На Мундијалот има по некое празно место, но организаторите се задоволни

Сите грижи што го следеа ова Светското првенство, од екстремните горештини и проблемите со транспортот до рекордно високите цени на билетите, не успеаја да ги расипат првите денови од турнирот.

Беа забележани многу малку поголеми проблеми. За добрата атмосфера придонесоа и добрите игри на трите домаќини: Мексико и САД остварија убедливи победи, додека Канада одигра нерешено со Босна и Херцеговина.

„Овде уживаме во емоцијата на една земја, едно срце“, рече 44-годишниот Хозе Ортега Рамирез во Мексико Сити, додека навивачите ги преплавија улиците на главниот град за време на силен дожд по победата од 2:0 против Јужна Африка во првиот натпревар на турнирот во четвртокот. „Ова е нешто што сите нè возбудува, каде што општествените класи и разликите не постојат.“

Добрата атмосфера се прелеа и на други спортови. Шкотските навивачи, познати како Тартан армија, пристигнаа на стадионот „Фенвеј Парк“, каде што фановите на Бостон Ред Сокс ги забавуваа со звуци на гајди и песната „The Flower of Scotland“.

Сепак, не беше сè позитивно. На натпреварот меѓу Катар и Швајцарија беше забележан голем број празни седишта, што ја потврди загриженоста дека високите цени на билетите ја намалиле побарувачката. Како што натпреварот одминуваше, сè повеќе места остануваа празни на трибините. Во Гвадалахара, каде што Јужна Кореја ја победи Чешка, големи делови од ВИП-зоните исто така останаа празни. На стадионот „АТ&Т“ во Далас, непродадените места покрај теренот ги пополнија волонтери.

Заканата од заострените имиграциски контроли на американските власти исто така влијаеше врз атмосферата околу турнирот. Марија Прајс на заедничкото гледање натпревари во центарот на Лос Анџелес мавташе со големо мексиканско знаме. Родена во Мексико, а денес американска државјанка, таа рече дека посетеноста е помала бидејќи многу  мексикански  Американци и понатаму стравуваат по минатогодишната акција против имигрантите, кога федерални агенти со поддршка на илјадници војници беа распоредени во градот.

„Во претходните години овде ќе беше преполно“, рече Прајс. „Луѓето се плашат да излезат.“

Имиграциските прашања се одразија и на самиот терен. На сомалискиот судија Омар Абдулкадир Артан му беше забранет влез во САД поради безбедносни проверки, додека неколку членови на стручниот штаб на Иран останаа без визи.

ФИФА соопшти дека не се меша во имиграциските процеси на државите домаќини. Сепак, тоа не е секогаш така  - во 2023 година ФИФА на Индонезија ѝ го одзеде правото на домаќинство на Светското првенство за играчи до 20 години, откако гувернерот на Бали одби да ја прими израелската репрезентација.

Повеќе тимови, повеќе навивачи

За ова Светско првенство ФИФА го прошири форматот од 32 на 48 репрезентации, со што беа додадени 40 натпревари. Критичарите тврдат дека со тоа квалитетот на турнирот е разводнет и дека станува збор за уште еден потег со кој ФИФА ги зголемува приходите.

Сепак, проширувањето значеше многу за навивачите од земји кои долго време не играле на Мундијалите.

Ресторанот I Love Paraguay во Њујорк, еден од ретките што нуди парагвајска кујна, стана место за собирање на дијаспората. За време на натпреварот против САД, просторот бил преполн  - луѓето дури седеле и на подот, бидејќи тоа бил прв настап на Парагвај на Светското првенство по 16 години.

„Ме полазуваат морници што сум овде“, рече 60-годишната Миријан Касерес, која допатувала од Асунсион за да помине три недели кај сестра ѝ и да ги следи натпреварите. Таа не планира да оди на стадиони, но сака да биде блиску до настанот. „Дојдов за да го доживеам ова одблизу.“

Bloomberg

Уште подолг пост имаше Хаити  - дури од 1974 година. Репрезентацијата настапи и покрај политичката нестабилност и насилството во земјата, без домашен натпревар од 2021 година и со ретки заеднички тренинзи.

Во населбата Литл Хаити во Бруклин, навивачите ги наполнија рестораните и баровите за да го гледаат поразот на својата репрезентација од 1:0 против Шкотска, која исто така се врати на Мундијалот по 1998 година. Во ресторанот BunNan се служеа јадења како засладени банани и пилешко.

„Ние не сме само ресторан, ние сме и заеднички простор“, рече сопственичката Надеџ Флеримонд. „Сè е за културата и луѓето, па беше природно да организираме заедничко гледање на натпреварите.“

Патот до Њу Џерси

Организацијата на превозот до стадионите беше една од главните теми пред турнирот. Во практика, навивачите главно се соочуваа со вообичаените гужви на големи настани. Во Масачусетс, чекањето на возовите се продолжи и повеќе од еден час за натпреварот Хаити  - Шкотска, додека во Далас автобускиот систем доби пофалби за организацијата.

Патот до стадионот „Мет Лајф“ во Њу Џерси од Менхетен помина без поголеми проблеми, иако билетот за воз чинеше 98 долари.

Навивачот на Мароко, Ајуб Мусановиќ, рече дека неговото патување поминало добро  - со воз на „Амтрак“ (Amtrak) до Менхетен, а потоа со шатл од 20 долари до стадионот. Сепак, се пожали на цената на билетот од 1.700 долари.

„Тоа е капитализам“, рече тој. „Но ние сме тука и ќе ја поддржиме нашата репрезентација.“

Bloomberg

Високите цени на билетите предизвикаа сомнежи колку стадионите ќе бидат исполнети во групната фаза. Критичарите сметаат дека почетните цени биле превисоки и дека дополнително пораснале на секундарниот пазар.

Многу навивачи ги критикуваат цените, но сепак се подготвени да платат бидејќи настанот им значи многу.

Јужнокореецот Хјунки Џо потрошил околу 5.000 долари за патување во Мексико за да ја гледа својата репрезентација. Во црвен дрес и со национално знаме се фотографирал со мексикански навивачи, потсетувајќи на неочекуваната врска меѓу двете земји од 2018 година.

„На крајот, мислам дека не беше толку скапо“, рече тој. „Само сакав да бидам овде и да го доживеам Светското првенство.“

Во Торонто, Џошуа Матијас и Биној Далмеида по работа дошле до стадионот БМО (BMO Field), но не купиле билети бидејќи биле прескапи. Наместо тоа, го гледале натпреварот на Канада на телефон пред стадионот, облечени во дресови на домашната репрезентација.

„Си помисливме дека барем можеме да ја почувствуваме атмосферата на Светското првенство“, рече Далмеида.