„Пикаса“: Наместо фокус на медалите на ЕМОФ, доминираа наративи за логистика и политика

Медиумите наместо да се фокусираат на медалите и моментите, доминантните наративи во врска со Европскиот младински олимписки фестивал (ЕМОФ) беа за логистика, координација и политика. Ова го заклучи „Пикаса“ анализирајќи ја медиумската покриеност на најголемиот спортски настан на кој Македонија беше домаќин-организатор, кој се одржа минатиот месец.

Според анализата на „Пикаса“, платформа што со моќна стратегија за следење анализира илјадници медиумски куќи и платформи на социјалните медиуми и обезбедува увид во реално време во 32 земји низ светот, ЕМОФ Скопје 2025 беше голема можност за Македонија да ги промовира младинските спортови и да го зајакне својот меѓународен имиџ.

„Сепак, јавната перцепција сугерира дека настанот немал видливост и бил засенет од критиките за лошата организација“, пишува во извештајот на „Пикаса аналитикс“ (Pikasa Analytics), која прегледа 1.468 медиумски написи и откри дека иако само 10 проценти биле експлицитно негативни, повеќето наративи се фокусирале на логистички проблеми и жалби на спортисти, а не на спортски достигнувања. Целокупниот медиумски тон бил претежно неутрален или позитивен, посочува „Пикаса“, што укажува дека социјалните медиуми и виралната содржина можеби го поттикнале незадоволството на јавноста. „Настанот ја истакнува потребата од подобра комуникација и управување со наративот во идните национални настани“, заклучува аналитичкиот тим на „Пикаса“.

ЕМОФ, кој во Скопје се одржа од 20 до 26 јули, првично е лансиран во Брисел и претставува европски мултиспортски настан што ги промовира олимписките вредности и им овозможува на младите спортисти да вкусат меѓународно натпреварување.

Процент на споделени статии за ЕМОФ Скопје 2025 Пикаса аналитикс

 

„За земјите домаќини, ЕМОФ е можност да го покажат својот организациски капацитет, да го поттикнат туризмот и да ги промовираат младинските спортови на европската сцена. Македонија го обезбеди правото да биде домаќин на настанот во октомври 2023 година, што беше опишано како ‘одлична можност да го промовираме нашиот град како спортско-туристичка дестинација и повторно да се докажеме како извонредни домаќини’, рече градоначалничката Данела Арсовска во тоа време“, пишува во анализата на „Пикаса“.

Спомнувања/Временска рамка за споредба на натписите во врска со ЕМОФ Скопје 2025 Пикаса аналитикс

 

„Блумберг Адрија“ веќе пишуваше за пропуштените можности за промоција на земјата и нејзините туристички и спортски капацитети, а заклучокот на експертите со кои разговаравме е дека освен што недостигаше маркетинг-стратегија, дополнително негативно влијание имаше фокусот на јавноста на сите придружни елементи, освен на спортските резултати и самите спортисти.

Што остана по Европскиот младински олимписки фестивал во Скопје?

Реакции на јавноста и перцепција на медиумите

„Кога започна настанот, многу граѓани изразија изненадување на социјалните медиуми што толку голем меѓународен настан воопшто се одржува во земјата. Единствениот видлив знак на фестивалот, забележаа тие, беше присуството на групи во соодветни униформи, осврнувајќи се на националните делегации што шетаат низ градот или се упатуваат на тренинг. Општата перцепција беше дека настанот добил недоволно медиумско покривање, а кога бил покриен, тонот бил претежно негативен, фокусирајќи се на организациските недостатоци, логистичките неуспеси и политичките игри на обвинувања“, пишува „Пикаса“, чија анализа е направена користејќи ја сопствената платформа за следење и анализа на медиумите (analytics.live), при што ги анализирале наративите, тонот и обемот на медиумската содржина поврзана со ЕМОФ. Во анализираниот период од 1 јуни 2023 година до 30 јули 2025 година имало вкупно 1.468 написи објавени на темата, при што 88 проценти од нив (1.298 написи) се објавени во 2025 година по објавата за ратификација од градоначалничката на Скопје, Арсовска.

