„Епл“ со зголемувањето на цените ја урна светската берзанска еуфорија

Глобалните берзи забележаа остар пад и се спуштија на најниско ниво во последните две недели, откако акциите на „Епл“ нагло ослабеа, а информацијата дека „Опен еј-ај“ можеби ќе ја одложи својата иницијална јавна понудува на акции (ИПО) предизвика нов бран распродажби во технолошкиот сектор.

Азиските пазари беа меѓу најпогодените. Тргувањето на јужнокорејската берза по вторпат оваа недела беше привремено суспендирано откако индексот Kospi падна за дури девет проценти, пред делумно да ги намали загубите. Поширокиот индекс на азиските акции потона за повеќе од три проценти. Фјучерсите на Nasdaq 100 се намалија за 1,3 проценти, договорите за S&P 500 изгубија 0,7 проценти, додека фјучерсите на европските берзи ослабеа за 0,8 проценти.

Акциите на „Епл“ на Волстрит паднаа за 6,1 процент откако компанијата ги зголеми цените на компјутерите мек, таблетите ајпед и уредите за паметно домување. Овој потег ги засили стравувањата дека растечките цени на компонентите ќе ја намалат побарувачката за електронски уреди и ќе го забават растот на пазарот на мемориски чипови, кој беше еден од главните двигатели на инвестицискиот бран поврзан со вештачката интелигенција.

Во Токио, акциите на „Софт банк“ потонаа за 14 проценти откако „Њујорк тајмс“ објави дека „Опен еј-ај“ размислува да го одложи излегувањето на берза до 2027 година, што би ги одложило и потенцијалните приходи за јапонскиот инвеститор. Индексот Nikkei 225 изгуби 4,5 проценти.

Падот на цената на нафтата не успеа да го подобри расположението на инвеститорите. Цената на суровата нафта брент се движеше околу 74 долари за барел, откако претходниот ден порасна по напад со проектил врз брод во Ормускиот Теснец, што повторно ги разгоре стравувањата за безбедноста на пловидбата низ еден од најважните светски поморски коридори.

„'Епл' беше принуден да ги зголеми цените на мек и ајпад како причина наведувајќи го невидениот недостиг на мемориски чипови предизвикан од побарувачката за дата-центрите за вештачка интелигенција. Фактот дека еден од најголемите светски купувачи на компоненти не може да го апсорбира растот на трошоците отвора сериозни прашања за еластичноста на побарувачката и одржливоста на профитните маржи кај мемориските чипови“, изјави Фабиен Јип, пазарна аналитичарка во онлајн брокерската куќа ИГ (IG International).

Таа додаде дека потенцијалното одложување на иницијалната јавна понуда на акции на „Опен еј-ај“ го одразува влијанието што неодамнешната нестабилност на технолошките акции го има врз ентузијазмот на малите инвеститори.

Во меѓувреме, „Мајкрософт“ објави трето поскапување на конзолите ексбокс од актуелната генерација, што е уште еден показател за кризата со недостиг на компоненти која ги зголемува трошоците за потрошувачката електроника.

Што велат стратезите на „Блумберг“:

„Инвеститорите се обложуваа на бескрајно ведро небо за темите поврзани со вештачката интелигенција, па секое назадување секогаш е веројатно да предизвика несразмерно силна негативна реакција додека се приспособува позиционирањето на акциите. Близината на крајот на јуни можеби дополнително ја засилува брзината со која се намалува изложеноста. Падот на 'Епл' нуди уште едно предупредување дека потрошувачите можеби имаат граници кога станува збор за прифаќање повисоки цени поврзани со циклусот на надградба на вештачката интелигенција.“

— Марк Кренфилд, аналитичар

На Волстрит, индексот Nasdaq 100 во четвртокот заврши со раст од 0,8 проценти, откако во текот на денот достигна добивка од 2,1 процент. Покрај „Микрон“, силен раст забележаа и акциите на „Куалком“, откако компанијата прогнозираше дека до фискалната 2029 година ќе остварува повеќе од 15 милијарди долари годишна продажба од компоненти за вештачка интелигенција во дата-центрите. Индексот S&P 500 заврши речиси непроменет, бидејќи падот на „Епл“ го избриша позитивниот ефект од добрите резултати на „Микрон“.

Во Азија, меѓу најголемите губитници беа производителите на чипови „СК Хајникс“, „Самсунг“ и „Киоксија“, додека аналитичарите предупредуваат дека јужнокорејскиот пазар сè повеќе зависи од движењата во секторот за вештачка интелигенција, при што големите производители на чипови најавуваат нови инвестиции вредни стотици милијарди долари.

На останатите пазари, златото се задржа околу 4.000 долари за унца, среброто загуби 2,1 процент, а железната руда е на пат да ја забележи седмата последователна неделна загуба, што е најлоша серија од 2022 година. Американскиот долар остана блиску до највисокото ниво во последните седум месеци, додека приносот на десетгодишните американски државни обврзници се намали на 4,38 проценти.