Русија се насочува кон Индија и Шри Ланка во потрага по работна сила

Со години Русија се потпираше на мигранти од Централна Азија за да ги пополни празнините во својата работна сила. Но, како што демографските трендови и војната во Украина ја предизвикуваат најтешката криза со работна сила во последните неколку децении, работодавците сè почесто ја прошируваат потрагата кон некои од најнаселените земји во светот.

Русија проценува дека на економијата ќе ѝ бидат потребни уште 11 милиони работници до крајот на деценијата.

Ова прашање беше високо на агендата за време на декемвриската посета на претседателот Владимир Путин на Њу Делхи, кога официјалните претставници потпишаа договор насочен кон поедноставување на процедурите за привремена работна миграција.

Дури и пред тој договор, бројот на работни дозволи што Русија им ги издала на индиски државјани минатата година скокна на повеќе од 56.000, од околу 5.000 во 2021 година. Вкупниот број работни дозволи издадени на странци се искачи на над 240.000 во 2025 година, што е највисоко ниво најмалку од 2017 година, покажуваат податоците на Министерството за внатрешни работи. Иако дозволите значително се зголемија и за поранешната советска република Туркменистан, голем дел од растот на странската работна сила доаѓа од подалечни земји - вклучувајќи ги Индија, Бангладеш, Шри Ланка и Кина.

Оваа година работници од Индија и од други јужноазиски земји почнаа да пополнуваат комунални работни места, како што е чистењето снег во големите руски градови, но странските работници сè почесто се ангажираат и на градилиштата, во ресторани и во други градски служби.

Русија привлекува мигранти за да ја ублажи кризата со работна сила

Индиските, кинеските и туркменистанските работници добија најмногу работни дозволи минатата година

Bloomberg

„Амбе“ почна да регрутира индиски работници за Русија дури пред околу три месеци, и тоа исклучиво за московскиот регион. Сега компанијата е вклучена и во вработување работници за рускиот Далечен Исток, во Владивосток и на островот Сахалин.

Војната на Путин во Украина дополнително го влоши и онака сериозниот недостиг од работна сила. Освен оние што беа регрутирани за борбите, воената економија пренасочи работници од цивилните сектори кон воената индустрија, додека се проценува дека меѓу 500.000 и 800.000 работоспособни Руси ја напуштиле земјата поради противење на војната, избегнување мобилизација или други причини.

Русија исто така ги заостри прописите за безвизна миграција по нападот врз посетителите на концертната сала „Крокус сити хол“ во предградие на Москва во 2024 година. На почетокот од годинава бројот на странски државјани во Русија се намали на 5,7 милиони, што претставува пад од околу 10 отсто во однос на претходната година, иако многу од нив се деца, објави рускиот весник „Ведомости“ (Vedomosti).

Компаниите веќе ги чувствуваат последиците

„ММЦ Норилск никел“ (MMC Norilsk Nickel PJSC), најголемата руска рударска компанија, позната по едни од највисоките плати во земјата, пред една година се соочуваше со недостиг од околу 10.000 вработени во Сибир, што е еквивалент на околу 10 отсто од вкупната работна сила. Според лице запознаено со состојбата, на компанијата и понатаму ѝ недостигаат неколку илјади работници во тој регион.

„Недостигот од квалификуван кадар останува еден од главните предизвици за руската индустрија во целина“, наведе портпарол на компанијата во електронска порака.

„Ак Барс – корпорација за бродоградба“ (JSC Shipbuilding Corporation Ak Bars), која гради и цивилни и воени бродови, има недостиг од 1.500 до 2.000 работници, што е една од причините зошто работи со околу половина од својот капацитет, изјави генералниот директор Ренат Мистахов.

Вработувањето работници од Азија често е и поевтино за работодавците. Квалификуван индиски електричар може да заработува 25 отсто помалку од износите што руските работодавци ги нудат за слични позиции, покажуваат огласите за работа на руските и заливските платформи.

Русија исто така настојува да го искористи продлабочувањето на врските со Северна Кореја за да го пополни недостигот од работна сила. Пристигнувањата од таа земја во Русија се во пораст од 2022 година, по претходниот пад предизвикан од забраната на Обединетите нации од 2017 година за вработување севернокорејски државјани во странство.

Според Министерството за надворешни работи, многумина доаѓаат со студентски визи - околу 9.000 во 2024 година, која е последната година за која има достапни податоци., Бројот на севернокорејски работници само на руските градилишта требаше да достигне околу 50.000 до крајот на 2025 година, процени развојната група „Ескадра“, според „РИА Новости“ (RIA Novosti).

Улогата на кинеската работна сила е поинаква. Повеќето кинески државјани што добиваат работни визи се вработени во сопствени производствени погони или компании, изјави Алексеј Маслов, директор на Институтот за азиски и африкански студии при Московскиот државен универзитет „Ломоносов“. Тие претежно се активни во мали и средни претпријатија, како ресторани, логистика и трговија на големо, додаде тој.

За Русија има малку знаци дека состојбата наскоро ќе се промени.

„Населението на Русија ќе продолжи да старее, а уделот на младите и децата генерално ќе продолжи да се намалува“, изјави независниот демограф Игор Ефремов. „Ова не е привремена криза на пазарот на трудот, туку долгорочна норма што ќе трае со децении и на која економијата ќе мора да се приспособи.“