Францускиот фудбалски гигант Пари Сен Жермен (ПСЖ) на биткоин-конференцијата во Лас Вегас објави дека во билансот на клубот држи 120 биткоини, со моментална вредност од околу 14,5 милиони долари. Потегот, објавен набрзо по освојувањето на првата историска титула во Лигата на шампионите, брзо одекна во светските медиуми. Сепак, ПСЖ не го направи овој потег поради шпекулација или финансиска потреба, туку за да „зборува на јазикот на новата генерација навивачи“.
Традиционалните фудбалски биланси најчесто се состојат од готовина во евра или долари и многу конзервативни инвестиции. Одлуката на ПСЖ дел од резервите да ги претвори во биткоин е уникатна не само во европскиот туку и во светскиот фудбал. Со тоа тие станаа првиот европски шампион што во својата благајна држи дигитален имот, обраќајќи ѝ се на дигиталната генерација, која сочинува дури 80 проценти од нивната навивачка база.
Федерико Мари, експерт за фудбалски бизнис, го нарече овој потег „исклучително паметен чекор во градењето на културниот капитал на клубот, кој значително ги надминува традиционалните маркетинг-стратегии“.
Биткоинот како културолошка валута
Раководителот на дигиталниот оддел на ПСЖ, Пер Хелгосон, е идејниот творец на оваа иновативна стратегија. Тој претходно истакна дека ПСЖ не го гледа биткоинот само како имот туку како своевидна членска карта на дигиталната култура што помладата публика ја живее секојдневно.
„Биткоинот не е само пари, тој е јазик. Тоа е начинот на кој комуницираме со поголемиот дел од нашите навивачи што се активни на крипто Твитер, гејминг и Web3 платформите,“ објасни Хелгосон.
Со тоа ПСЖ јасно покажа дека управувањето со фудбалски клуб повеќе не е само управување со пари туку и антропологија, односно длабинско разбирање на навивачката култура на младите генерации.
Зошто Лас Вегас е поважен од Париз?
Одлуката ПСЖ оваа вест да ја објави токму на биткоин-конференцијата во Лас Вегас, а не во Париз, е исто така значајна. Конференцијата привлече повеќе од 20.000 посетители од криптосветот и обезбеди голема глобална медиумска покриеност, особено во технолошкиот сектор. ПСЖ свесно го избра Вегас поради оддалеченоста од традиционалната европска фудбалска конзервативност што ја претставува УЕФА.
Исто така, со објавување на веста во САД, ПСЖ целеше и кон посилно пробивање на американскиот пазар, кој сè повеќе се интересира за европскиот фудбал, особено по доаѓањето на Меси во МЛС.
Економски ризик наспроти културолошка предност
Финансиски гледано, биткоин-инвестицијата на ПСЖ претставува релативно низок ризик за клубот. Моменталната вредност од 14,5 милиони долари претставува само 1,4 отсто од годишните приходи на клубот, кои минатата сезона изнесуваа 989 милиони евра. Во споредба со договори како оној со „Најк“ (80 милиони евра годишно) или катарското спонзорство (200 милиони евра годишно), јасно е дека парите не се примарниот мотив.
Рипл ефект во фудбалскиот свет
Одлуката на ПСЖ веќе предизвикува домино-ефект. Аналитичарите предвидуваат дека и другите големи европски клубови наскоро ќе почнат да ги истражуваат можностите да воведат крипто во своите биланси. Со тоа би можел да се промени начинот на кој клубовите склучуваат спонзорства, им исплаќаат бонуси на играчите или дури цели договори.
Според анализата на „Коин централ“ (CoinCentral), до 2030 година околу една четвртина од корпорациите во системот S&P 500 би можеле да држат дел од своите резерви во биткоин. Спортските клубови, кои традиционално се чувствителни на маркетинг-трендовите и на потребата да привлечат помлада публика, би можеле да бидат меѓу пионерите на таа практика.
Иднината на ПСЖ меѓу ризик и можност
Се разбира, ризици постојат. Волатилноста на биткоинот во случај на голем пад на цената значи дека ПСЖ би можел да почувствува одредени загуби во вредноста на својот имот. Сепак, како што беше истакнато, дури и во такво сценарио, клубот ја задржува силната културна и медиумска позиција како прв голем европски клуб што тргнал по овој пат. Од друга страна, ако биткоинот продолжи да расте до повисоки нивоа, ПСЖ би можел да оствари значителни капитални добивки и дури да финансира нови проекти, како тренинг-центар или дополнителна инфраструктура.
Федерико Мари заклучува дека овој потег е „почеток на целосно нова парадигма во спортскиот бизнис“, каде што клубовите веќе не продаваат само натпревари и играчи туку и активно управуваат со дигиталниот идентитет и културата на своите навивачи. И додека другите клубови сè уште се прашуваат „Зошто биткоин?“, ПСЖ јасно одговара: „А зошто да не?“
.webp){kind=icon}
