Адвокатката на „Голдман Сакс“, Румлер, заминува поради поврзаност со Епстајн

Главната адвокатка на „Голдман Сакс“ (Goldman Sachs Group Inc.), Кети Румлер, ја напушта компанијата по објавувањето пакет документи од Министерството за правда на САД, кои покажуваат нејзини врски со осудениот сексуален престапник Џефри Епстајн.

Во соопштението главниот извршен директор Дејвид Соломон наведе дека ја почитува нејзината одлука за повлекување и дека таа „ќе недостига“.

Румлер, која ќе ја напушти компанијата на 30 јуни, беше добро позната по својата улога како адвокатка во Белата куќа за време на администрацијата на Барак Обама, пред да се врати во адвокатската канцеларија „Латам и Воткинс“ (Latham & Watkins). Таа беше ангажирана од „Голдман Сакс“ во 2020 година, а подоцна стана и главна адвокатка на банката.

„Мојата одговорност е интересите на ‘Голдман Сакс’ секогаш да ги ставам на прво место“, изјави Румлер.

Bloomberg

Банката соопшти дека таа уште тогаш му открила на раководството дека претходно имала контакти со Епстајн, кој ѝ понудил да ја искористи својата мрежа за да ѝ помогне во градењето на нејзината приватна практика. Таа исто така изјавила дека жали што воопшто го познавала.

Нејзиното име продолжи да се појавува во серии документи поврзани со Епстајн, кој почина додека беше во федерален притвор во 2019 година. Лани, кога демократите во Претставничкиот дом објавија електронска пошта поврзана со Епстајн, Румлер се појави во преписки со него, во кои го критикувала претседателот Доналд Трамп.

Скандалот опфати и други истакнати личности од Волстрит и пошироко, меѓу кои и адвокатот Бред Карп, кој неодамна се повлече од функцијата шеф на „Пол Вајс“ (Paul Weiss), како и поранешниот претседател на „Харвард“ и поранешен секретар на Министерството за финансии на САД, Лари Самерс, кој изјави дека жали за својот однос со Епстајн.

Питер Менделсон лани беше разрешен од функцијата амбасадор на Обединетото Кралство во САД и истовремено поднесе оставка како член на Домот на лордовите (House of Lords) поради неговите врски со Епстајн. Скандалот сега ја зафаќа и владата на премиерот Кир Стармер.

Серија документи објавени во јануари открија дека Румлер имала прекар за Епстајн – Чичко Џефри. Документите исто така покажуваат дека Румлер можеби прифатила подароци и патувања од него, а во еден момент била обвинета и дека имала афера со еден од неговите водечки адвокати, кој бил во брак.

И покрај тие односи, Румлер во изминатите месеци продолжи да ја има поддршката од Соломон. Во ноември главниот извршен директор ја нарече „одлична адвокатка“ кога беше прашан дали очекува дополнителни последици поради нејзиното минато со Епстајн. Понова изјава од портпарол на „Голдман Сакс“ наведува дека банката спровела длабинска проверка на нејзините врски со Епстајн и дека „била задоволна“ од резултатите.

Објавувањето на документите поврзани со Епстајн беше задолжително според закон изгласан од Конгресот лани, по двопартиски притисок од пратеници, жртви и активисти. Материјалот содржи спомнувања богати и моќни луѓе што во различни периоди имале поврзаност со Епстајн. Вклучувањето во документите не претставува показател за сторено незаконско дело.