Балмер ги прифти казните за Клиперс

Сопственикот на Лос Анџелес Клиперс, Стив Балмер, се повлече.

Тимот првично соопшти дека „енергично“ ќе оспори една од најстрогите казни во историјата на НБА поради прекршување на правилата за ограничување на платите, но Балмер одлучи да не се бори против казните што ќе го ограничуваат тимот со години.

„Се обврзуваме да го оставиме ова поглавје зад нас“, рече Балмер во изјава објавена на интернет во неделата навечер. „Ја информиравме НБА дека постапуваме во согласност со казните изречени од лигата, ја плативме паричната казна и продолжуваме понатаму. Иако сè уште постојат несогласувања во врска со наодите во извештајот, ова не е местото каде што сакам да го насочам вниманието. Сопствениците на тимовите треба да даваат поддршка, а не да го одвлекуваат вниманието.“

НБА им одзеде на Клиперс пет избора од првата рунда на драфтот и го суспендираше Балмер на една година, откако утврди дека тимот ги заобиколил правилата за ограничување на платите со тоа што овозможил спонзорски договори меѓу надворешни компании и ѕвездата Кавај Ленард. Потоа, Ленард одлучи да се врати во екипата на Торонто. 

Клиперс, исто така, беа казнети со 30 милиони долари, што е најголемата финансиска казна во историјата на лигата. Ленард беше казнет со 700.000 долари. Ѕвездата не се соочи со можна суспензија бидејќи тоа не е една од казните за прекршување на правилата за ограничување на платите дозволени според актуелниот колективен договор.

Балмер имаше ограничени можности да се бори против казните. Синдикатот на играчите се согласи со казната на Ленард, со што арбитражата беше отстранета како можност. Според правни експерти, тужба тешко би можела да биде добиена. Исто така, можно е да има уште обвинувања, откако адвокатската фирма што ги истражуваше Клиперс соопшти дека сè уште добива релевантни информации и дека, доколку е потребно, ќе ги дополни наодите.

На Балмер, милијардер и поранешен главен извршен директор на „Мајкрософт“ можеби влијаела и слична ситуација од пред повеќе од две децении. НБА им одзеде на Минесота Тимбервулвс пет избора од првата рунда на драфтот и го казни тимот со 3,5 милиони долари поради прекршување на правилата за ограничување на платите преку тајни исплати на еден играч. Но, НБА подоцна му врати два избора на тимот откако тој ја прифати казната.

„Ова беше многу тежок период за сите поврзани со Клиперс и поради тоа искрено жалам“, рече Балмер во изјавата. „Сакам да им се извинам на нашите навивачи, вработени и на моите колеги сопственици на тимови во НБА за одвлекувањето на вниманието и вознемиреноста што ги предизвика овој случај, за што ја прифаќам одговорноста како главен сопственик.“