Џенис Џоплин своевремено го молеше бог да ѝ купи „мерцедес бенц“. Да беше жива денес, ќе требаше да плаќа и годишна претплата за автомобилот да ѝ вози побрзо.
„Мерцедес бенц“ (Mercedes-Benz AG) се обидува да им продаде на купувачите на своите електрични седани EQ годишна претплата за додаток кој чини 1.200 долари што отклучува функција која веќе е интегрирана во луксузните возила. Купувањето на претплата ќе го намали времето потребно за забрзување од нула до 60 милји (100 километри) на час за нешто помалку од една секунда. Опцијата ќе се деактивира доколку клиентот не ја обнови претплатата во следните 12 месеци.
„Финото прилагодување на електричниот мотор ја зголемува максималната моќност на моторот на вашиот Mercedes EQ за 20 до 24 проценти“, се наведува во делот за таканаречената претплата за зголемување на забрзувањето, на онлајн продавницата на компанијата. „Бројот на вртежи е исто така зголемен, овозможувајќи му на вашето возило да забрзува значително побрзо и помоќно“.
Bloomberg Mercury
Наплаќањето на клиентите за опција што физички веќе е вградена во автомобилот е храбар потег на премиум производителот на автомобили. Сличен потег на германскиот ривал BMW имаше контраефект на почетокот на годинава кога компанијата се обиде на сопствениците на автомобили да им продаде претплата од 18 долари месечно за греење на седиштата.
Производителите на автомобили се обидуваат одвреме-навреме да воведат услуги кои клиентите ќе може сами да избираат, со цел да ги зголемат приходите. Ова може да важи и за функции како што се услугите за автоматско возење, бидејќи софтверот во возилата станува сè понапреден.
Mercedes ја нуди оваа функција кај некои од неговите најпопуларни модели како седанот EQS и EQS SUV, како и EQE седан и EQE SUV.
.webp){kind=icon}