„Опен еј-ај“ работи на пренослив уред што ќе биде ваш личен ВИ асистент

„Опен еј-ај“ (OpenAI) го подготвува својот прв хардверски производ - пренослив паметен звучник без екран, кој компанијата го замислува како нов вид домашен компјутер во ерата на вештачката интелигенција. Според извори запознаени со проектот, уредот е дизајниран да биде повеќе од обичен паметен звучник - дигитален придружник кој ќе комуницира со корисникот на природен начин, ќе ги предвидува неговите потреби и ќе му помага во секојдневните активности.

Уредот, кој сè уште е во развој, ќе се потпира на ЧетГПТ (ChatGPT) и на најновата гласовна технологија ГПТ Лајв (GPT-Live), овозможувајќи разговор што ќе биде значително поприроден од денешните виртуелни асистенти. Ќе може истовремено да слуша и да зборува, да одговара на прашања, да управува со паметни домашни уреди, да репродуцира музика, да испраќа пораки и да извршува голем број задачи преку вештачката интелигенција (ВИ).

Она што го издвојува проектот е намерата на „Опен еј-ај“ уредот да стане „физичка манифестација“ на ЧетГПТ. Според информациите, тој ќе користи камера, сензори и лични податоци, како електронската пошта на корисникот, за подобро да го разбере неговото опкружување, навиките и потребите. Со текот на времето, системот треба да стане сè повеќе персонализиран и проактивен, нудејќи информации и предлози дури и пред корисникот да ги побара.

За разлика од класичните паметни звучници, новиот производ ќе има вградена батерија, што ќе овозможи лесно да се пренесува од една во друга просторија. Корисникот ќе може да го користи во кујната додека готви, во дневната соба за репродукција на музика или во работната просторија како личен ВИ асистент.

„Опен еј-ај“ смета дека токму личноста на уредот ќе биде неговата најголема предност. Освен што ќе разговара природно, ќе има и механички елементи кои самостојно ќе се движат, создавајќи впечаток дека се комуницира со жив соговорник, а не со обичен електронски уред.

Проектот претставува важен чекор во стратегијата на „Опен еј-ај“ за влез на пазарот на потрошувачка електроника. Минатата година компанијата потроши 6,5 милијарди долари за преземање на стартапот ИП (io Products), основан од легендарниот поранешен дизајнер на „Епл“ (Apple), Џони Ајв. Неговото студио „Лавфром“ (LoveFrom) учествува во дизајнот на новата генерација производи, а на проектот работат и голем број поранешни инженери и дизајнери од „Епл“, вклучувајќи ги Танг Тан, Еванс Хенки и Пол Мид.

Токму ангажирањето на поранешни кадри на „Епл“ е една од причините поради кои двете компании влегоа во судски спор. „Епл“ неодамна поднесе тужба против „Опен еј-ај“, обвинувајќи ја компанијата дека користела деловни тајни за да го забрза развојот на својот прв хардверски производ. „Опен еј-ај“ ги отфрла обвинувањата и тврди дека нема интерес да користи доверливи информации од конкурентите, како и дека неговиот уред е суштински различен од производите што „Епл“ моментално ги нуди.

Правниот спор би можел да влијае врз временската рамка за комерцијализација на производот. Иако „Опен еј-ај“ има намера првиот ВИ уред да го претстави уште оваа година, почетокот на продажбата засега е планиран за 2027 година.

Амбициите на компанијата не завршуваат тука. Долгорочната цел е развој на мобилен ВИ уред што би можел постепено да го замени паметниот телефон. Покрај тоа, „Опен еј-ај“ истражува и други категории производи, вклучувајќи преносливи уреди и решенија за домашна роботика.

Во меѓувреме, „Епл“ работи на сопствена генерација ВИ уреди за паметен дом. Компанијата подготвува нов команден центар со седум-инчен екран, можности за видеоповици и препознавање лица, како и роботизиран модел со подвижен екран. Така, конкуренцијата меѓу двете технолошки компании се сели и на пазарот на паметни домашни уреди, кој се очекува да биде една од најважните арени за развој на вештачката интелигенција во наредните години.