Графичките картички на „Енвидија“ се најдоа среде трговска војна меѓу САД и Кина

Кинеските гејмери ​​сега ќе мора да издвојат двојно повеќе за да купат напредни графички картички од „Енвидија“ (Nvidia Corp.), откако американските власти воведоа забрана за извоз на технологија во земјата што е нејзин најголем геополитички ривал.

Цените за картичката „џифорс ртх 4090“ (GeForce RTX 4090), која се појави минатата година, првично беа 1.599 долари. Нивната цена на пазарот Таобао на „Алибаба“ (Alibaba Group) скокна дури до 29.000 јуани (3.970 долари) бидејќи трговците на мало почнаа да ја повлекуваат од своите полици. RTX 4090 е најнапредната графичка картичка од „Енвидија“ и е дел од опремата што е на листата на желби на многу играчи низ светот. Сепак, САД го забранија извозот во Кина, откако беше откриено дека нејзините перформанси го надминуваат прагот поставен од американските официјални лица, соопшти „Енвидија“ оваа недела.

Намерата на Вашингтон е да користи ограничувања за да ја спречи кинеската војска да пристапи до опрема што може да помогне во развој на напредни апликации за вештачка интелигенција, која вклучува првенствено специјализирани чипови како што е A800 на „Енвидија“ . Десктоп-компјутери со RTX 4090 сè уште се достапни за купување во некои кинески продавници, иако и натаму ќе бидат предмет на ограничувања од САД, се наведува во соопштението на „Енвидија“.

„Енвидија“ наведува дека картичките RTX 40 што ги произведува се пионери во полето на користење вештачка интелигенција при рендерирање графики и дека во нивното производство го применува она што го нарекува невронско рендерирање за побрзо процесирање на постабилна графика. Компанијата исто така разви алгоритми за длабоко учење за да помогне во развојот на технологијата потребна за усовршување на анимациите, а нејзината водечка улога во создавањето чипови со вештачка интелигенција се заснова на технологија што првпат е интегрирана во потрошувачките картички.

Во моментов нема коментари за веста. Биди прв да коментира...

Остави коментар