Членовите на Европскиот парламент гласаа да ги принудат компаниите како „Епл“ (Apple Inc.) да ги приспособат производите што и натаму немаат стандарден USB-C полнач, во иднина да користат таков. Ова би ги вклучило ајфоните (iPhone) во случајот на Apple.
За планот денеска гласаа вкупно 602 пратеници, 13 беа против, а осум воздржани.
Договорот, првично усогласен во јуни меѓу Комисијата и 27-те земји на Европската унија, сè уште треба да го добие конечна верификација од земјите-членки. Правилата најверојатно ќе бидат запишани во легислатива на почетокот на 2023 година.
Алекс Агиус Салиба, главниот преговарач во Европскиот парламент, држеше куп адаптери за напојување кога денеска во Стразбур говореше за конечниот предлог. „Го заменуваме овој куп полначи, само со ова“, рече тој притоа држејќи единствен USB-C кабел.
Предлогот првично го налути Apple, од каде се жалеа дека тоа ќе ги намали иновациите. Но, компанијата веќе тековно тестира идни модели на iPhone кај кои т.н. lightning порт за напојување е заменет со стандарден USB-C конектор, објави Bloomberg во мај. Тековните лаптопи на Apple и моделите iPad Pro веќе ги користат овие портови, како и повеќето популарни Android паметни телефони.
Според предложените правила, сите телефони и таблети што се продаваат во Европа ќе мора да се усогласат до есента 2024 година. Лаптопите ќе имаат подолго време за адаптација. Комисијата во иднина ќе може да постави и стандарди за безжично полнење.
Предлогот првпат беше даден минатата година од Европската комисија. Наменет е да го намали техничкиот отпад и да им заштеди на потрошувачите околу 250 милиони евра годишно бидејќи повеќе нема да треба да купуваат различен полнач за секој уред, изјави извршната потпретседателка на Комисијата, Маргрете Вестагер пред парламентот во вторникот.
„Заедничкиот полнач ќе го поедностави животот на Европејците“, рече Вестагер. „Нема веќе застарени полначи кои се трупаат во фиоки, со што се намалуваат трошоците за европските граѓани“.
.webp){kind=icon}