Епстајн плаќал по 12.000 долари месечно за неговите злодела да „исчезнат“ од интернет

Сексуалниот престапник Џефри Епстајн со години ангажирал компании за менаџирање на онлајн репутацијата во обид да ја потисне негативната медиумска кампања поврзана со неговата пресуда од 2008 година за сексуални злоупотреби, покажуваат стотици страници електронска преписка и документи објавени од американското Министерство за правда. Според содржината на документите, фирмите нуделе детални стратегии вредни и до 12.500 долари месечно, со цел да се намали видливоста на текстови што го потенцираат неговиот статус како регистриран сексуален престапник и истовремено да се зголеми присуството на позитивни содржини за неговата филантропија и научни интереси.

Во електронска порака од 2010 година Епстајн нагласува дека ништо не му е поважно од ангажирање компанија што ќе ја „преработи“ неговата страница на Википедија и ќе ги реши, како што ги нарекол, неговите „Гугл-проблеми“, алудирајќи на резултатите што се појавувале при пребарувањето на неговото име. Документите откриваат дека дел од стратегијата вклучувал создавање нови веб-страници и блогови, објавување соопштенија и статии со позитивен тон, како и технички оптимизации со цел негативните вести да се потиснат од првите страници на пребарувачите.

Централна улога во овие активности имал Ал Секел, експерт за оптички илузии и зет на долгогодишната соработничка на Епстајн, Гислејн Максвел. Секел, кој починал во 2015 година, во комуникација со потенцијални изведувачи ја дефинирал целта како создавање „многу позитивно, хуманитарно и успешно присуство“ на интернет, признавајќи дека критичарите не можат да бидат замолчени, но дека може да им се остави „малку материјал“ за понатамошни напади. Во рамките на предложените тактики се споменува и ангажирање тимови од странство што континуирано би препишувале и поврзувале содржини за да влијаат врз рангирањето на резултатите, како и промовирање страници на други лица со исто име со цел да се разводни поврзаноста со пресудата.

Википедија, поради високото рангирање во пребарувачите, била едно од главните бојни полиња. Според преписката, биле правени обиди да се ублажи јазикот со кој се опишуваат делата, но уредниците волонтери често ги поништувале измените во рок од неколку минути. Јавните записи покажуваат зголемена активност на страницата во тој период, при што некои уредници биле блокирани поради прекумерно позитивно формулирање.

Меѓу компаниите што понудиле услуги била и РП (Reputation Changer) од Пенсилванија, која подоцна се ребрендирала во „Бренд.ком“ (Brand.com), а која се обврзала дека ќе ги „преплави“ пребарувачите со нови содржини што ќе доминираат на првите четири страници од резултатите. Според една од електронските пораки, во рок од еден месец фирмата успеала да ги потисне повеќето негативни статии од првата страница на пребарувањето. Сепак, не сите фирми биле подготвени да соработуваат. „Репутејшн“ (Reputation.com) по прелиминарни разговори одлучила дека не може да го претставува поради неговото минато, а и други компании одбиле ангажман наведувајќи етички причини.

Документите ја разоткриваат комплексната и често нетранспарентна индустрија за „перење“ дигитална репутација, во која техничката експертиза и стратегиската комуникација се користат за преобликување на јавната перцепција. Според преписката, Епстајн верувал дека поуредено и контролирано онлајн присуство ќе му помогне да ги зачува и обнови односите со влијателни бизнисмени, академици и јавни личности, надевајќи се дека дигиталниот имиџ може да го ублажи товарот на неговото минато.