„Енвидија“ блиску до инвестиција од 20 милијарди долари во „Опен еј-ај“

„Енвидија“ (Nvidia Corp.) се приближува до договор за инвестирање од 20 милијарди долари во „Опен еј-ај“ (OpenAI), во рамките на најновата рунда на финансирање на таа компанија, според наводите на лица упатени во ситуацијата, што би претставувало најголемо поединечно инвестирање на овој производител на чипови во компанијата што стои зад ЧетГПТ.

Придонесот на „Енвидија“ е речиси завршен, велат изворите, кои говореле под услов за анонимност. Договорот сѐ уште не е реализиран и условите може да се променат.

Од „Опен еј-ај“ и „Енвидија“ одбија да коментираат. 

„Опен еј-ај“ се обидува да собере до 100 милијарди долари во рамките на новата рунда на финансирање, при што голем дел од оваа сума би дошол од водечките технолошки компании, објави „Блумберг њуз“. „Амазон“ (Amazon.com Inc.) водел преговори за инвестирање до 50 милијарди долари, додека „Софтбанк“ (SoftBank Group Corp.) разговарала за инвестирање до 30 милијарди долари. „Фајненшел тајмс“ (Financial Times) претходно извести дека „Енвидија“ би можела да инвестира до 20 милијарди долари.

„Опен еј-ај“ и „Енвидија“ се клучни темели за процутот на вештачката интелигенција, но нивниот однос во последно време се најде под засилен надзор, по објавувањето на извештаите за тензии меѓу двете компании. „Волстрит журнал“ (The Wall Street Journal) во петокот објави дека планот што „Енвидија“ го најави во септември, според кој би инвестирала до 100 милијарди долари во „Опен еј-ај“, пропаднал поради тоа што некои вработени во овој гигант за чипови изразиле сомнежи во однос на договорот.

Извршните директори на двете компании тогаш јавно порачаа дека остануваат посветени на заедничката соработка. „Сигурно ќе учествуваме во следната рунда на финансирање, бидејќи ова е многу добра инвестиција“, изјави извршниот директор на „Енвидија“, Џенсен Хуан, за новинарите за време на посетата на Тајпеј во саботата. Тој додаде дека тоа потенцијално би било „најголемата инвестиција што некогаш ја направиле“.