Се покажа дека двајца млади тениски генијалци можат да го надминат и темпото на самата издавачка индустрија.
Во 2024 година ја напишав „Changeover“, книга за ривалството меѓу Јаник Синер, повлечено румено момче од италијанските Алпи, и Карлос Алкараз, ведар шоумен од југоисточна Шпанија. До моментот кога ја завршив книгата, тие веќе целосно ја затворија ерата на т.н. голема тројка - Роџер Федерер, Рафаел Надал и Новак Ѓоковиќ - која речиси две децении беше неприкосновена. А до моментот кога книгата стигна во продажба неколку месеци подоцна, веќе неоспорно двајцата беа водечки тандем далеку пред конкуренцијата.
Во тој процес го натераа целиот машки тенис да се приспособи - некои успешно, некои помалку успешно. Постарата генерација речиси исчезна, додека уште помладата (Жоао Фонсека, Лернер Тиен) отворено се обидува да го имитира стилот на Синер и Алкараз. Книгата ја структурирав околу таа генерациска смена и новото ривалство, но во месеците откако престанав да пишувам, нејзината теза се потврди во комични размери. Синер и Алкараз се сретнаа на четири од последните пет турнири на кои учествуваа и уште повеќе се одвоија од другите ривали. Летово се соочија во финалето на Ролан Гарос и Вимблдон. Сега, со почетокот на УС опен (трае до 7 септември), можно е тоа да се случи и третпат.
Прочитај повеќе
Џеко во даночен рај, Дончиќ во пекол: Колку пари земаат државите од спортистите
Кога професионалните спортисти од регионот потпишуваат договори вредни повеќе милиони долари во Италија, Шпанија или САД, тие се прашуваат не само за клаузулите и бонусите туку и каде ќе плаќаат даноци...
06.08.2025
Тениската суперѕвезда Роџер Федерер – милијардер без скандали
За време на 24-годишната кариера тој заработи 130,6 милиони долари од награди.
28.06.2025
Нивното харизматично ривалство ја привлекува јавноста. ЕСПН објави дека финалето на Вимблдон во јули донело зголемување на просечната гледаност од 31 отсто во споредба со минатогодишното финале, кога Алкараз го победи Ѓоковиќ. На УС опен, Синер и Алкараз се насекаде во маркетинг-кампањите на турнирот.
Дури и најбаналните детали од нивното секојдневие предизвикуваат поголемо внимание од цели тениски мечеви. Кога двајцата само тренираа на соседни терени во почетокот на УС опен, фотографиите станаа вирални. Кога Алкараз се појави со лоша кратка фризура, тоа стана најкоментирана тема на машкиот турнир тој ден. Излезе дека неговиот брат му ја уништил фризурата, па единствено решение било да ја избричи целата глава.
„Не сфати баш добро како работи машинката“, изјави Алкараз за новинарите. „Па, знаете, единствениот начин да се поправи беше сè да се избричи.“
Алкараз ја следеше класичната патека на чудо од дете, надминувајќи ги врсниците на пониските нивоа и победувајќи на својот прв професионален меч со само 16 години. Во спорт што физички станува сè понапорен, каде што тинејџери ретко освојуваат гранслем-титули, Алкараз успеа да го освои својот прв УС опен со само 19 години.
Кариерата на Синер имаше понеобичен ритам. Со тенисот сериозно почна дури на 13 години - што е релативно доцна според стандардите - бидејќи претходно беше елитен скијач. Но тој го надомести доцниот почеток со техничка префинетост, која најдобро се разбира кога ќе се слушне зачудувачкиот звук на неговиот рекет при удар на топката. Се етаблира како врвен (но не и апсолутно елитен) играч, пред да влезе на крајот на 2023 година во победничка серија што му ја промени кариерата.
