Трамп продолжува да го притиска Пауел: Намали ги каматите!

Претседателот Доналд Трамп предупреди дека американската економија може да забави доколку Федералните резерви (Фед) веднаш не ги намалат каматните стапки, продолжувајќи го својот притисок врз шефот на Фед,  Џером Пауел.

„Речиси нема инфлација“, напиша Трамп на социјалните мрежи во понеделникот, повикувајќи се на пониските цени на енергијата и храната.
„Но може да има ЗАБАВУВАЊЕ на економијата, освен ако г. Предоцна (Mr. Too Late), голем губитник, не ги намали каматите ВЕДНАШ“, додаде тој, алудирајќи на Пауел.

Голем број економисти очекуваат царините на Трамп да ја разгорат инфлацијата и да го забават растот, дури и да е тоа привремено. Иако инфлацијата навистина е забавена последниве години, сè уште е покачена. Пауел и неколку негови колеги повеќепати нагласија дека Фед мора да внимава новите давачки да не предизвикаат постојано покачување на цените.

Трамп веќе неколкупати го има разнишано Волстрит со своите критики кон Пауел и со сугестии дека има овластување да го отстрани од функцијата пред крајот на мандатот. Американските берзи паднаа во понеделникот - индексот S&P 500 изгуби над 3 проценти - додека инвеститорите се прашуваа дали  Пауел навистина може да биде сменет.

Според извори упатени во администрацијата, Трамп приватно ги прашувал своите советници дали може да го отпушти Пауел, додека други официјални лица го советувале да не го прави тоа. Шефот на Националниот економски совет, Кевин Хасет, изјави дека претседателот го разгледува прашањето од правен аспект.

Иако економијата лани бележеше стабилен раст од 2,4 отсто во четвртиот квартал, економистите очекуваат дека царините ќе ги намалат инвестициите и потрошувачката, што би можело да доведе до забавување подоцна годинава. Напредокот во намалувањето на инфлацијата до целта на Фед од 2 процента беше запрен, но ценовниот раст повторно забави во март, со индексот на потрошувачки цени зголемен за 2,4 отсто во споредба со минатата година.

Ова забавување поттикна некои аналитичари, како и самиот Трамп, повторно да повикаат Фед да ги намали каматите како превентива за понатамошно економско забавување.

Минатата недела претседателот јавно го нападна Пауел, непосредно пред Европската централна банка да ја намали својата референтна стапка за четвртина поен, на 2,25 отсто. Трамп повеќепати се пожали дека Фед не ги снижува каматите доволно брзо.

Но, за разлика од САД, европските креатори на политики се соочуваат со веќе ниска стапка на раст. Инфлацијата таму е појасно на патот кон целта од 2 отсто, што им дава простор за натамошно олеснување на монетарната политика. Во САД, пак, претставниците на Фед се загрижени од бавното темпо на дезинфлација, како и од можноста царините повторно да ја поттикнат инфлацијата.

Коментарите на Трамп доаѓаат во пресрет на годишните пролетни состаноци на Меѓународниот монетарен фонд и Светската банка, кои неделава се одржуваат во Вашингтон и ќе ги соберат централните банкари и креаторите на економски политики од целиот свет.

„Не сум задоволен од него. Му ставив до знаење. И, ако сакам да го сменам, ќе го сменам многу брзо, верувајте ми“, изјави Трамп за новинарите за време на средбата со италијанската премиерка Џорџа Мелони.

Во својот говор пред Економскиот клуб во Чикаго минатата недела, Пауел истакна дека Фед мора да внимава царините да не предизвикаат постојана инфлациска криза. Тој додаде дека ценовната стабилност е клучна за силен пазар на труд.
Пауел исто така нагласи дека независноста на централната банка е „загарантирана со закон“ и „не можеме да бидеме сменети без причина“.