Од над 10.000 деца што се натпреваруваат во Детската лига, само нешто над 300 се девојчиња. Лигата што ја организира Фудбалската федерација на Македонија (ФФМ) е организиран систем на натпреварување за деца од 7 до 12 години.
Соодносот на момчиња и девојчиња во натпреварувањето покажува дека малку работи се сменети во земјава кога станува збор за женскиот фудбал од 2021 година наваму.
Тогашното истражување на УЕФА за македонскиот фудбал, кое го спроведе агенцијата „Нилсен“, покажа дека главна бариера за женскиот фудбал во Македонија е ставот на 41 отсто од испитаниците дека фудбалот е машки спорт. Европскиот просек за ова прашање е 20 отсто.
Прочитај повеќе
ТВ правата го движат фудбалот, но иднината виси на конец
Премиер лигата во сезоната 2024/25 ќе собере неверојатни 2,1 милијарда евра од телевизиските права на домашните пазари.
29.09.2024
На прашањето кој е вашиот став за женскиот фудбал, само 9 отсто од испитаниците рекле дека тоа е спорт што е соодветен за девојчиња. Европскиот просек изнесува 24 отсто.
Девојчињата сакаат фудбал, родителите се проблем
„Во женскиот фудбал никогаш досега не сме имале доволна бројка, сè уште се соочуваме со стереотипот од страна на родителите. Кај девојчињата има огромна желба, но наидуваме на проблеми од страна на нивните родители“, вели во разговор за „Блумберг Адрија“ Славе Велков, шеф на стручниот штаб на женскиот прволигаш „Тиверија Брера“ од Струмица.
Славе Велков, шеф на стручниот штаб на женскиот прволигаш „Тиверија Брера“ од Струмица/Приватна архива
Ова е единствениот македонски женски клуб што има странски стратегиски партнер. Неодамна од здружение на граѓани прерасна во акционерско друштво и е прв клуб што има потпишано професионални договори со своите фудбалерки. Клубот е дел од „Брера Струмица“, чиј претседател е еден од најдобрите македонски фудбалери на сите времиња Горан Пандев. „Тиверија Брера“ осум години е во првата тројка на табелата на првата македонска женска фудбалска лига.
„Со смелост можам да кажам дека би биле конкурентни со другите лиги од регионот, познавајќи ги и другите лиги од соседството, каде што состојбата е слична затоа што и таму ги имаат истите проблеми, само две-три екипи да се натпреваруваат за шампионската титула“, вели Велков.
Малиот број компетитивни тимови е проблем и за селекцијата. Доскорашниот селектор на женската А репрезентација Кирил Изов во изјава за „Блумберг Адрија“ вели дека регрутирањето секогаш е главоболка.
Кирил Изов, поранешен селектор на женската А репрезентација/Приватна архива
„Навистина сме лимитирани по однос на изборот на квалитетни девојки што би играле за репрезентацијата и со кои би можеле да им парираме на поголемите и поразвиени држави, но сепак успеавме да постигнеме напредок и во последно време не сме толку инфериорни“, вели тој.
Слабата медиумска покриеност ги брка спонзорите
Освен убедувањата, проблем се и парите. Слаб е интересот кај приватниот сектор да вложува во женски фудбал. Изов вели дека слабата посетеност на натпреварите и слабиот медиумски интерес се причина компаниите да не наоѓаат бенефиција за вложување.
Фудбалската федерација на Македонија (ФФМ) има стратегија за женски фудбал „Повеќе жени, повеќе голови“, која утврдува критериуми за подобрување на условите за развој на овој спорт. „Исполнувањето на критериумите ќе им донесе подобра репутација на клубовите, а со тоа и интерес кај девојчињата“, вели за „Блумберг Адрија“ Златко Андоновски, портпарол на ФФМ.
Според него, иако ФФМ обезбедува еднакви услови за националните тимови без оглед на полот, машката фудбалска репрезентација има значително повеќе спонзорски договори во споредба со женскиот тим, но се прават напори да се заинтересираат компаниите за поддршка и на женскиот спорт во рамките на иницијативите за корпоративна општествена одговорност.
„Премостувањето на овој јаз ќе бара поголема видливост на женската репрезентација, подобрена медиумска покриеност и прикажување на зголемениот глобален интерес за женскиот фудбал“, вели тој.
За зголемување на интересот за женски фудбал, ФФМ веќе четири години го реализира проектот „Фудбал во училишта“. Годинава во проектот се вклучени 30 училишта, а бројот на девојчиња од трето, четврто и петто одделение што тренираат се движи меѓу 15 и 20 по генерација од секое училиште.
„Радува податокот што повеќе од една третина од девојчињата што се вклучени во училишниот фудбал продолжуваат со активности и во клубовите во Македонија“, вели Андоновски.
Иако во последните години ФФМ вложува во инфраструктурата, преку проектите „Хет-трик“ на УЕФА и на ФИФА, сè уште недостигаат терени што ќе бидат во функција само на женскиот фудбал.
„Многу клубови и тимови делат терени со машки екипи, а бројот на терени за женскиот фудбал е ограничен. Се разбира, тоа претставува предизвик за тимовите од Женската фудбалска лига, но таков е принципот и во многу поразвиени фудбалски држави“, вели Андоновски.
.webp){kind=icon}