„За да ја контекстуализираме видливоста, го споредивме известувањето за ЕМОФ со друг голем меѓународен настан во Северна Македонија, министерскиот самит на ОБСЕ во 2024 година. И покрај различната природа, оваа споредба помага да се разбере обемот на медиумското внимание. Самитот на ОБСЕ генерираше 9.123 написи во македонските медиуми, во остра спротивност со 1.468 написи што го опфаќаа ЕМОФ“, посочуваат од „Пикаса“.

Број на објавени статии - споредба Пикаса аналитикс

 

Тон на медиумското известување

И покрај јавните поплаки за лошата организација, само два отсто од написите имаа изразито негативен тон и тие написи главно ги опфаќаа лошите искуства на спортистите поврзани со сместувањето и храната, се посочува во анализата. „Некои истакнуваа политичко обвинување, главно од опозициските партии, обвинувајќи ја Владата дека донесе срам во земјата“, се наведува во заклучокот на „Пикаса“.

Други седум отсто од написите беа критички настроени, насочени кон Министерството за спорт, Град Скопјe и Македонскиот олимписки комитет, за разни организациски недостатоци, додека преостанатите 91 отсто од известувањето беа доста избалансирани:

• Неутрални (45 отсто): Овие написи известуваа за резултатите и општо за настанот.
• Позитивни (46 отсто): Фокусирани на церемониите на отворањето и затворањето, волонтерскиот дух и учеството на младите.

„Оваа анализа на тонот сугерира дека негативната јавна перцепција не била целосно поттикната од традиционалните медиуми, туку веројатно засилена од вирални дезинформации или селективни наративи на социјалните платформи“, истакнуваат аналитичарите на „Пикаса“.

Тон на написите објавени за ЕМОФ Скопје 2025 Пикаса аналитикс

 

Наративна анализа: Кои приказни избраа медиумите да ги раскажат?

Иако ЕМОФ 2025 беше дизајниран да ги истакне енергијата и талентот на европската младина преку спортот, медиумските наративи што се појавија раскажаа малку поинаква приказна, се наведува во извештајот.
„Нашата анализа покажа дека доминантниот медиумски фокус не беше на атлетските достигнувања или олимпискиот дух, туку на самата организација на настанот. Дискусиите околу логистиката, планирањето на настаните и инфраструктурата беа во центарот на вниманието во јавниот дискурс“, пишува во заклучокот.

„Веднаш по наративната тежина следуваа написите фокусирани на искуствата на спортистите, особено негативните. Медиумските извештаи ги истакнуваа поплаките за лошо сместување, низок квалитет на храната и нестандардно гостопримство. Некои од тие приказни добија популарност поради виралните објави на социјалните мрежи, како што се оние што се однесуваат на искуството на исландскиот велосипедски тим, кои потоа беа преземени и засилени од традиционалните медиуми“, пишува во извештајот, каде што се истакнува дека е изненадувачко тоа што наративите што требаше да го дефинираат ЕМОФ, самите спортови, беа турнати на маргините. „Приказните за млади спортисти што постигнуваат лични рекорди, тимски триумфи или инспиративни патувања добија многу помало внимание. Написите што се фокусираа на спортските резултати беа обично кратки, неутрални по тон и им недостигаше емотивно раскажување што можеше да одекне кај пошироката јавност“.

ЕМОФ Скопје 2025 - Медиумски наративи Пикаса аналитикс

 

Во суштина, медиумите не успеаја да го прикажат ЕМОФ како прослава на младите и спортот, туку, наместо тоа, дозволија да доминираат функционални критики и контроверзии, велат аналитичарите.

За целосно да ги искористат ваквите настани во иднина, организаторите и институциите мора да инвестираат во проактивни комуникациски стратегии, да ги засилат приказните на спортистите и активно да управуваат со медиумскиот наратив, пред, за време и по настанот, советуваат од „Пикаса“.

Во моментов нема коментари за веста. Биди прв да коментира...

Остави коментар