Универзитетот „Колумбија“ ја запишал „со врски“ девојката на Епстајн

Њујоршкиот универзитет „Колумбија“  соопшти дека примил студентка на својот стоматолошки факултет преку „нерегуларен процес“ што се совпаднал со барањата за собирање средства од страна на поранешен професор и алумни упатени кон осрамотениот финансиер Џефри Епстајн.

Пораките за приемот на студентката беа откриени во најновата серија на објавени  електронски пораки и други документи објавени од Министерството за правда на САД поврзани со Епстајн, осуден педофил. Комуникациите во досиејата  „не ги исполнуваат стандардите на ‘Колумбија’ за интегритет и независност при прием“, се вели во соопштението на факултетот во средата. „Колумбија“ е еден од најпрестижните факултети во САД, член на т.н. „ајви лиг“ група, заедно со уште седум приватни универзитети, познати по своите истражувачки активности.

Во вторникот, Блумберг објави за долгогодишен синџир на комуникација помеѓу тимот на Епстајн и високи претставници на Стоматолошкиот факултет на „Колумбија“. Девојката на Епстајн, Карина Шулиак, била примена на факултетот како студентка со трансфер во 2012 година откако не го завршила стоматолошкиот факултет во Белорусија.

Студентката не беше именувана во соопштението на „Колумбија“, во кое се вели дека лицето - кое дипломирало на факултетот - не е прогласено за одговорно за никакво кривично дело.

„Дискусиите за собирање средства ги предводело тогашното раководство на стоматолошкиот факултет или поединци кои дејствувале по нивна волја, а не по наредба на раководството на медицинскиот центар или Универзитетот“, се вели во соопштението.

„Колумбија“ соопшти дека луѓето кои сè уште се поврзани со факултетот се отстранети од административни и волонтерски раководни улоги. Томас Мањани, стоматолог од Менхетен и клучен собирач на средства за факултетот, кој редовно комуницирал со Епстајн, бил отстранет од комисијата за преглед на кандидатите за прием. Претходно тој се повлече од советничкиот одбор на факултетот.