќе избегне рецесија, иако економскиот раст ќе биде значително под трендот.
Азија
Акциите во азиско-пацифичкиот регион главно се во пад, при што акциите на кинеските технолошки компании предводат по загубите. Акциите во континентална Кина и Хонгконг продолжија да бележат загуби, иако беше соопштено дека кинеската економија пораснала побрзо од очекуваното во првите три месеци од годинава.
НАФТА
Нафтата се стабилизира по малиот пад во вторникот, додека очекувањата за вишок понуда и трговската војна меѓу двете најголеми светски економии влијаеја на прогнозите за побарувачката.
Нафтата брент се тргуваше под 65 долари за барел по пад од 0,3 проценти во претходната сесија, додека американската ВТИ (West Texas Intermediate) се движеше околу 61 долар. Меѓународната агенција за енергија (ИЕА) ги намали своите прогнози за глобалната потрошувачка на нафта за оваа и следната година поради растечките трговски тензии. Новата понуда веројатно ќе биде повеќе од доволна за да ја задоволи побарувачката, се наведува во месечниот извештај.
.webp){kind=icon}
