Баерн го блокира ЧетГПТ: Фудбалот влегува во ера на интерни платформи со вештачка интелигенција

Вештачката интелигенција (ВИ) станува дел од секојдневниот оперативен ритам на фудбалските клубови, но Баерн е првиот што презема радикален потег, го блокира ЧетГПТ (ChatGPT) и ги пренасочи сите вработени на сопствена платформа за ВИ во приватен облак. Наместо да зборува за ВИ како за мегатренд, клубот ја претвори во инфраструктура, еднакво важна како управувањето со односите со клиентите, продажбата на билети или медицинските податоци.

Така, оваа отворена одлука сигнализира дека спортските организации со големи буџети и чувствителни внатрешни информации веќе не сакаат да зависат од јавни модели чие управување не можат да го контролираат. Баерн е само првиот што го кажа тоа што многумина веќе тивко го применуваат: ВИ е добредојдена, но само во рамките на околина што клубот целосно ја контролира.

Шефот за дигитално искуство на фановите, Томас Ехеман, објасни дека јавните платформи, вклучувајќи го и ЧетГПТ, се блокирани за да се создаде уникатна, безбедна и стандардизирана практика на користење на вештачката интелигенција. Наместо десетици ад хок решенија, вработените сега работат во еден систем што е посебно дизајниран за потребите на клубот, пишува „Велт“ (Welt.de).

Нова платформа веќе функционира во службата за фановите, правните оддели и продукцијата на содржини. Таа работи во приватен облак и служи како централно место за подготовка на документи, автоматизација на процеси и пребарување внатрешни бази на знаења. Пристапот на Баерн изгледа како строг, но логиката е чисто корпоративна: клубот не сака да ризикува протекување податоци, регулаторни прекршоци или репутациски штети што би настапиле користејќи јавни модели.

Зошто клубовите ја ограничуваат генеративната ВИ

Спортските организации повеќе личат на технолошко-финансиски компании отколку на традиционални клубови. Тие работат со договори вредни десетици милиони евра, со медицински податоци, стратешки документи, внатрешни преговори и скаут-бази. Сите овие информации никој сериозен не би ги испратил доброволно на отворен модел.

Регулаторната рамка дополнително ги заострува правилата. EU AI Act и GDPR ги принудуваат организациите кон контролирани решенија. Јавните платформи без локални логови и транспарентен надзор едноставно не влегуваат во тие рамки. Клубовите затоа се насочуваат кон затворени ВИ-алатки, кои формално чинат повеќе, но се побезбедни и регулаторно прифатливи.

Како клубовите изградија сопствени ВИ-алатки

Во случајот на Баерн, ВИ е буквално интернализирана. Други клубови избираат модел на партнерства со технолошки компании и ги брендираат како свои системи.

Севилја во соработка со ИБМ (IBM) изгради генеративна алатка за скаутинг што скенира огромни сетови податоци, симулира сценарија и предлага профили на играчи. Вест хем работи со АВС (Amazon web services / AWS) на систем за идентификација на таленти. Саудиската Пролига користи Опта вижн (Opta Vision) за анализа заснована на компјутерско следење. Бенфика во партнерство со Гугл клауд (Google Cloud) гради персонализиран фан-центар.

ВИ се воведува каде што носи најбрзи оперативни резултати: во скаутингот, правната обработка на договорите, автоматизацијата на извештаите, плановите на физичкото оптоварување на играчите, маркетингот и персонализацијата на комуникацијата со фановите. Тоа е тивок слој на дигитална трансформација, кој во многу клубови го менува начинот на работа побрзо отколку што тоа го направи мобилната технологија пред десетина години.

Спортот станува регулирана дигитална индустрија

Најголемата промена се случува на ниво на менталниот модел. Фудбалските клубови веќе не размислуваат како спортски институции, туку како технолошки компании. Во практика тоа значи приватни облаци, строги интерни протоколи, контролирани ВИ-асистенти и системи што оставаат трага за ревизија. Вештачката интелигенција станува инфраструктурен слој, а не додаток. Таа се наоѓа меѓу одделите, а не внатре во нив и служи како оперативна база што овозможува побрзи процеси, помал ризик и стандардизирано донесување одлуки.

Како што решенијата ќе се развиваат, разликите помеѓу клубовите ќе стануваат сè поочигледни. Тие што влегле во ВИ преку ПР веќе заостануваат. Тие што го интегрирале во оперативните системи, како Баерн, ќе создадат предност што ќе биде тешко да се достигне.

За навивачите промените ќе бидат видливи во персонализирана содржина, подобри препораки за билети и побрзо дигитално искуство. За клубовите промените се случуваат зад сцената, во системите што ги анализираат податоците, ги стандардизираат процесите и ги заменуваат административните процедури со автоматизирани акции.

Клучната лекција е едноставна: фудбалот влегува во период кога успехот веќе нема да зависи само од играчите, тренерите и буџетот туку и од тоа колку клубот е подготвен да им ја доверува секојдневната работа на интелигентни системи што ги контролира во целост. Баерн го покажа патот. Другите сега одлучуваат дали ќе го следат или ќе импровизираат.