Најдолгиот говор на Трамп пред Конгресот - царини, врева и пресметка со демократите

Американскиот претседател Доналд Трамп го одржа најдолгиот говор за состојбата на нацијата откога ваквите обраќања се пренесуваат на телевизија и порача дека Америка е на половина пат од, како што рече, „историски пресврт“. Притоа тој се обиде да ги увери гласачите дека неговиот економски план дава резултати, пред важните избори на половината од мандатот што ќе се одржат во текот на годинава.

Говорот беше полн со помпа, отворени конфликти и напнатости, кои во последните години станаа заштитен знак на овој настан во Конгресот, каде што за сè одлучуваат само неколку гласа, со длабока партиска поларизација.

Во салата имаше и конкретни инциденти. Демократскиот пратеник Ал Грин беше исфрлен бидејќи го прекина говорот. Трамп ги повика во галеријата олимписките хокеари од машката репрезентација, освојувачи на златниот медал, додека низ салата одекнуваше „САД! САД! САД!“ На ветераните и на припадниците на активната воена служба им додели неколку одликувања.

Говорот траеше повеќе од еден час и 45 минути, најдолгиот во историјата на обраќањата за состојбата на нацијата. Но, наместо детално изложување на политиките, Трамп одржа настап сличен на предизборен митинг, со акцент на политички напади.

Еве ги клучните пораки:

Царините по одлуката на Врховниот суд

Откако минатата недела Врховниот суд ги поништи неговите реципрочни царини, Трамп ја нарече пресудата „несреќна“ и „разочарувачка“. Во салата седеа и четворица судии.

Тој најави дека ќе воведе нови царини, повикувајќи се на други законски овластувања, и призна дека новиот модел може да биде покомплициран, но тврди дека ќе биде долгорочно одржлив.

Говорот траеше повеќе од еден час и 47 минути, најдолгото обраќање пред Конгресот во историјата | Bloomberg

„Конгресот не треба да презема ништо“, рече тој. „Сè е веќе проверено и одобрено. Верувам дека царините, кои ги плаќаат странските земји, како што беше и порано, ќе го заменат денешниот систем на данок на доход“.

Отворен судир со демократите

Трамп речиси во секој дел од говорот ги напаѓаше демократите и нелегалните имигранти, понекогаш и во иста реченица. „Тие луѓе се луди, ви кажав“, порача, покажувајќи ги демократските пратеници.

Републиканците стануваа и аплаудираа, додека демократите седеа со сериозни лица, повремено довикувајќи и прекинувајќи го претседателот.

Тој најави „војна против измамите“ под раководство на потпретседателот Џ.Д. Венс и нагласи дека федералните програми во сојузните држави под раководство на демократите се обележани со корупција. Трамп повика Конгресот да воведе поцврста идентификација на гласачите преку Законот за заштита на американските гласачи (SAVE America Act), што би можело да го отежни гласањето на дел од гласачите со пониски примања и на жени што се во брак и да го укине гласањето по пошта без посебни причини.

Трамп вели дека царините што ги плаќаат странските земји би можеле да го заменат данокот на доход| Bloomberg

Здравство и пензиска заштеда

Трамп го претстави својот план за здравствениот систем, но без детали.

„Сакам да ги запрам плаќањата за големите осигурувачи и тие пари да им ги дадам директно на луѓето за да го купат своето осигурување, кое ќе биде подобро и значително поевтино“.

Тој ја истакна и ТрампРх (TrumpRx), државната платформа за попусти на лекови, слична на ГудРх (GoodRx), која е наменета за лица без осигурување.

Трамп најави дека следната година Американците без пензиски планови како 401(k) ќе добијат државна стимулација од 1.000 долари заедно со нивната сопствена заштеда. Овој предлог потсетува на пакетот на пензиски реформи што Конгресот веќе го усвои во 2022 година, за време на мандатот на Џо Бајден.

 

Истакнување на постигнатото

Трамп посвети голем дел од говорот на резултатите од првата година по неговото враќање во Белата куќа. Тој ги спомна даночниот закон, посебните сметки за новороденчиња, падот на инфлацијата и рекордните нивоа на берзанските индекси.

Тој ги присвои и заслугите за воените операции во Иран и Венецуела, мировните договори во Газа и на границата меѓу Индија и Пакистан, како и затворањето на границата меѓу САД и Мексико за мигрантите и шверцувањето дрога.

Америка 250

Говорот беше силно поврзан со 250-годишнината од американската независност, со изразен патриотски тон. Претседателот одликуваше 99-годишен ветеран од Втората светска војна, Бади Тагарт, му додели медал на припадникот на Крајбрежната стража, Скот Рускан, за спасување во кампот Мистик и ѝ оддаде почит на вдовицата на убиениот конзервативен поткастер Чарли Кирк.

Најемотивниот момент вечерта беше кога им го врачи Медалот на честа на офицерот Ерик Словер, пилот на хеликоптер во операцијата за фаќање на Николас Мадуро, и на морнаричкиот пилот од Корејската војна, Ројс Вилијамс.