Новата, 80. НБА-сезона започнува вечерва, а актуелниот шампион Оклахома Сити тандер ќе ја отвори со натпревар против Хјустон рокетс. Од финансиска страна, најважната вест е дека ќе стапи во сила рекорден медиумски договор вреден дури 76 милијарди долари, што соодветно ќе ги зголеми платите на играчите, ама и цените на билетите.
Од натпреварувачка перспектива, сè е исто како и минатата година - триесет тима поделени во две конференции ќе се борат за место во плејофот во текот на 82 натпревари, а само една екипа на крајот ќе го подигне престижниот трофеј од Лари О'Брајан.
Тимот на Тандер, предводен од минатогодишниот МВП Шаи Гилџус-Александар, е годинашниот фаворит. Тие го задржаа скелетот на шампионскиот тим, па се очекува дека ќе можат да ја одбранат титулата, иако конкуренцијата е доста силна.
Нивните главни предизвикувачи на запад ќе бидат Денвер нагетс со Никола Јокиќ, ЛА Лејкерс со ѕвезденото партнерство на Леброн Џејмс и Лука Дончиќ, а не смееме да ги заборавиме и Голден Стејт вориорс и ЛА Клиперс. На исток треба да ги следите минатогодишните финалисти Индијана пејсерс, Орландо меџик и Њујорк никс.
Полна каса
НБА-лигата со години е извор на пари, а оваа година ја доживува својата финансиска кулминација бидејќи стапува во сила 11-годишниот медиумски договор склучен во јули минатата година, вреден дури 76 милијарди долари. Тоа е рекорден договор за НБА и по времетраењето и по вкупната вредност, а тие милијарди јасно ја покажуваат брзината со која расте најгледаното кошаркарско натпреварување во светот.
Имено, претходниот пакет на ТВ-права, кој беше во сила од 2016 до 2025 година, тежеше „само“ 23,4 милијарди долари, па тоа е раст од дури 165 проценти по сезона.
НБА го обнови долгогодишното партнерство со „Дизни“ (Disney) и потпиша нови договори со „Ен-би-си јуниверзал“ (NBC Universal - NBCU) и „Амазон“ (Amazon), според кои „Еј-би-си/И-ес-пи-ен“ (ABC/ESPN), „Ен-би-си/Пикок“ (NBC/Peacock) и „Прајм видео“ (Prime Video) ќе ги пренесуваат натпреварите од НБА до крајот на сезоната 2036.
Главниот пакет на ТВ-права го држи „Дизни“, кој за тоа задоволство плати околу 2,6 милијарди долари по сезона. За споредба, со претходниот договор тие платија 1,4 милијарда долари. „Комкаст“ (Comcast), сопственикот на „Ен-би-си јуниверзал“, плаќа 2,5 милијарди долари по сезона, додека договорот на „Амазон“ со НБА вреди 1,8 милијарда долари по сезона.
Според договорот, „Еј-би-си“ ги задржува ексклузивните права за финалето на НБА, додека лигата за првпат ќе има национални преноси секој ден од неделата, најобемно телевизиско покривање во историјата на НБА. Поточно, натпреварите во понеделник и четврток може да се гледаат на „Амазон прајм“, во вторник и сабота се на „Ен-би-си/Пикок“, во среда и петок на „И-ес-пи-ен“, додека саботата му припаѓа на „Ен-би-си“, а неделата на „Еј-би-си“.
„Амазон“ исто така го презема финалето на „Емирејтс НБА-куп“ (Emirates NBA Cup), додека „Ен-би-си“ ќе го емитува отворањето на сезоната и викендот „Ол стар“ (All Star). Поранешниот долгогодишен партнер ТНТ/ВБД (TNT/WBD) се откажа од националниот телевизиски пакет, со што заврши медиумската соработка што траеше повеќе од две децении. Со овој потег, лигата го зајакнува својот директен пристап до навивачите и најавува реорганизација на дигиталната содржина со поширока интеграција со платформата „Лига пас“ (League Pass), преку која можете да гледате преноси од сите натпревари.
Официјалната интернет-страница NBA.com нуди месечни опции за 11,99 долари или годишна претплата за 71,99 долари. Премиум пакетот чини 107,99 долари годишно или 17,99 долари месечно.
Богати спонзори
Покрај медиумските пари, франшизите на НБА имаа и 1,62 милијарда долари приходи од спонзорства на тимови за сезоната 2024/2025, што е зголемување од осум проценти во однос на претходната сезона, или 91 отсто во однос на изминатите пет години, според податоците од „Спонзор јунајтед“ (SponsorUnited).
