text size
Во март се враќа најбрзиот циркус на светот, кој носи многу новини. Новата сезона во Формула 1 ќе биде понеизвесна од кога било, што е најважната вест. Има и неколку нови стратегиски цели, промени во составите, календарот, како и неизбежни законодавни иновации.
Формула 1 го има истиот шампион веќе четири години – Макс Верстапен, но ако им се верува на обложувачниците, летачкиот Холанѓанец од Ред бул има сериозна конкуренција во Ландо Норис од Мекларен. Според обложувачниците, Норис има неколку процентни поени предност за првпат да стане светски шампион.
Ф1 сака да биде одржлива
Формула 1 има цел да стане јаглеродно неутрална до 2030 година. Тоа вклучува намалување на емисиите во сите аспекти на спортот, од логистика до операции на патеката. Тие планираат да ја елиминираат пластиката за еднократна употреба и да се погрижат целиот отпад повторно да се користи, рециклира или компостира.
Од сезоната 2026, Ф1 ќе користи 100 проценти одржливо гориво во своите болиди. Тоа гориво ќе биде целосно синтетичко и произведено на начин што ќе ги намали емисиите на стакленички гасови, а со тоа ќе се обиде да го намали влијанието на спортот врз животната средина.
За да го намали јаглеродот поврзан со патувањето, Формула 1 планира да го оптимизира распоредот на трките. На пример, канадското гран-при ќе биде поместено од јуни во мај од 2026 година за да се намали потребата од дополнителни трансатлантски летови, а со тоа да се намалат емисиите поврзани со логистиката.
Планирано е да се зголеми моќноста на електричните компоненти во погонските единици на автомобилот. Од 2026 година моќноста на МГУ-K (Motor Generator Unit – Kinetic) ќе се зголеми од 120 kW на 350 kW, со што ќе се намали зависноста од фосилни горива и ќе се зголеми ефикасноста на автомобилот.
Деловни вести
Лидерот во индустријата на луксузот ЛВМХ (LVMH) инвестира една милијарда долари во Ф1, почнувајќи од 2025 година, што вклучува враќање на шампањот „моет“ (Moët & Chandon) на подиумот и „Луј Витон“ како снабдувач на кутии за трофеи.
По 26 години, постои можност трката за ГН на Аргентина да се врати во календарот на Ф1, поттикната од подемот на аргентинскиот возач Франко Колапинто.
Календар за трки
Сезоната 2025 се состои од рекордни 24 трки, почнувајќи со Големата награда на Австралија во Мелбурн, од 14 до 16 март. Ова е првпат од 2019 година сезоната да започне во Австралија, бидејќи трките во Бахреин и Саудиска Арабија беа преместени за да се избегне преклопување со Рамазан.
Исто така, планирани се шест спринтерски викенди да се одржат во Кина, Мајами (САД), Белгија, Остин (САД), Бразил и Катар.
Промени во составите на возачите
По 12 сезони со Мерцедес, Луис Хамилтон се пресели во Ферари, на местото на Карлос Саинц Јуниор. Саинц отиде кај Вилијамс на местото на Логан Сарџент.
Има и неколку дебитанти, а ќе дебитираат Андреа Кими Антонели (Мерцедес), Џек Духан (Алпин), Оливер Берман (Хаас) и Габриел Бортолето (Кик Заубер).
Промени во политиката
Минималната тежина на возачот е зголемена од 80 на 82 кг, а вкупната минимална тежина на автомобилот без гориво е зголемена од 798 на 800 кг. Сѐ за доброто на возачот.
Во екстремни топлински услови, од тимовите ќе се бара да користат системи за ладење за возачите, а минималната тежина на автомобилот ќе се зголеми за пет килограми кога ќе се користат овие системи. Почнувајќи од сезонава, ќе се укине бодот за најбрз круг што им беше доделуван на возачите што завршуваа во топ 10.
Сега од тимовите се бара да користат млад возач на слободни тренинзи двапати по сезона по болид, наместо еднаш како досега.
.webp){kind=icon}
