Ќе експлодираат цените на компјутерите и телефоните: уредите веќе поскапуваат

Ќе растат цените на сите електронски уреди - од компјутерите, преку паметните телефони, па до домашните апарати и автономните автомобили. Ценовниот шок во текот на 2026 година ќе го диктираат недостигот од РАМ-меморија (од англиски: random acces memory) и неможноста на производителите да одговорат на побарувачката.

Проблемот станува сѐ поалармантен затоа што производителите на чипови „Енвидија“ (Nvidia), „Адвенсд мајкро дивајсес“ (Advanced Micro Devices) и „Гугл“ (Google) откупуваат огромни количества меморија (HBM и DRAM), а трите најголеми производители - „Мајкрон“ (Micron), „СК Хиникс“ (SK Hynix) и „Самсунг“ (Samsung Electronics) - кои го држат целиот пазар, не можат да испорачаат доволно.

Поради растот на цените, овие три компании бележат и силен раст на приходите. „Мајкрон“ во последниот квартал ја зголеми нето-добивката речиси тројно, „Сасмунг“ очекува исто толкаво зголемување на оперативната добивка, а „СК Хиникс“ веќе целосно го распродаде капацитетот за РАМ-меморија за оваа година.

Производителите на меморија најавуваат нови инвестиции во фабрики, но конкретните капацитети се очекуваат дури од 2027 година. Дотогаш пазарот останува под притисок. Претпоставките се дека цените на ДРАМ-меморијата (од англиски: dynamic random acces memory, која за разлика од статичната е побавна, но е поевтина и се користи во повеќето компјутери) само во првиот квартал од оваа година ќе пораснат од 50 до 55 отсто во однос на декември лани, што се оценува како невидено досега.

Цените растат, а се складираат и резерви

Производителите на меморија им даваат предност на технолошките гиганти, што веќе влијае и на пазарот на потрошувачка електроника. Одделни компании, како „Епл“ (Apple), „Шаоми“ (Xaomi) и „Дел“ (Dell), предупредија дека растот на цените на меморијата може да доведе до поскапи уреди за крајните корисници. „Леново“, пак, минатата година почна да складира мемориски чипови во очекување недостиг.

И „Самсунг“ очекува недостигот на мемориски чипови да ги зголеми цените низ целата електронска индустрија, потенцијално вклучувајќи ги и сопствените производи за потрошувачите.

Јужнокорејската компанија е најголемиот производител на меморија во светот, но дури и нејзиното портфолио не е имунo на растечките трошоци за компонентата што е суштинска за сè – од паметни телефони и лаптопи до поврзани домашни апарати и автономни автомобили.

 

„Ќе има проблеми со снабдувањето со полупроводници, а тоа ќе влијае на сите“, изјави во интервју Воњин Ли, претседател и шеф на глобален маркетинг, „Цените растат додека зборуваме. Секако, не сакаме тој товар да го пренесеме на потрошувачите, но ќе дојдеме до точка кога навистина ќе мора да размислиме за преценување на нашите производи.“

„Сведоци сме на многу остар, значителен пораст на побарувачката за меморија, кој далеку ја надминува нашата способност да ја снабдиме“, изјави деловниот директор на „Мајкрон“, Сумит Садана.

Растот на цените на меморијата влијае на вкупната цена на електрониката. Меморијата сега сочинува околу 20 проценти од цената на хардверот на лаптоп, во споредба со околу 10-18 проценти на почетокот на 2025 година.

 

                    

Вртоглаво растат и приходите

Бумот на изградба на центри за податоци со вештачка интелигенција е главниот виновник за невидената побарувачка за меморија со висока пропустливост – профитабилен производ што ги подигна акциите на „Самсунг“ и на конкурентот „СК Хиникс“ на нови рекордни височини, а акциите на „Мајкрон“ се зголемени за 247 отсто во текот на минатата година.

Производителите на меморија им даваат приоритет на серверите и ВИ-клиентите, каде што растот на побарувачката е најсилен, а купувачите се помалку чувствителни на зголемувањето на цените. Во декември „Мајкрон“ најави дека ќе намали дел од својот бизнис со меморија за потрошувачки персонални компјутерски уреди за да зачува резерви за ВИ-чипови и центри за податоци.

Повеќе меморија им овозможува на ВИ-системите да работат со поголеми модели, да опслужуваат повеќе корисници истовремено и да задржат подолг контекст во разговорите.

Се градат нови фабрики, но тоа ќе оди бавно

Производителите на чипови градат нови капацитети, но олеснување може да дојде дури за неколку години, а дотогаш снабдувањето ќе остане ограничено.

„Мајкрон“, во најдобар случај, може да задоволи само две третини од среднорочните  потреби за меморија на некои од клиентите, изјави Садана.

Компанијата моментално гради две големи фабрики во Бојси, Ајдахо, кои ќе почнат да произведуваат меморија во 2027 и 2028 година, рече тој. „Мајкрон“ исто така ќе започне со изградба на фабрика во градот Клеј, Њујорк, која според него се очекува да биде оперативна во 2030 година. Но, засега, „распродадени сме за 2026 година“ вели Садана.