Потпретседател на ФИФА му откажа поддршка на Инфантино

Висок член на Советот на ФИФА ја повлече својата поддршка за Џани Инфантино, наведувајќи го отпуштањето на оперативниот директор на организацијата Кевин Ламур како „капка што ја прелила чашата“.

Во писмо испратено до шефот на ФИФА, во коешто Блумберг Њуз имаше увид, Шандор Чањи, исто така, го критикуваше контроверзниот план за одвојување на комерцијалните операции на ФИФА во договор во кој учествува банката „ЏП Морган“ (JPMorgan Chase & Co.), како и претерано исполитизираното Светско првенство.

Во понеделникот, Ламур беше отпуштен од функцијата главен оперативен директор на ФИФА неколку недели откако ги критикуваше плановите на Инфантино за приватизација на светската фудбалска федерација, објави Скај њуз. Портпарол на ФИФА го потврди неговото заминување.

„Фактот дека неговото отпуштање беше поттикнато од неговата критика кон горенаведената иницијатива - иницијатива за која и самите на крајот признавте дека била погрешна - укажува на сериозни недостатоци во професионалното расудување, етичките стандарди и лидерството“, рече Чањи во писмото.

Чањи е еден од осумте потпретседатели на Советот на ФИФА, главното тело за донесување одлуки за светскиот фудбал помеѓу состаноците на Конгресот на ФИФА.

Унгарскиот милијардер бизнисмен е претседател на фудбалската асоцијација на својата земја и е член на Советот на ФИФА од 2017 година.