Во тој момент, Ѓоковиќ - последната бариера за помладите генерации - почна да попушта. Синер и Алкараз го надминаа и ги освоија најголемите трофеи, вклучувајќи ги сите четири гранслема во 2024 година. Младиот тандем (Синер има 24, Алкараз 22 години) во тој процес ја прескокна целата група на претенденти во доцните дваесетти. Тенисери како Саша Зверев, Стефанос Циципас и Даниил Медведев, кои со години се натпреваруваа во сенката на големата тројка, разумно можеа да претпостават дека ќе го наследат спортот по заминувањето на легендите.
Наместо тоа, сè тргна надолу: Зверев загуби гранслем-финалиња и од Синер,и од Алкараз, а неодамна зборуваше за чувство на длабока осаменост и празнина; Циципас експериментира со нагла промена на рекетот во обид да му помогне, но се мачи со хронична повреда на грбот; Медведев е во слободен пад и има само една победа на сите четири гранслема во 2025 година.
Можеби би почувствувале сожалување кон тие играчи што „остареа“ пред да го достигнат својот врв. Но Синер и Алкараз не оставаат речиси никаква можност ривалите да ги искористат нивните слабости. Всушност, тие мали пукнатини што постојат во нивната игра може да ги искористи само - оној другиот. Дел од предизвикот е во силата и спин-ударите што ги внесуваат во играта, кои бараат физичка и сензорна адаптација.
Јапонскиот тенисер Јошихито Нишиока изјави дека по мечот со Алкараз на Австралија опен го болела левата рака од самата сила на ударите. „Морам да сменам нешто, но не можам, да речеме, да станам ‘мускулест човек’“, рече Нишиока (Алкараз, ако не сте го виделе во маичка без ракави или реклама за долна облека на „Келвин Клајн“, дефинитивно е мускулест човек).
Иако послаб по градба, Синер ги збунува противниците на сличен начин. Американецот Бен Шелтон, кој загуби од него на Вимблдон, по мечот рече дека имал чувство како да игра тенис „двојно побрзо“ и дека „никогаш немал видено нешто слично“.
Сепак, за тие нивни натчовечки способности постои објаснување, иако со свои ограничувања: Синер и Алкараз ѝ припаѓаат на првата генерација професионалци што пораснале со две клучни технолошки иновации на модерниот тенис веќе во рака. Тоа се: рекети од карбонски влакна – доволно лесни за побрзи замави и поголема брзина на рекетот; полиестерски жици – кои „гризат“ за топчето и овозможуваат повеќе спин, па играчите можат да удираат посилно, а топката сепак да остане во терен. Кога на тоа ќе се додадат вродените физички предиспозиции и модерните тренинзи за сила и кондиција, ударите меѓу Синер и Алкараз се уште побрзи дури и од оние меѓу Надал и Ѓоковиќ.
Дури и играчи што се само неколку години постари од нив не пораснале нужно во исти технолошки услови. Пред почетокот на УС опен, Синер и Алкараз беа апсолутни фаворити. Синер ја брани титулата и ги има освоено последните три гранслема на тврда подлога, но сенка фрла неодамнешната болест. На последниот голем турнир пред Њујорк, во Синсинати, стигна до финале, но - погодивте - мораше да го предаде мечот против Алкараз при резултат 0:5 во првиот сет. Подоцна откри дека имал вирус, од кој сега закрепнал.
Алкараз, пак, е во надреална серија. Од почетокот на сезоната на земјена подлога во април, па до УС опен, забележа 39 победи и само два пораза, освојувајќи пет титули. Во зависност од резултатот во Њујорк, можно е да го врати првото место на АТП-листата, кое последен пат го држеше во 2023 година.
И токму тука е суштината: прашањето не е дали некој од двајцата носители ќе го освои УС опен, туку кој од нив. Може да се тврди дека ваквиот тесен избор - всушност вистинско „вратило“ - го осиромашува спортот, лишувајќи го од драма и неизвесност. Но во време кога многу љубители на тенисот беа загрижени за крајот на ерата на големата тројка, машкиот тенис доби ново, поедноставно сценарио: сега треба да знаете само двајца момци.
.webp){kind=icon}
