Жолтиот фудбалски дрес на Бразил стана толку силен симбол на конзервативната политика што многу левичари одбиваат да го носат. Сепак, гласините дека репрезентацијата би можела да носи дрес со друга боја, која силно се поврзува со левицата, на Светското првенство во 2026 година предизвикаа бурни реакции меѓу десничарите.
Фудбалскиот сојуз на Бразил во вторникот демантира дека националниот тим следната година ќе носи црвени резервни дресови, ден по објавата на порталот „Фути хедлајнс“ (Footy Headlines) дека Бразил планира да ги замени традиционалните сини дресови, кои обично ги следат познатите жолти маици.
Оваа информација предизвика силен бран на негодување во Бразил, каде што националниот спорт сè повеќе се наоѓа во центарот на жестоки политички поделби.
„Сликите од дресовите на бразилската репрезентација за Светското првенство во 2026 година што се појавија неодамна не се официјални“, соопшти Фудбалскиот сојуз на Бразил (ФСБ) преку социјалните мрежи, додавајќи дека ќе се придржува до правилата што бараат користење на боите од државното знаме. „Ниту ФСБ ниту 'Најк' (Nike) не ги претставија официјално деталите за новата колекција на дресови на репрезентацијата“.
Портпаролот на компанијата „Најк“, која ги произведува дресовите на бразилската репрезентација, изјави дека фирмата „не коментира гласини и шпекулации“.
Секоја промена на толку познат дрес како што е бразилскиот речиси сигурно е осудена на контроверзија. Сепак, можноста за воведување на црвената боја дополнително ги засили реакциите - Светското првенство во 2026 година се одржува само неколку месеци пред следните претседателски избори во Бразил, а додека приврзаниците на поранешниот претседател Жаир Болсонаро жолтиот дрес го претворија во симбол на десничарската политика, црвената е боја на левичарската Работничка партија на актуелниот претседател Луиз Инасио Лула да Силва.
Сенаторот Флавио Болсонаро, син на поранешниот претседател, ја осуди идејата како „навреда за сè што отсекогаш претставувало гордост на бразилскиот народ“ и повика таа „најостро да се отфрли“.
„Нема никаков идентитет, нема историја, нема оправдување некој да сака да ги замени зелената и жолтата со црвена“, напиша во објава на социјалните мрежи. „Нашето знаме не е црвено и никогаш нема да биде!“
Depositphotos
Наскоро се придружија и други. Конзервативниот сенатор Клејтон Азеведо, познат како Клеитинио, се закани со поведување парламентарна истрага против претседателот на фудбалскиот сојуз поради овие наводи.
Ривалството меѓу Лула и Болсонаро длабоко го подели Бразил, а тензиите дополнително се зголемија по нивната тесна изборна борба во 2022 година. Неколку месеци по поразот, приврзаниците на Болсонаро изведоа бунт против владата на Лула, а поранешниот претседател сега треба да се појави пред суд поради обвиненија дека се обидел да изврши државен удар за да остане на власт.
Сепак, противењето на црвените дресови изгледа дека ја обедини нацијата: според анкета спроведена од бразилската агенција „Куаест“ (Quaest), 90 проценти од коментарите на социјалните мрежи за тие дресови биле негативни, соопшти порталот Г1 (G1).
Дури и левичарските политичари изразија незадоволство.
„Боите на нашата репрезентација не се ’идеолошки идентитет’, тие го претставуваат она што нè издвојува во светот“, изјави сенаторот Рандолф Родригес, лидер на владата на Лула во Конгресот. „Секоја боја освен зелената, жолтата, белата и сината не е оправдана“.
.webp){kind=icon}
Во моментов нема коментари за веста. Биди прв да коментира...