Трите категории на спонзорства на тимовите што најмногу пораснаа беа технологијата (22 милиони долари), здравствената заштита (8,2 милиони долари) и автомобилската индустрија (осум милиони долари).
Од Лука Дончиќ и Леброн Џејмс во дресот на Лејкерси се очекува многу | Bloomberg
Приходите на клубовите добија дополнителен поттик од можноста за рекламирање на дресовите. Од сезоната 2017/2018, Голден Стејт вориорс го искористија ова максимално, при што нивниот договор со „Ракутен“ (Rakuten) се проценува на 45 милиони долари годишно. Бруклин нетс, Лос Анџелес лејкерс и Њујорк никс од своите спонзори заработуваат помеѓу 25 и 30 милиони долари.
Растат и платите на играчите
Купот пари од телевизиските права, заедно со профитабилните спонзорски договори, доведоа до зголемување на финансиските ограничувања за играчите. Имено, НБА официјално објави нови финансиски ограничувања за сезоната 2025/2026, според кои таканаречениот платен лимит (максимален лимит на плата) е зголемен за 10 проценти, на 154,647 милиони долари. Во исто време, НБА-лигата најавува побавен раст во наредните години, со проекција од приближно седум проценти за сезоната 2026/2027.
Данокот на луксуз достигна 187,9 милиони долари, a минималниот буџет на тимот е 139,1 милиони долари, додека првата и втората „престилка“ (серија ознаки за плати, кои ако се преминат, предизвикуваат сериозни казни за секој тим што ги преминува и можат да ја оштетат долгорочната способност на организацијата да изгради кандидат за шампионатот) се на ниво од 195,9 и 207,8 милиони долари, соодветно.
Аналитичарите предупредуваат дека ригорозните казни за тимовите што ги надминуваат ограничувањата на „престилката“ дополнително ќе ја ограничат флексибилноста на најголемите потрошувачи.
Во однос на платите, Стефен Кари ја предводи лигата оваа година со приход од речиси 60 милиони долари, по него следуваат Никола Јокиќ и Џоел Ембиид со по 55,2 милиони долари, а Кевин Дуран е малку зад нив со 54,7 милиони долари.
Вкупната плата на сите тимови се проценува на 5,1 милијарди долари, а играчите остваруваат 51 процент од вкупните приходи од кошарката.
Поскапуваат и билетите
Билетите не го избегаа трендот на раст. Имено, извештаите за пазарот на билети за почетокот на сезоната 2025/2026 покажуваат скок на почетните цени. Во Тексас, на пример, билетите за горните нивоа на салите на отворањето на сезоната надминуваат 200 долари, додека најниските цени на пазарите што се во фаза на „обнова“ се околу 30 долари.
Во Њујорк и Лос Анџелес цените се многукратно повисоки и варираат во зависност од противникот и времето на натпреварот.
Сè повредни франшизи
Што се однесува до франшизите, и во оваа категорија Голден Стејт вориорс се во водство, со проценета вредност од 11,3 милијарди долари, според податоците на „Спортико“ (Sportico). Лејкерси се преместија на второто место со околу 10 милијарди долари, додека Никси паднаа на третото место со 9,85 милијарди долари.
Повеќето франшизи бележат силен двоцифрен раст, при што Вориорс ја зголемија својата вредност за 24 проценти во споредба со минатата година, исто како и Лејкерси, додека Никсите пораснаа за 19 отсто.
Генерално, минатата година беше многу добра финансиска година за НБА. Приходите пораснаа за 6,8 проценти, на 11,3 милијарди долари, додека просечната вредност на една НБА-франшиза, според „Си-ен-би-си“, изнесуваше 4,66 милијарди долари.
Од 2000 година вкупните приходи на лигата пораснаа за 264,5 проценти, а од 2020 до 2024 година за 76 проценти. Приходите од странство сочинуваат 15 проценти од вкупниот бизнис на НБА, а Кина останува најголемиот странски пазар, со околу 300 милиони активни навивачи, додека Европа забележа годишен раст на претплатите од 15 проценти. Во Франција, гледаноста на НБА-емитувањата се зголеми за 177 проценти по дебито на Виктор Вембањама, а во Словенија за 49 проценти благодарение на Лука Дончиќ.
Во секој случај, со процена што надминува 130 милијарди долари и годишен раст од повеќе од 10 проценти, НБА го потврдува својот статус како еден од најстабилните и најпрофитабилни спортски брендови во светот.
.webp){kind=icon}
