„Муншот“ го гради својот ВИ-модел Кими со 20.000 чипа на „Енвидија“

Кинескиот шампион во вештачка интелигенција „Муншот“ има договор со „Алибаба груп“ за користење околу 20.000 чипа на „Енвидија“, што ја нагласува континуираната зависност на Кина од западните полупроводници за развојот на вештачка интелигенција, велат лица запознаени со работењето на компаниите.

Овој хардвер претставува значителен дел од вкупниот компјутерски капацитет што „Муншот“ го користи за своите модели Кими, велат изворите, кои побарале анонимност бидејќи станува збор за доверлив договор. Тимот на „Муншот“ се проби на глобалната сцена во текот на овој месец со претставувањето на Кими К3, модел за вештачка интелигенција со отворен код, кој според некои показатели речиси се изедначува со водечките модели на компании како „Опен еј-ај“ и „Антропик“.

„Муншот“, „Алибаба“ и „Енвидија“ одбија да коментираат за договорот.

„Алибаба“ е еден од најголемите инвеститори во „Муншот“ и очекува компаниите во кои инвестира да ја користат нејзината инфраструктура во облак, велат изворите. Но двете кинески компании истовремено се и конкуренти - а сега Кими, користејќи инфраструктура обезбедена од „Алибаба“, ги надмина нејзините модели Квен, според релевантни показатели за перформанси. Тоа предизвикало разочарување кај дел од вработените во „Алибаба“, според лице запознаено со внатрешните разговори, со оглед на тоа што ривалските тимови за вештачка интелигенција имаат пристап до слични ресурси за тренирање.

Кими К3 предизвика загриженост - од Вашингтон до Волстрит и Силициумската Долина - дека кинеските компании за вештачка интелигенција брзо го намалуваат јазот со водечките американски лаборатории, што потсетува на пробивот на „Дипсик“ минатата година. Голем дел од загриженоста е насочен кон прашањето за хардверот.

Со години САД го ограничуваат пристапот на Кина до чиповите на „Енвидија“, како и до алатките потребни за производство на сопствени процесори за вештачка интелигенција, додека американските компании инвестираат стотици милијарди долари во центри за податоци исполнети со овие посакувани акцелератори. Сепак, „Муншот“ успеа да го развие К3. Тоа отвори дебата меѓу инвеститорите за економската оправданост на огромните западни инвестиции во инфраструктура за вештачка интелигенција, како и меѓу креаторите на политики за ефикасноста на американскиот пристап.

Но според претставник на Белата куќа, „Муншот“ ги заобиколил правилата. Мајкл Крациос, директор на Канцеларијата за наука и технолошка политика, минатата недела ја обвини компанијата дека нелегално ги набавила најнапредните чипови „блеквел“ на „Енвидија“, кои се сметаат за најмоќните акцелератори за вештачка интелигенција на пазарот. Не е јасно со колку вакви процесори, според американската администрација, располага „Муншот“.

 

 

Продажбата на овие чипови на кинески компании отсекогаш барала одобрение од американските власти, а претседателот Доналд Трамп јавно изјави дека не сака Кина да купува акцелератори од серијата „блеквел“ на „Енвидија“. Според претходни информации на „Блумберг“, американските власти веруваат дека и „Дипсик“ располага со чипови „блеквел“.

Сепак, американските правила генерално им дозволуваат на кинеските компании да пристапат до истите чипови преку договори за изнајмување компјутерски капацитет. Крациос изјави дека „Муншот“ го направил токму тоа преку неименувана компанија во Тајланд и дека најверојатно ги користел овие акцелератори за тренирање на К3. Тој исто така тврдеше, без да приложи конкретни докази, дека „Муншот“ применил техника наречена „дестилација“, користејќи резултати генерирани од водечкиот модел Фејбл на „Антропик“, за да го тренира К3. Тоа веројатно помогнало да се компензираат ограничените компјутерски ресурси.

Лице запознаено со стратегијата за набавки на „Муншот“ потврди дека компанијата навистина има канал преку кој пристапува до процесорите „блеквел“ преку Југоисточна Азија. Сепак, не беше прецизирано дали станува збор за изнајмување - што во повеќето случаи е дозволено - или за директно купување, што би претставувало прекршување на американските прописи. Неделава „Информејшн“ објави дека „Муншот“ бара дополнителни процесори „блеквел“ за тренирање на својот следен модел.

Во меѓувреме дваесетте илјади чипа до кои „Муншот“ има пристап преку „Алибаба“ се од претходната генерација „хопер“ на „Енвидија“, велат лицата запознаени со договорот. Чиповите „хопер“ беа индустриски стандард за тренирање и извршување модели за вештачка интелигенција сè додека „Енвидија“ не ја претстави серијата „блеквел“.

Најмоќните процесори од оваа серија отсекогаш барале американска извозна лиценца за испорака во Кина, додека помалку напредните модели - Х800 и Х20 - во одреден период можеа слободно да се извезуваат, но сега и за нив е потребно одобрение од Вашингтон.

Повеќе извори блиски до „Муншот“ велат дека договорот конкретно се однесува на чиповите Х200, најмоќните акцелератори од генерацијата „хопер“. Портпарол на „Алибаба“ негираше дека компанијата му обезбедува на „Муншот“ компјутерски капацитет базиран на Х200. Сепак, тој не негираше дека компанијата обезбедува капацитет еквивалентен на дваесетте илјади чипа на „Енвидија“ и одби да открие кои чипови.

САД издадоа лиценци за ограничен број директни продажби на Х200 во Кина, што претставува значителен пресврт во политиката на администрацијата на Трамп. Но висок американски претставник неодамна изјави дека досега бил испорачан само „незначителен“ број на чипови со тие дозволи. Во меѓувреме Пекинг е воздржан во одобрувањето на домашните компании да ги купуваат овие чипови и ги охрабрува да користат кинески решенија, како оние на „Хуавеј“.

Кинеските компании што нудат услуги во облак понекогаш ги заобиколуваат американските ограничувања така што пристапуваат до ограничените чипови во сопственост на странски компании сместени надвор од Кина - што генерално е дозволено - а потоа тој компјутерски капацитет повторно го изнајмуваат како дел од сопствените услуги. Засега не е познато каде физички се наоѓа компјутерскиот капацитет што „Алибаба“ му го обезбедува на „Муншот“.