Во Јапонија направија “човечки фрижидер“ - спас од пеколните жештини

Стаклената врата се затвора и завеса од ладен воздух се прелева преку вашата глава, врат и рамена, обезбедувајќи моментално олеснување од пеколната летна жега.

Вака изгледа  да се опуштите во „До Хиемон Бокс“ (Do Hiemon Box), фрижидер од не'рѓосувачки челик кој изгледа доволно голем за да собере човек, бидејќи токму за тоа е дизајниран. Јапонскиот производител „Трaско Накајама“ (Trusco Nakayama Corp.) продал досега околу 200 од кабините што чинат 1,5 милиони јени (9.500 долари) на челичарници, градилишта, терени за голф, универзитети и објекти за разонода  откако се појави во продажба пред некој месец.

Со зголемувањето на глобалните температури, летата во Јапонија стануваат потопли и повлажни, со отчитувања кои редовно надминуваат 35°C . Метеоролошката агенција на земјата мораше да смисли нова терминологија за жешки денови, додека националниот радиодифузер „НХК“ (NHK) рутински ги предупредува гледачите за ризик од топлотен удар. Во текот на сезоната, аптеките и продавниците за стоки за домаќинство ги полнат своите полици со производи во сина боја кои ветуваат разладување.

Направата на „Траско“, всушност висока кутија на тркала со прозорец и клупа, која што се приклучува во стандарден електричен штекер, е наменета за употреба на места без лесен пристап до климатизација. По земјотресот од минатата недела што го погоди Кумамото, компанијата испрати единици во засолништата за евакуација.

„До Хиемон Бокс“, која ја одржува температурата на 15 степени и испушта млазници воздух од 5 степени откако некој ќе седне внатре, е дизајнирана да понуди брзо олеснување од потенцијална топлотна исцрпеност или топлотен удар, наместо да служи како просторија за седење и релаксација.

„Концептот беше помалку за обезбедување место за одмор, а повеќе за обезбедување опрема што би можела да помогне да се спречи влошување на состојбите поврзани со топлината“, рече Фумијаки Мацубара, генерален директор на производната дивизија на „Траско“.

„Траско“, која има пазарна вредност од околу 1 милијарда долари и има околу 3.300 вработени, главно произведува машини и алати, како и опрема за домови и канцеларии. Компанијата добила барања за човечкиот фрижидер дури од Германија и САД, рече Мацубара.

Како што екстремните горештини стануваат сè почести, компанијата гледа потенцијална побарувачка од трговски центри, летни фестивали и други места каде што има гужви.

Построгите владини регулативи за спречување на топлотен удар додаваат импулс. „Побарувачката за нашите останати производи за ладење на работното место се удвојува приближно секоја година во последниве години“, рече Мацубара.