Зеленски е подготвен да се повлече за доброто на Украина

Украинскиот претседател Володимир Зеленски изјави дека би бил подготвен да се повлече доколку тоа гарантира мир за неговата земја разурната од војна.

Зборувајќи на прес-конференција во Киев во неделата, Зеленски рече дека со задоволство би го заменил своето претседателство за членство на Украина во НАТО, доколку се даде таква понуда.

Украинскиот претседател рече дека е јасно дека „нема да биде на власт со децении“. Тој зборуваше ден пред руската инвазија на неговата земја да наврши три години.

Коментарите доаѓаат откако американскиот претседател Доналд Трамп го опиша Зеленски како „диктатор“, повикувајќи ја Украина да одржи избори.

Русија долго време бара Украина да одржи претседателски избори како дел од мировниот договор, иако украинското законодавство и забранува на земјата да одржува избори во вонредна состојба.