Накратко од светот: Убиени претставници на израелската амбасада во Вашингтон

Притисоците врз членките на Групата 7 (Г7) за прифаќање на ограничувањето на цената на руската нафта се зголемуваат, додека Европската Унија (ЕУ) изнесува нови предлози за подобрување на трговската соработка со САД. Утрово светот го обиколи и веста дека двајца вработени во израелската амбасада во Вашингтон се убиени во пукање во средата.

ПОЛИТИКА

Г7 подготвува ново ограничување на цената на нафтата

Обединетото Кралство го засили притисокот врз своите сојузници од Групата 7 да се согласат со ограничувањето на цената на руската нафта, објаснувајќи дека потегот е неопходен за да се зголеми притисокот врз рускиот претседател Владимир Путин. „Притисокот врз Русија ни е потребен повеќе од кога било“, соопшти британското Министерство за финансии по состанокот во Украина.

Да потсетиме, земјите на Г7, кои ги вклучуваат Обединетото Кралство, САД, Германија, Франција, Италија, Канада и Јапонија, веќе некое време ги разгледуваат опциите за дополнително отежнување на можностите на Москва да ја финансира војната во Украина, а моменталното ограничување на цената изнесува 60 долари за барел.

Убиени двајца членови на израелската амбасада во Вашингтон

Двајца членови на израелската амбасада во Вашингтон се убиени синоќа, кога маж пукал врз нив пред Еврејскиот музеј, соопшти американската министерка за внатрешна безбедност Кристи Ноем. Осомничениот е притворен, а според шефицата на полицијата Памела Смит, тој за време на притворањето извикувал „Слободна Палестина“.

Илустрација: Depositphotos

Жртвите во моментот на нападот присуствувале на свечен настан на Американскиот еврејски комитет, а израелскиот амбасадор во САД, Дани Денон, го оцени нападот како „преминување на црвената линија“. Нападот го осудија претставници и на републиканците и на демократите.

Катарскиот подарок станува нов претседателски авион

Американското Министерство за одбрана формално го прифати луксузниот џамбоџет „боинг 747-8“ (Boeing 747-8) како подарок од Катар, а авионот ќе служи како привремен нов „ер форс уан“ (Air Force One) за претседателот Доналд Трамп. Станува збор за еден од најскапите подароци во историјата на американската влада, со кој наедно е исполнета желбата на Трамп за нов претседателски авион, по години одложувања на договорот со „Боинг“ за испорака на ново летало.

ЕКОНОМИЈА

ЕУ го ревидира потенцијалниот трговски договор со САД

Европската Унија предложи ревидиран трговски договор со САД во обид да го искористи замавот во преговорите со претседателот Трамп и да се справи со скептицизмот за потпишувањето на трансатлантскиот договор, велат за „Блумберг“ добро информирани извори.

Bloomberg

Новиот предлог-договор вклучува точки што би ги земале предвид американските интереси, кои се однесуваат на меѓународните работнички права, стандардите за заштита на животната средина, економската безбедност и постепено заемно укинување на царините за одредени земјоделски и индустриски производи. Да потсетиме, Брисел ја одложи на 90 дена примената на дел од царините на американскиот увоз, откако Трамп ги намали царините на најголемиот дел од европскиот увоз од 20 на 10 отсто.

БЕРЗИ

Европа

Европските фјучерси утринава се во минус, откако вчерашното тргување заврши мешано, со стагнација на клучните индекси – единствен исклучок беше германскиот DAX, кој порасна за околу третина процент.

Еврото е во мал пораст во однос на доларот, додека обврзниците се стабилни, со мал пораст на десетгодишниот принос на референтните германски обврзници на 2,64 отсто.

 

САД

Фјучерсите на Волстрит се во пораст, по драматичниот крај на тргувањето кога S&P 500 забележа пад од над 1,5 отсто. Обврзниците исто така се под притисок, со приносите на триесетгодишните обврзници, кои пораснаа над пет отсто, блиску до највисокото ниво во последните две децении. Истовремено, доларот ослабе, а извршниот директор на „ЏП Морган“ (JP Morgan Chase), Џејми Дајмон, предупреди дека постои шанса американската економија да западне во стагфлација.

 

Цената на нафтата се стабилизира по вчерашниот скок поттикнат од вестите за можна воена интервенција на Израел во Иран, па брентот се тргува за речиси 65 долари за барел, додека ВТИ (West Texas) е над 61 долар.

Биткоин

Биткоинот бележи нов рекорд, надминувајќи ја вредноста од 111.000 долари за првпат во својата историја. Неговата цена утрово порасна за 3,3 отсто, на 111.878 долари, а во пораст се и другите криптовалути, вклучувајќи го и етерот, кој скокна за околу 5,5 отсто.

 

Овој скок го поттикна бран на оптимизам по веста дека напредува предлог-законот во САД за стабилни криптовалути, со што криптоиндустријата би добила дополнителни правни гаранции во рамките на најголемата светска економија.

Азија

Азиските акции утринава се во минус, со пад на клучните индекси во континентална Кина, Хонгконг и Јапонија.

Bloomberg

Во продолжение на сезоната на квартални извештаи, од групацијата „Леново“ (Lenovo) пристигнуваат оптимистички прогнози. Компанијата забележала четврти квартал по ред со двоцифрен раст на приходите, што го одразува растечкото побарување за персонални компјутери, како и за сервери на ВИ (вештачка интелигенција) . Продажбата скокнала за 23 отсто, на 17 милијарди долари. Сепак, нето-приходот паднал дури за 64 отсто, на 90 милиони долари, укажувајќи на загуби од дериватни договори и ценовни притисоци на пазарот за персонални компјутери.

Во моментов нема коментари за веста. Биди прв да коментира...

Остави коментар