.webp){kind=icon}
Вистинска трка има меѓу земјите од Европа и регионот Адрија за привлекување таканаречени дигитални номади, но Македонија заостанува бидејќи недостига регулатива што ќе им овозможи полесни процедури за подолг привремен престој на странците што сакаат да работат од далечина во земјава. Имено, тие сега можат да се задржат во земјава само 90 дена.
Иако Министерството за внатрешни работи уште кон крајот на 2021 година подготви измени на Законот за странци со кои се предвидуваат олеснувања за дигиталните номади, тие сè уште не се влезени во собраниска процедура. Од Министерството за внатрешни работи информираат дека измените и дополнувањата на Законот за странци, во кои се опфатени и одредбите за регулирање привремен престој за дигитални номади, се во тек.
„Постапката е пролонгирана поради потребата од инкорпорирање на обврските преземени од наша страна во текот на скринингот во рамките на евроинтегративниот процес. Се очекува постапката да биде комплетирана во наредниот период, по што предложените измени и дополнувања ќе бидат доставени до Владата на РСМ, со цел утврдување на предложениот текст и натамошно проследување на истиот тој во собраниска процедура“, велат од МВР.
Нацрт-измените на Законот за странци, кои беа објавени на Единствениот национален електронски регистар на прописи, предвидуваат дека на странец дигитален номад ќе му се одобри привремен престој во земјава ако е резидент на држава-членка на Европската Унија или на ОЕЦД, остварува месечен приход во износ од минимум 1.500 евра во последните шест месеци пред поднесување на барањето за привремен престој и да приложи доказ дека најмалку една година е во работен однос и е пријавен во задолжително социјално осигурување, а доколку работи за странски работодавец, да приложи и потврда од работодавецот.
„Привремениот престој се издава за период до една година и тој може да се продолжува доколку се утврди дека и понатаму постојат причини утврдени со закон“, пишува во нацрт-измените на Законот за странци.
Повеќе земји од Европа и регионот во последниот период воведоа таканаречени визи за дигиталните номади за да привлечат странци што работат од далечина. Хрватска, која се смета за една од најпривлечните дестинации за дигиталните номади, овозможува привремен престој за дигитални номади до една година.
Од неодамна Грција нуди и посебни визи за луѓе што работат од далечина преку посебна програма со која и овие вработени дигитални номади ќе можат легално да живеат и да работат во земјата. На крајот на минатата година Португалија воведе дозвола за престој со која работниците што се ангажирани онлајн може да останат во земјата до една година.
„Блумберг Адрија“ веќе пишуваше дека Португалија стана омилена дестинација за Американците што сакаат да патуваат или да се преселат во странство.
„Дигиталното номадство е тренд што добива на сила од раните 2020-ти, а со пандемијата на ковид-19, работењето од далечина стана реалност за многу работници“, рече Патриша Касабури, управна директорка на „Глобал ситизен солушнс“ (Global Citizen Solutions), компанија за миграција за инвестиции.
„Оваа виза ќе ги поедностави процедурите за граѓаните од други земји што сакаат да дојдат во Португалија и земјата ќе има корист од привлекување нови лица на пазарот на трудот и повеќе човечки ресурси“, додаде таа.
Според регулативата во Португалија, оние што аплицираат за дигитална номадска виза мора да достават доказ за даночен престој, заедно со нивниот договор за вработување или, доколку се самовработени, друга форма на договор за работа. Просечниот месечен приход во последните три месеци мора да биде еквивалентен на најмалку четири пати од националната минимална плата во Португалија, која моментално е 705 евра (689 долари) месечно.
