Илјадници на протест во Белград

Голем број граѓани се собраа вечерва во центарот на Белград, каде во 16 часот започна протестен митинг под слоганот „15 за 15“, организиран од студентите. Иако беше планирано завршниот говор да се одржи во 21 часот, нешто по 19 часот - во последните минути од 15-минутниот молк - се случи инцидент пред Пионерскиот парк. Редарите ги соблекоа зелените елеци, а студентите во блокадата најавија дека за нив протестот е завршен и дека не сносат одговорност за натамошните настани.

„Фрлени се шишиња и камења од правец на Пионерскиот парк. Студентскиот протест завршува. Нашите обезбедувачи ги соблекоа елеците. Апелираме до граѓаните да се повлечат на безбедно“, напишаа студентите на Инстаграм.

Медиумите објавија дека група насобрани во близина на Собранието фрлале разни предмети и пиротехнички средства кон студентскиот камп лоциран во Пионерскиот парк. Како што јави репортерот на агенцијата Бета, се се случило во близина на заштитната ограда на паркот, пред зградата на Собранието. Студентски чувари брзо формирале група и се обиделе да ја смират групата која фрлала пиротехнички средства.

Претседателката на српскиот парламент Ана Брнабиќ ги отфрли обвинувањата дека нападот за време на вечерашниот протест пред Народното собрание го извршил некој од Пионерскиот камп, туку дека „екстремисти“ ги нападнале и студентите од блокадата и студентите во паркот.

Во меѓувреме, просторот кај „Славија“ се чисти по големиот митинг, откако голем број луѓе почнаа да го напуштаат плоштадот, а некои се упатија кон зградата на парламентот, каде во моментов се уште има значителен број демонстранти.

Министерството за внатрешни работи соопшти дека во текот на денот на студентскиот протест во Белград учествувале околу 107.000 луѓе, од кои повеќето биле од внатрешноста. Од друга страна, излегоа неофицијални проценки кои укажуваат дека на протестот во главниот град учествувале многу поголем број луѓе.

Студентите бараат објавување на комплетна документација за реконструкцијата на Железничката станица во Нови Сад, отфрлање на обвиненијата против студентите и младите уапсени и притворени за време на протестите поради уривањето на настрешница на таа железничка станица, поднесување кривични пријави против напаѓачи на студенти и професори и нивно гонење, зголемување на средствата од српскиот буџет за материјални трошоци на државните високообразовни институции за 20 отсто.

Иако претставници на државниот врв постојано повторуваат дека се исполнети сите барања на студентите, демонстрантите тврдат дека не се и продолжуваат со активности како протестни маршеви, собири и повици за генерален штрајк.

Во моментов нема коментари за веста. Биди прв да коментира...

Остави коментар