.webp){kind=icon}
„Тик ток“ (TikTok), апликацијата за социјалнo вмрежување во сопственост на „Бајт денс“ (ByteDance), забранува собирање средства и други можности за заработка на пари на политичари и владини налози на својата платформа.
Мрежата за кратки видео содржини веќе забранува политички реклами, вклучувајќи ги и сите платени објави на инфлуенсери. Новите правила дополнително ќе забранат барања за донации, можности за е-трговија и прифаќање подароци од корисниците. Политичките налози автоматски нема да бидат овластени да заработуваат преку фондот за создавачи на TikTok, се вели во изјавата на претседателот за глобални деловни решенија на компанијата, Блејк Чендли.
Овој потег е најавен во пресрет на овогодинешните избори во САД, кои се нов тест за социјалните мрежи и нивната способност да одржуваат неутралност додека дебатите - и потенцијално координираните кампањи - беснеат. TikTok започнува со пробна задолжителна верификација на налозите на влади, политичари и партии која ќе трае до ноември кога ќе се одржат изборите, соопшти компанијата.
„Со забраната за собирање средства за кампањи и ограничување на пристапот до нашите функции за монетизација и верификација на налозите, сакаме да постигнеме рамнотежа помеѓу слободата на луѓето да зборуваат за прашања кои се релевантни за нивниот живот, додека ја штитиме креативната, забавна платформа каква што ја сака нашата заедница“, порача Чендли во соопштение.
TikTok, кој се обиде да се дистанцира од својата матична компанија, повторно е во центарот на вниманието на американските регулатори, сега соочен со прашања од сенаторите за пристапот до нивните кориснички податоци од страна на персоналот со седиште во Кина. Загриженоста за влијанието на Кина врз сопственикот на TikTok во Пекинг, исто така, се проширува и на потенцијалните пропагандни кампањи. Владино тело за односи со јавноста се обиде да отвори скриена сметка на TikTok наменета за западната публика во 2020 година, на што компанијата се спротивстави.
