Мундијал на милијарди: Кој ги има најскапите ѕвезди и која е највредната репрезентација

За неколку дена во САД, Канада и Мексико ќе започне Светското првенство во фудбал. Времето нема да застане само за фудбалерите и љубителите на фудбалот туку и за деловната заедница, која фудбалот го гледа пред сè низ финансиски бројки.

Фудбалот е исклучително профитабилен бизнис во кој се вртат огромни суми. Како пример, 30-те најголеми фудбалски клуба во светот имаат вкупна вредност од околу 72 милијарди долари, според процената на магазинот „Форбс“ (Forbes).

Клупскиот фудбал ова лето му го отстапува местото на репрезентативниот, каде што 26-те најдобри играчи од 48 земји се натпреваруваат за најпрестижната награда во најпопуларниот спорт на планетата.

Вртоглави не се само сумите што спонзорите им ги даваат на клубовите или што навивачите ги плаќаат за билети за годинашниот мундијал туку и вредноста на најдобрите и најпробивните фудбалери во светот.

На врвот на највредните фудбалери што ќе настапат на годинашното Светско првенство се три ѕвезди на европскиот фудбал. Сите тројца, според процените на порталот „Трансфермаркт“ (Transfermarkt), кој ја следи вредноста на тимовите и фудбалските трансфери, вредат по 200 милиони евра.

Станува збор за Ламин Јамал, 18-годишниот крилен напаѓач на Барселона и Шпанија, Ерлинг Халанд, 25-годишниот напаѓач на Манчестер Сити и Норвешка, и Килијан Мбапе, 27-годишниот напаѓач на Реал Мадрид и Франција. Сите тројца ќе ги водат своите репрезентации на Мундијалот, но, според обложувачниците и прогнозите, само Шпанецот и Французинот имаат реални шанси за титулата.

Првата тројка ја следи втора група највредни фудбалери, кои според „Трансфермаркт“ се вредни по 150 милиони евра. Тоа се Педри, 23-годишен играч од средниот ред на Барселона и Шпанија, Мајкл Олисе, 24-годишен крилен напаѓач на Баерн Минхен, кој настапува за Франција, и Винисиус Жуниор, 25-годишен напаѓач на Реал Мадрид и Бразил, кој е и највредниот неевропски играч во светот.

Најмалку 100 милиони евра вредат дури 20 фудбалери според „Трансфермаркт“. Само еден од таа група нема да настапи на Светското првенство, бидејќи неговата земја не успеа да се квалификува за турнирот во Северна Америка. Станува збор за офанзивниот играч за врска на Ливерпул и унгарската репрезентација Доминик Собослај, чија земја не се пласираше ниту во квалификациите.

Меѓу највредните фудбалери доминираат офанзивни играчи од средниот ред и напаѓачи, додека дефанзивци и голмани воопшто нема на листата на највредни играчи во светот.

Кои се највредните репрезентации во светот?

Не е изненадување што највредната репрезентација на годинашното Светско првенство е Франција. Францускиот тим, кој заедно со Шпанија важи за фаворит за титулата, според  „Трансфермаркт“ вреди дури 1,48 милијарда евра.

Следуваат Англичаните, чија репрезентација вреди 1,31 милијарда евра, со играчи како Џуд Белингам (140 милиони евра), Букајо Сака и Деклан Рајс (двајцата по 120 милиони евра).

Врвот на највредните тимови на Светското првенство го заокружуваат Шпанците, чија репрезентација вреди 1,27 милијарда евра. „Ла роха“ има многу млади фудбалери како 18-годишниот Јамал, 23-годишниот Педри и исто така 23-годишниот Фермин Лопез, кој вреди 100 милиони евра.

Сите пет највредни репрезентации доаѓаат од Европа, бидејќи по нив следуваат Германија (998 милиони евра) и Португалија (972 милиони евра). Првата неевропска екипа е Бразил, со вредност од 909 милиони евра.

Преостанатите репрезентации во топ десет се Холандија (833 милиони евра), Аргентина (801 милион евра), Норвешка (597 милиони евра), во чија вредност една третина ја носи Халанд, и Белгија (548 милиони евра).